Ibarani 10
10
Komahina hi Yesu mohompoꞌki ka dosanta wute nantolou-louna
1Ka Aturana hi Musa, handoaꞌi tene mombaha hapo to moromiꞌ to hingkiꞌ mewali moliu Kerisitu. Hibaliluki pangkiꞌ wowaro. Motuntuni Aturana hi Musa tiꞌo, toꞌa-toꞌana toaꞌ to mangkodokoꞌi mangkododungkui Pueꞌ Ala hangangaa mangkomihi pinatuwuꞌ hei nirereꞌ mewali popenombara, angkana popenombara tiꞌo hawaꞌi mampomangkolehi toaꞌ i peꞌelena Pueꞌ Ala. 2Ane kerapaꞌnaꞌi tuꞌu-tuꞌu niꞌampunimo dosare, kehamboaꞌmohi paralu mangkomi popenombara, alaꞌ robahaꞌmoꞌi teꞌampunimo dosare wute nantolou-louna hei hamboaꞌmo hingkiꞌ masusa lalire nokomi komadosara. 3Angkana hawaꞌi hatoꞌo. Ka popenombara to rokomi toꞌa-toꞌana, mampopangkolowoihi nturusi komadosara, 4alaꞌ raꞌa gapiꞌ hante raꞌa bekeꞌ hawaꞌi wadi mopahi dosa.
5-6Iomo horiana, ikohupaꞌana Kerisitu pe duniaꞌ hieꞌe, Io mololita pe Pueꞌ Ala, Notiꞌi waheꞌe:
“Hawaꞌi Ilei popenomba to nihunu,
hei hawaꞌi Iperapiꞌ pinatuwuꞌ to nirokoꞌ
hingkeꞌna mampohawa dosa toaꞌ,
angkana wotangKu hadoduongKu to Ipatimomo
hingkeꞌna mewali popenomba pe Ingko.
7Iomo horiana Kutiꞌi: HieꞌemoꞌA Pueꞌ Ala,
humeiꞌA mampetuntui peleihaMu,
hibali to teꞌukiꞌ i lali Suraꞌ Mangkolehi noniuꞌ i Aku.” (Mas. 40:7-9)
8Kehapoꞌi popenomba hangangaa nipewei motuntuni Aturana hi Musa, angkana Kerisitu mantiꞌi waheꞌe: “Pueꞌ Ala hawaꞌi Nolei popenomba to nihunu hante popenomba to ntaniꞌna, hei hawaꞌi Noperapiꞌ pinatuwuꞌ to nirokoꞌ hingkeꞌna mampohawa dosa toaꞌ.” 9-10Uko tiꞌo, Notiꞌi womo, “HieꞌemoꞌA Pueꞌ Ala, humeiꞌA mampetuntui peleihaMu.” Atura-atura to uluꞌ-uluꞌna noniuꞌ i popenomba hamboaꞌmo modumbuꞌ, nopahimo Pueꞌ Ala, alaꞌ uwaꞌmo lala to wolaꞌ hingkeꞌna teꞌampuni dosa, iomo moliu hi Yesu Kerisitu. Hampihalu Io mampewei wotaNa pe Pueꞌ Ala hibali popenomba to wolaꞌ motuntuni peleihana Pueꞌ Ala, hingkeꞌna Nopomangkolehimoki wute nantolou-louna.
11Ando-ando lekiꞌ-lekiꞌna tadulako mpenomba agama Yahudi mampopatengkaꞌ jamara, hei rohuliꞌ-huliꞌ mampewei popenomba, to hawaꞌi wadi mopahi dosa. 12Angkana Kerisitu, hampihalu mampewei popenombaNa, iomo wotaNa hadoduoNa, hingkeꞌna nirokoꞌI mampohawa dosana toaꞌ. PopenombaNa tiꞌo modumbuꞌ wute nantolou-louna. Koꞌukona mampewei popenombaNa tiꞌo, mengkaꞌoreꞌmo nolou pe suruga hei mahura i hirina Pueꞌ Ala i pahura to teꞌadaꞌi moparenta moꞌawa hante Io. 13Hinewowoꞌena Kerisitu mampekau tempona Pueꞌ Ala hingkiꞌ mampopengkoruꞌ lekiꞌ-lekiꞌna poniꞌNa pe Io. 14Mewaliꞌ, nokomi komahiNa to hampihalu, Nopomangkolehimoki i peꞌelena Pueꞌ Ala wute nantolou-louna, hei hinewowoꞌena kolentuꞌanta tene Nopomangkolehi.
15Hei poturuꞌ noniuꞌ i lekiꞌ-lekiꞌna hieꞌe nopokonontomokiki moliu Inohaꞌ Mangkolehi, alaꞌ i lali Suraꞌ Mangkolehi teꞌukiꞌ waheꞌe:
16Notiꞌi Pueꞌ Ala:
“Hieꞌemo dandingKa to wolaꞌ
to hingkiꞌ Kupoꞌuwaꞌ hante iohi i ando to hingkiꞌ dongkaꞌ.
AturangKu hingkiꞌ Kuporia i lalira
hei hingkiꞌ Kuꞌukiꞌ i pekirira.”
17Uko tiꞌo, Notiꞌi woꞌo:
“Dosara hante salaꞌra hamboaꞌmo hingkiꞌ Kuponindi.” (Yer. 31:33, 34)
18Mewaliꞌ, nokomi koteꞌampuninamo dosante hante salaꞌta, hamboaꞌmoki paralu mangkomi popenomba ntaniꞌna to mampohawa dosanta.
Wadiki mangkododungkui Pueꞌ Ala
19Halali-halali! Nokomi raꞌana hi Yesu ikomahina, hamboaꞌmoki paralu morokaꞌ mangkododungkui Pueꞌ Ala i peꞌohaꞌa to mangkolehi mpololeke i suruga, 20alaꞌ hi Yesu mampaꞌanimoki lala to wolaꞌ to mangkomiki pe kosalamaꞌa. Hei lala to Nopaꞌanikiki tiꞌo moliu rindi wida iomo wotaNa hadoduoNa. 21Hi Yesumo to mewali Tadulako Mpenomba Ngkodeꞌte i Tambina Pueꞌ Ala i suruga. 22#Sur. 22:16; 1Kor. 6:11; Eps. 5:26Iomo horiana halali-halali, humeiki mangkododungkui Pueꞌ Ala ka lalinta mpololeke hei ka pepoꞌohinta to hamboaꞌmo bata-bata, alaꞌ lalinta Nopomangkolehimo moliu raꞌaNa hingkeꞌna tobahaꞌ kohawaꞌnamo uwaꞌ komasalaꞌte, hei wotanta niriumo hante uwai to moꞌinoto to mewali tandaꞌ koNopomangkolehinta ka dosanta. 23Hangangaa mepohinaruki nturusi pe hi Yesu, hei inioꞌki morokaꞌ mampangakuꞌ pepohinarunta pe Io, alaꞌ Pueꞌ Ala to nipoꞌohi hei hingkiꞌ mobuhoꞌi dandiNa pe ingkiꞌ. 24Hangangaa momerewahiki hei momepokaroho laliki hingkeꞌna momepokarimaki ka lalinta mpololeke hei mowaliki nturusi hapo to moromiꞌ. 25Inioꞌki mengkoꞌela ka porampua menomba hibali to rowali haꞌumbora toaꞌ. Hangangaa hirampuki menomba hingkeꞌna momepokaroho laliki, pelumbuꞌna tene hinewowoꞌena alaꞌ tobahaꞌ hamboaꞌmo morue Pueꞌ hingkiꞌ mehupaꞌ.
Inioꞌki maꞌoruꞌ ka pepoꞌohinta
26 #
Bil. 15:30; Ibr. 3:12; 6:4-8 Tohori hei tobahaꞌmo Kareba Moromiꞌ to ka Pueꞌ, angkana ane totungkai tene mowali nturusi dosa hamboaꞌmo uwaꞌ popenomba ntaniꞌna to wadi mampohawa dosanta, 27bateꞌna romo pehukua to makaja to mekororokaꞌi i pobutusina Pueꞌ Ala, alaꞌ toaꞌ to meꞌewa pe Io hingkiꞌ Nohuku hante api to makaja mpololeke. 28#Ul. 17:6Hampiha, ane uwaꞌ haduo toaꞌ to molungkaꞌi Aturana hi Musa, hei uwaꞌhi roduo ba tolu duo to mosobiꞌi kotuꞌuna komasalaꞌna, hawaꞌi uwaꞌ ampunine, bateꞌna nihuku mahi. 29Ane toaꞌ to molungkaꞌi Aturana hi Musa rohuku hatoꞌo, pelumbuꞌna tene toaꞌ to mampononaꞌahi AnaꞌNa Pueꞌ Ala, alaꞌ rotiꞌi hawaꞌi uwaꞌ podumbuꞌane raꞌaNa, hantaro raꞌane hi Yesu tiꞌo to mampokononto dandina Pueꞌ Ala hei wadi mampomangkolehihi. Motaloleuꞌmohi Inohaꞌ Mangkolehi to mampaꞌaniki pebarakati. 30#Ul. 32:35; Rm. 12:19Alaꞌ tobahaꞌ Pueꞌ Ala to mantiꞌi:
“Aku to mehawa,
Aku to mehohuku.”
Hei teꞌukiꞌ woꞌo i Suraꞌ Mangkolehi:
“Pueꞌ hingkiꞌ mobutusi kara-karana toaꞌNa.”
31Mewaliꞌ makaja mpololeke komotehuꞌte ane nohukuki Pueꞌ Ala to tuwuꞌ.
32Ikolowoikei hohumbo kotuwuꞌmi uluꞌ-uluꞌna i tempomi mepoꞌohi i Kareba Moromiꞌ. I tempo tiꞌo, norumpamokei woriꞌ komaporiꞌ nokomi petuntumi pe Pueꞌ. Angkana kehapoꞌi hatoꞌo, hawaꞌkei maꞌoruꞌ, bateꞌna maroho nturusi pepoꞌohimi. 33Uwaꞌ konisalaꞌimi hei nipoperima-rimakei i hinarora toaꞌ to woriꞌ; hei uwaꞌ woꞌo komantahami komaporiꞌ moꞌawa hante toaꞌ ntaniꞌna to nipoperima-rima. 34Marima lalimi i toaꞌ to nitarungkuꞌ nokomi petuntura pe Pueꞌ Yesu. Ane niperompoꞌi lumami, hawaꞌi nipohangkodaꞌ. Motanaꞌlukei, alaꞌ ibahaꞌkei koꞌuwaꞌna to nipatimomokikei i suruga to meliu komoromiꞌne hei hawaꞌi mokoꞌukoa.
35Iomo horiana, inioꞌ ipohentekei pepoꞌohimi pe Pueꞌ, alaꞌ ane mepoꞌohikei nturusi, hingkiꞌ kodeꞌ mpololeke howonine to hingkiꞌ ihuakei. 36Kehapoꞌi hapomo to hingkiꞌ mewali, hangangaa itikokei nturusi pepoꞌohimi hei sabaraꞌkei. Ipetuntuikei nturusi peleihane Pueꞌ Ala, hingkeꞌna ihuakei hapo to Nodandikikei. 37Hingkiꞌ tebuhoꞌi Pohawaꞌne Pueꞌ Ala to mantiꞌi:
“Hamboaꞌmo morue Io hingkiꞌ mehupaꞌ hei bateꞌna hingkiꞌ hupaꞌ,
KohupaꞌNa hawaꞌi hingkiꞌ moꞌali-ali.
38Toaꞌ to modame hante Aku
hingkiꞌ pahuahi kosalamaꞌa nokomi pepoꞌohira.
Angkana ane uwaꞌhi to maꞌoruꞌ ka pepoꞌohira,
hawaꞌhi Kupotanaꞌ.” (Hab. 2:3-4)
39Angkana ingkiꞌ hieꞌe, handoꞌioki toaꞌ to maꞌoruꞌ ka pepoꞌohinta hei nihuku. Angkana wae, ingkiꞌ hieꞌe, toaꞌ to motikoki nturusi pepoꞌohinta hei pahua kosalamaꞌa.
Currently Selected:
Ibarani 10: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
