Pewaliana 49
49
Peꞌowilina hi Akoꞌ i koꞌukoana
1Uko tiꞌo nowowoimohi hi Akoꞌ anaꞌnehi notiꞌi, “Morampumokei i hieꞌe, dodungku aku. Kuponobahaꞌikikei hapo to hingkiꞌ ipolalakei i ando to hingkiꞌ nihinoroi. 2O anaꞌ-anaꞌna hi Akoꞌ! Morampumokei hei ipehoromuamokei lolitane hi Saraili umoꞌmi. 3Rube, anaꞌku tokokaꞌ, ingkomo rohongka, ingkomola uluꞌ anaꞌka to nipoꞌanaꞌki i tempoku moleaꞌ tene. Ingko to manobaꞌ hei to maroho ka lekiꞌna anaꞌku. 4Ingko hawaꞌko morii peleihana lalimu, hibaliko uwai to makehiꞌ poꞌiline, horiana hamboaꞌmoko rorekeꞌ to kokokaꞌ, to ropengkoruꞌi alaꞌ ingko turuko moloꞌori hante hantambingku, ikokomaꞌimo koturuangka. 5Hi Simeo hante hi Lewi to mohalali, iohi to mohiaꞌ. 6Hawaꞌi hingkiꞌ kutuntuni butusiare to kodake, hei hawaꞌi woꞌo kupoꞌowoni i lali porampu-rampuara. Alaꞌ nokomi kohirorokoꞌara, merorokoꞌhi, nokomi patampora, motedaꞌhi kolentoꞌna gapiꞌ mampaliꞌ komasanara. 7Buntoꞌmohi, alaꞌ waliara hei alaꞌ komatampora. Hingkiꞌ kupopokaꞌa-kaꞌahi i humanele woiꞌ Saraili, hingkiꞌ kupomobuntelahi ka lumbura lekiꞌ-lekiꞌ tinona hi Akoꞌ. 8Yehuda, ingko hingkiꞌ penaniko ka poniꞌ-poniꞌmu. Halalimuhi hingkiꞌ mamperenakiko, hei hingkiꞌ melingkotuꞌ i hinaromu. 9Hi Yehuda hibali singa to moleaꞌ tene, io morokoꞌ pinatuwuꞌ to hingkiꞌ noꞌoka hei mahuliꞌ pe peꞌohaꞌana, turumo itoꞌo hei hawaꞌi uwaꞌ to podehoꞌ molukeꞌi. 10Hi Yehuda hingkiꞌ motiko laiꞌ kodatua hei makuasaꞌ, muleꞌna hingkiꞌ moparenta nantolou-louna. Toaꞌ malekiꞌ ka kodatua-kodatua hingkiꞌ mangkomi popenomba pe io, hingkiꞌ metoungkaꞌhi hei mengkoruꞌhi i hinarona. 11Alaꞌ nokomi koworiꞌna angoroꞌna i kineteꞌna, anaꞌ kalidena nopekohoiki i karuna, i karu angoroꞌ to moromiꞌ mpololeke. Io mowaheꞌ parewana hante uwai angoroꞌ, angoroꞌ to momeaꞌ hibali raꞌa. 12Alaꞌ nokomi koworiꞌna anggoroꞌ noꞌinu, momeaꞌ matane, hei nihina popuhiꞌ alaꞌ maꞌinu uwai omiꞌna gapiꞌ. 13Hi Sebulo hingkiꞌ meꞌohaꞌ i bota ntahiꞌ. Kapalaꞌ-kapalaꞌ tahiꞌ hingkiꞌ maweo itoꞌo i parailiꞌ woiꞌna wute i kota Sido. 14Hi Isakar hibali hambaꞌa kalide to maroho to molukuꞌ hante tekeꞌana. 15Noꞌele peꞌohaꞌana tiꞌo moromiꞌ loleke, hei manobaꞌ mpuꞌu bolaꞌ tiꞌo, metobungkuꞌmo io nipohumpadai komiana, hei niparuku majama madori hibali hawiꞌ. 16Ingko Dan, hingkiꞌ mohuroniko posisalaꞌna toaꞌ, hei muleꞌmu hingkiꞌ mewalihi hantino. Hibali hante tino ntaniꞌna i woiꞌ Saraili. 17Angkana io hibali hambaꞌa ule to mangawu i hiri lala, hibali ule to moꞌupoꞌ petotiona mobingku pakoꞌna nara, horiana to melambaꞌ hibalingkara. 18O Pueꞌ, kosalamaꞌ to i weikiꞌa, tiꞌo mpuꞌu to kupekau.” Uko tiꞌo notiꞌi womo, 19“Hi Gat hingkiꞌ norompoꞌi to merorompoꞌi, angkana hingkiꞌ irompoꞌihi huliꞌ. 20Aser, woriꞌ kopongkonamu to motomiꞌ-tomiꞌ, iomo to hingkiꞌ i palenaꞌ, ipopolora datu-datu. 21Hi Taliꞌ hibali lagiwa lunaro to melohoꞌ. Manobaꞌ mpuꞌu anaꞌne. 22Hi Yusuf winoro kalide to moleaꞌ. Kalide mpoꞌilo meꞌohaꞌ dodungku i mata uwai, hei mesilai-lai i papina. 23Kehapoꞌi to mepana meꞌewa hei mepodapaꞌ hingkiꞌ mopanaꞌi, 24Angkana meliu tene komarohone korawene hi Yusuf mepopana. Hawaꞌi bata-bata laline. Alaꞌ pepoꞌowonina kuasaꞌna Pueꞌ Alana hi Akoꞌ to morewahi toSaraeli. 25Pueꞌ Alana umoꞌmu to mosulungiko, to makuasaꞌ mobarakatiko hante ura ka laniꞌ, hei uwai ka lali woiꞌ, hei woriꞌ pemuleꞌamu. 26Pebarakatina Pueꞌ Ala to nopenombai umoꞌmu meliu ka komoromiꞌna biri. Hinamo mengkohou lekiꞌna pebarakati tiꞌo, i womboꞌ tutuꞌna hi Yusuf, iomo to niperenaki ntaniꞌ ka halalinahi. 27Hi Benami hibali hulakuꞌ to mohiaꞌ. I mihoꞌoluna io mohokiꞌ to noꞌoka, hei kononewana io modolaꞌ-dolaꞌ to noperompoꞌi.” 28Iomola lekiꞌna toSaraeli, hampuluꞌ merontino ihaꞌne, iomola to notiꞌi umoꞌre pe iohi, i pebarakatina pe iohi, haduo-haduo nobarakatihi.
Hi Akoꞌ mahi
29Katoꞌo meꞌowilimo hi Akoꞌ pe iohi. “Hamboaꞌmo morue hingkiꞌ mahimoꞌa, ane mahiꞌa itawuꞌakei i hirina tododulungku, i lali woloꞌ to i kineteꞌna hi Epron, toHet tiꞌo. 30I lali woloꞌ to i kineteꞌ Mapela i hambeiꞌ motoꞌando Mamre i woiꞌ Kanaꞌa, kineteꞌ to nohili hi Burahima ka hi Epron, toaꞌ toHet tiꞌo, mewali petowua to noꞌompuimo. 31Itoꞌomola nitawuꞌi hi Burahima moꞌawa hi Sara, hantambina, itoꞌomola nitawuꞌi hi Ishak moꞌawa hi Ribka hantambina, hante itoꞌo woꞌo hi Lea kutawuꞌi. 32Kineteꞌ hante woloꞌ to uwaꞌ itoꞌo nihilimo ka toaꞌ toHet. Itawuꞌakei itoꞌo.” 33Ikoꞌukonalu hi Akoꞌ meꞌowili pe anaꞌ-anaꞌnahi, noꞌoruꞌmo kapuꞌne pe womboꞌ koturuana hei turu honiꞌi io mahi.
Currently Selected:
Pewaliana 49: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)