Pewaliana 50
50
Hi Akoꞌ nitawu
1Hi Yusuf motumpopoꞌi umoꞌna, nopeꞌoloni hei noꞌumaꞌ lione umoꞌna. 2Katoꞌo hi Yusuf mohawaꞌ pe hawiꞌ-hawiꞌna to pobahaꞌ morewahi to mahi, hingkeꞌna norewahiꞌi wotalokaꞌne umoꞌna. 3Jama tiꞌo mangka tempo iba mpuluꞌ ando, alaꞌ adaꞌra morewahi to mahi. Toaꞌ toMasiri moꞌomboꞌ hi Akoꞌ, pitu mpuluꞌ ando komoruene.
4Koꞌukonalu tempone omboꞌ notiꞌi hi Yusuf pe hawiꞌ-hawiꞌna datu, “Ipowutekei pepaha hieꞌe pe datu. 5Ikohandoaꞌana tene mahi umoꞌku, norumbaꞌa mosumpa pe io, hingkeꞌna kutawuꞌi i lali petawua to nipatimomo i woiꞌ Kanaꞌa. Iomo horiana kuperapiꞌ hingkeꞌna nolouꞌa duluna motawu umoꞌku. Uko tiꞌo mahuliꞌluꞌa intu humei.”
6Notiꞌi Pirao, “Noloumoko motawu umoꞌmu hibali to idandikiꞌi pe io.”
7Katoꞌo noloumo mpuꞌu hi Yusuf ako motawu umoꞌna. Lekiꞌna topajamana datu, tomotodi-tomotodi i tambina hei lekiꞌna tadulako-tadulako i Masiri, nolouhi moꞌawa-awa hante hi Yusuf. 8Lekiꞌna tinona, halali-halalinahi, hei lekiꞌna tinona umoꞌna nolouhi woꞌo, sangadina oꞌanaꞌ to kokiuꞌ romo hante pinatuwuꞌ to holampi i woiꞌ Gose. 9Surodadu to mokereta hei topenara metuntu woꞌo horiana woriꞌhi mpololeke to metuntu.
10Ikohupaꞌralu i pebolaꞌana to mampelabehiꞌki kina i Goren-Hatad, i hambeiꞌna motoꞌando i uwai Yarade meꞌolahi hanondoiha lalire hei meꞌola mangkoreu. Hi Yusuf moꞌomboꞌ tene pitu ando komoruene. 11Koroꞌokiꞌnalu toKanaꞌa omboꞌ tiꞌo i Goren-Hatad iohi mantiꞌi, “Mepohanondoiha mpololeke omboꞌre toMasiri tiꞌo.” Iomo horiana pebolaꞌa tiꞌo rokokeneꞌi Abel-Misraim. 12Katoꞌo anaꞌnehi hi Akoꞌ mampetuntui peꞌowowili hi Akoꞌ pe iohi. 13Wota lokaꞌna rokomi pe woiꞌ Kanaꞌa nikahi i lali woloꞌ watu Makpela i hambeiꞌ motoꞌando mamre i kineteꞌ to nohili hi Burahima ka hi Epron toaꞌ toHet tiꞌo, mewali petowuara. 14Koꞌukonalu hi Yusuf motawu umoꞌna, io mahuliꞌ pe Masiri moꞌawa-awa hante halali-halalinehi hei lekiꞌna toaꞌ to metuntu io motawu umoꞌna.
Hi Yusuf mampododoli lalina halali-halalinahi
15Ikomahinalu umoꞌre, notiꞌi kokaꞌnehi hi Yusuf, “Hohumbomoki ane rapaꞌna hi Yusuf, mohowoni walianta hampiha to kodake?” 16Iohi mepahamohi pe hi Yusuf waheꞌe, “Ikohandoaꞌana mahi umoꞌte, 17io morumbaꞌka mantiꞌi pe ingko waheꞌe, ‘Iꞌampunikimohi salaꞌ to rowalimo kokaꞌ-kokaꞌmuhi hampiha pe ingko.’ Ingka hieꞌe hawiꞌna Pueꞌ Ala, iomo Pueꞌ to nopenombai umoꞌta, kiperapiꞌ, ampunikimoka salaꞌ to kiwalimo pe ingko.”
Meꞌolamo hi Yusuf i tempona mantorimo pepaha lolita tiꞌo. 18Katoꞌo mehupaꞌ halali-halalinehi melingkotuꞌ i hinarona hei mantiꞌi,
“Ingka hieꞌe hupaꞌka mewali hawiꞌmu.”
19Angkana notiꞌi hi Yusuf pe iohi,
“Inioꞌkei morokaꞌ alaꞌ kuasaꞌku hawaꞌi hibali hante kuasaꞌna Pueꞌ Ala. 20Kehapoꞌi itungkailukei mowali to kodake pe aku, angkana Pueꞌ Ala mowolihi to kodake tiꞌo mewaliꞌ to moromiꞌ, hingkeꞌna ka lekiꞌna to mewalimo hampiha, woriꞌ toaꞌ niposalamaꞌ. 21Inioꞌkei morokaꞌ alaꞌ aku hingkiꞌ mampoganaꞌiꞌa koparaluꞌami hante anaꞌ-anaꞌmi.”
Watoꞌomo hi Yusuf mampododoli lalira hante wiharo to moꞌalusuꞌ, horiana motanaꞌhi.
Komahina hi Yusuf
22Hi Yusuf tontolu meꞌohaꞌ i Masiri hante lekiꞌna halalinahi, io tuwuꞌ wute tinuwuꞌna 110 ntoꞌa. 23Io hampakaꞌlu tene mampoꞌodaꞌ anaꞌna hei oꞌuweꞌna hi Eparai. Hampakaꞌlu tene woꞌo mampoꞌodaꞌ anaꞌna hi makhir, iomo oꞌuweꞌna hi Manase, hibali anaꞌna hadoduona.
24Notiꞌi hi Yusuf pe halali-halalinehi, “Hamboaꞌmo morue hingkiꞌ mahiꞌa, angkana Pueꞌ Ala hingkiꞌ morewahikei hei mangkomikei molai ka woiꞌ hieꞌe, pe woiꞌ to nodandimo Pueꞌ hante sumpa pe tododulunta: hi Burahima, hi Isaki hei hi Akoꞌ.” 25Katoꞌo hi Yusuf morumbaꞌ lekiꞌna halalinehi mosumpa i woiꞌ tiꞌo, “Mosumpamokei pe aku, ane Pueꞌ Ala mangkomikei pe woiꞌ tiꞌo, hangangaa ikomikei wukungka.”
26Katoꞌo mahimo hi Yusuf i Masiri tinuwuꞌna 110 ntoꞌa. Halalinahi morewahi wota lokaꞌna hei rokahi pe lali polotiana.
Currently Selected:
Pewaliana 50: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)