Pewaliana 45
45
Hi Yusuf mampopebahaꞌmo pe halalinahi
1Konohorinalu lolitane hi Yehuda, hawaꞌi nobiaꞌ hi Yusuf morii lalina i hinarona toaꞌ topajamanahi. Katoꞌo norumbaꞌmohi lekiꞌ topajamanehi mesuwu ka peꞌohaꞌa tiꞌo. Horiana hamboaꞌmohi mpuꞌu uwaꞌ to holampi itoꞌo. Katoꞌo noroamo koholangkoa mampopebahaꞌ pe halalinahi. 2Hei hi Yusuf meꞌola mangkureu-reu nopokodeꞌ, wute lekiꞌna toaꞌ toMasiri to uwaꞌ i tambi kodatua pahoriꞌi. Kareba tiꞌo wute woꞌo i kodatua Masiri. 3Notiꞌi hi Yusuf pe halali-halalinahi, “Akumola hi Yusuf. Tuwuꞌlu tene umoꞌte?” Korohorinalu mololita, wuliha mewalihi motehuꞌ, hawaꞌhi pobahaꞌ mehoniꞌ. 4Katoꞌo notiꞌi hi Yusuf pe iohi, “Humeikei i hieꞌe.” Katoꞌo mekododungkumohi pe io honiꞌi notiꞌi, “Akumola hi Yusuf to ipobaluꞌkei pe toMasiri. 5Hinewowoꞌena, inioꞌkei motehuꞌ ba nohohoꞌ lalimi alaꞌ i pobaluꞌakei. Alaꞌ Pueꞌ hadoduona to mangkomiꞌa humei medulu ka ingkei hingkiꞌ mamposalamaꞌ toaꞌ woriꞌ. 6Hinewowoꞌena hongkoꞌ rontoꞌa liu tempo kobiloraha. Limo ntoꞌa tene toaꞌ hawaꞌi maꞌintuꞌ ba mekina. 7Alaꞌ peleihana Pueꞌ Ala mangkomiꞌa medulu ka ingkei wute mewali haꞌanu lala hingkeꞌna noꞌuwaꞌ morewahi hei mampatuwuꞌkei wute i pemuleꞌami. 8Kotuꞌuana handoꞌio nokomi koꞌipobaluꞌkukei hinaꞌ wuteꞌa i hieꞌe, angkana Pueꞌ Ala to mampopewaliꞌa akeleꞌna datu i Masiri, moromiꞌ i tambina Pirao wute lekiꞌna woiꞌ i Masiri. 9Hinewowoꞌena hohiꞌmokei mahuliꞌ nolou pe umoꞌta, hei ipowutekei pe io lekiꞌna lolitangku hieꞌe: akumola hi Yusuf anaꞌmu. Pueꞌ Ala mampaꞌaniꞌa kuasaꞌ i malekiꞌna woiꞌ Masiri, humeimokei hohiꞌ pe aku. 10Umoꞌ hingkiꞌ meꞌohaꞌ i Masiri i woiꞌ Gose. Hingkeꞌna idodungku pe aku hante anaꞌmuhi, oꞌuweꞌmuhi, hei gimba, bekeꞌ, gapiꞌ, hante lekiꞌna lumamu. 11Ane umoꞌ uwaꞌ i roboꞌ Gose, dodungkumoꞌa morewuꞌko. Alaꞌ tempo kobiloraha limo ntoꞌa tene, alaꞌ ane hawaꞌi hatoꞌo umoꞌ hei lekiꞌmi, hingkiꞌ pahua komaporiꞌ to makaja.”
12Notiꞌi womo hi Yusuf, “Hinewowoꞌena iꞌokiꞌmokei hadoduomi, hei ingko woꞌo Benami, koꞌakunamo hi Yusuf. 13Itiꞌiki umoꞌta hohumbo kokodeꞌna kuasaꞌku i Masiri. Ilolitakimo pe io lekiꞌna to iꞌokiꞌmokei hei hohiꞌmokei mampoꞌawa umoꞌta humei i seꞌe.”
14Uko tiꞌo hi Yusuf liu mokopui hineꞌna hi Benami katoꞌo meꞌola. Hi Benami meꞌola woꞌo mokopui hi Yusuf. 15Kolentuꞌana meꞌola hi Yusuf mokopui lekiꞌna halalinahi liu noꞌumaꞌhi lekiꞌra. Uko tiꞌo honiꞌhi momepololitaki.
16Katoꞌo ikonohorinalu Pirao hante topajamana to uwaꞌ i tambi kodatua kareba kohupaꞌna halalina hi Yusuf, motanaꞌhireaꞌ woꞌo. 17Katoꞌo notiꞌi datu pe hi Yusuf, “Irumbaꞌhi halalimahio mopatekeꞌ kina i kalidera hei irumbaꞌmohi mahuliꞌ pe Kanaꞌa. 18Hingkeꞌna rokomimoꞌi umoꞌre hante tinonahi humei. Hingkiꞌ kupaꞌanihi woiꞌ to moromiꞌ i Masiri, hingkeꞌna nomoromiꞌ kotuwuꞌre i woiꞌ hieꞌe. 19Irumbaꞌmohi woꞌo mangkomi kereta kaseꞌe bahaꞌumbo kereta to hingkiꞌ mangkomi hantambira hei anaꞌ-anaꞌra to kokiuꞌ, hante to mangkomi umoꞌra. 20Bilaꞌmohi mampekiri parewa to ropolihi i Kanaꞌa, alaꞌ lekiꞌna to moromiꞌ i Masiri hingkiꞌ mewaliꞌ dolaꞌra.”
21Anaꞌna hi Akoꞌ mampetuntuimohi hapo to notiꞌi datu. Hi Yusuf mampaꞌanihi haꞌumbo onu kereta, hintotoꞌ hante to notiꞌi datu, hei bakura i patengkaꞌara. 22Nipaꞌanihi woꞌo parewa to maranga haduo-haduo, angkana hi Benami nipaꞌani doiꞌ peraꞌ tolu natu hante parewa limo mpasa. 23Nopokatu pe umoꞌna hampuluꞌ mbaꞌa kalide laki to nipopangkomi parewa to moromiꞌ ka woiꞌ Masiri, hei hampuluꞌ mbaꞌa kalide lunaro to mangkomi kina, depa hante pangka ntaniꞌna to rowali bakura matengkaꞌ humei pe Masiri. 24Katoꞌo nopopewotumohi halalinehi, notiꞌikihi, “Anioꞌkei moheꞌero i lala.”
25Molaimohi ka Masiri Mahuliꞌ pe Kanaꞌa peꞌohaꞌana hi Akoꞌ umoꞌra. 26Ropowutemo pe umoꞌra rotiꞌi, “Umoꞌ tuwuꞌluwora tene hi Yusuf! Io mewali to makuasaꞌ i lekiꞌna woiꞌ Masiri!” Konohorinalu umoꞌra kareba tiꞌo, menondoꞌlu, alaꞌ hawaꞌi nopoꞌohi hapo to rotiꞌi.
27Angkana korololitanalu lekiꞌna hapo to notiꞌi hi Yusuf pe iohi hante ikonoꞌokiꞌnalu kereta to nopakatu hi Yusuf to hingkiꞌ mangkomihi pe Masiri, hongkoꞌ maroho laline. 28“Anaꞌku hi Yusuf tuwuꞌlu tene! Horiana dokoꞌa nolou mampeꞌeleꞌi ikohandoaꞌangku tene mahi.”
Currently Selected:
Pewaliana 45: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
