Ibarani 5
5
Hi Yesu mewali Tadulako Mpenomba Ngkodeꞌ wute nantolou-louna
1Lekiꞌna tadulako mpenomba ngkodeꞌ niꞌuwiꞌ ka lumbuna toaꞌ, hante nihini hingkeꞌna mampopatengkaꞌ jamana Pueꞌ Ala. Iomo to nolou pe hinarona Pueꞌ Ala hingkeꞌna mosulewotai toaꞌ woriꞌ. Jamana morereꞌ pinatuwuꞌ hingkeꞌna mampohawa dosara toaꞌ woriꞌ hei mampewei popenomba to ntaniꞌna pe Pueꞌ Ala. 2Tadulako mpenomba ngkodeꞌ tiꞌo toaꞌ biasa hante bateꞌna woriꞌ komakuraꞌne. Iomo horiana hangangaa nobahaꞌ morewahi toaꞌ to handoaꞌi tene pobahaꞌ hapo to tuꞌu horiana mowalihi dosa alaꞌ io hadoduona toaꞌ to biasa woꞌo. 3Alaꞌ komakuraꞌna tiꞌo, tadulako mpenomba ngkodeꞌ mampewei popenomba handoꞌiolu hingkeꞌna mampohawa dosara toaꞌ woriꞌ, angkana hingkeꞌna mampohawa woꞌo dosana hadoduona. 4Hei hawaꞌi uwaꞌ toaꞌ to mohini wotana hadoduona mewali tadulako mpenomba ngkodeꞌ, angkana toaꞌ to mewali tadulako mpenomba ngkodeꞌ, nowowoi Pueꞌ Ala, hibali to mewali hampiha i hi Harun, tadulako mpenomba ngkodeꞌ to uluꞌ-uluꞌna.
5Hatoꞌo woꞌo Kerisitu, hawaꞌi mampeꞌiwowomboꞌ, hante hawaꞌi mohini wotaNa hadoduona mewali Tadulako Mpenomba Ngkodeꞌ, angkana Pueꞌ Ala wae to mohiniꞌI, Notiꞌi waheꞌe:
“Ingkomo AnaꞌKa,
Ando hieꞌe mewaliꞌA UmoꞌMu.” (Mas. 2:7)
6 #
Pwl. 14:17-20
Hei i lali Suraꞌ Mangkolehi, notiꞌi woꞌo Pueꞌ Ala pe AnaꞌNa:
“Ingkomo Tadulako Mpenomba wute nantolou-louna,
motuntuni konipotadulakona mpenomba hi Mekisedeꞌ.” (Mas. 110:4)
7 #
Luk. 22:42
I tempona tene hi Yesu tuwuꞌ i duniaꞌ hieꞌe, Io merorai hante meꞌola i lali pekokaeNa merapiꞌ sulungi pe Pueꞌ Ala, alaꞌ Nobahaꞌ komakuasaꞌne Pueꞌ Ala mampohinte ka komahia. Angkana hawaꞌi hiniꞌ motuntuni peleihaNa hadoduoNa, bateꞌna mengkoruꞌ pe peleihana Pueꞌ Ala. Iomo horiana Pueꞌ Ala mampehoromua perapiꞌNa. 8Kehapoꞌi Io AnaꞌNa Pueꞌ Ala, angkana pahua woꞌo komaporiꞌ, hei i lali komaporiꞌ tiꞌo, Io meguru hohumbo lalane mengkoruꞌ i Pueꞌ Ala. 9Nokomi pengkoruꞌNa tiꞌo, hi Yesu mewali Topohompoꞌ to hawaꞌi uwaꞌ komakuraꞌNa, hei alaꞌ koꞌIona, lekiꞌ-lekiꞌna toaꞌ to mengkoruꞌ pe Io hingkiꞌ pahua kotuwuꞌ to wolaꞌ to hawaꞌi mokoꞌukoa. 10Hei Pueꞌ Ala mohini hi Yesu mewali Tadulako Mpenomba Ngkodeꞌ motuntuni konipotadulakona mpenomba hi Mekisedeꞌ.
Inioꞌki maꞌoruꞌ ka pepoꞌohinta
11Halali-halali, kotuꞌuana, woriꞌ tene to kukodokoꞌi kutiꞌikikei noniuꞌ hi Yesu hante hi Mekisedeꞌ, angkana maporiꞌ kuhori mampokonontokikei lekiꞌ-lekiꞌna tiꞌo, alaꞌ mengkabonoꞌkei. 12Kotuꞌuana hinewowoꞌena hangangaa mewalikei guru i pohawaꞌna Pueꞌ, alaꞌ moruemokei metuntu i Pueꞌ Yesu, angkana paralukei tene meguru i toaꞌ ntaniꞌ, alaꞌ handoaꞌi tene ibahaꞌkei pongkane poturuꞌ agama Sarani. Howeꞌ woꞌo poturuꞌ to mololihaꞌ, handoaꞌi tene moromiꞌ koꞌipetuntuinekei, hapo tene poturuꞌ to masusa! Hibalikei tene himidoꞌ: handoaꞌi tene ibiaꞌkei mangka pangka to morintodi. 13Himidoꞌ paralu tene maꞌomiꞌ. Palaihana, handoaꞌi tene mononto lalire hingkiꞌ mampopoꞌori hapo to tuꞌu hante hapo to salaꞌ. 14Angkana pangka to morintodi, dolaꞌra toaꞌ to monindimo; palaihana, toaꞌ to pobahaꞌmo mampopoꞌori hapo to moromiꞌ hante hapo to kodake.
Currently Selected:
Ibarani 5: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
