Pewaliana 44
44
Paꞌinuana hi Yusuf to moholi
1Hi Yusuf mohowoꞌi tadulako to mampoꞌodaꞌ tambina, notiꞌi, “Iꞌohiimokei karuꞌre hante kina hukaꞌna pebiaꞌra mangkomi. Hei doiꞌra haduo-haduo ikahikihi mahuliꞌ i karuꞌra, iporia i womboꞌ kina to ikahi i karuꞌra. 2Hei paꞌinuangku to niwali ka peraꞌ ikahiki i lali karuꞌna tohinoneeꞌ, moꞌawa hante doiꞌ popehilina kina.” Toporewahi tambina motuntuni hapo to notiꞌi hi Yusuf. 3Poꞌonina mehoꞌolu-olu, halalina hi Yusuf nopopewotumohi, molai hante kalidera. 4Iohi handoaꞌhi moꞌela ka kota tiꞌo. Hi Yusuf mantiꞌi pe topeꞌohaꞌna, “Nolouko idapaꞌhi, ane ihuahi, ipetiꞌiki pe iohi, mahamporeꞌi hinaꞌ komoromiꞌa ihowonikei hante kokodakea? 5Haporeꞌi hinaꞌ inakokei paꞌinua peraꞌ tonopaꞌinui tua, hante to nopakeꞌ mampebaꞌu? Ingkei mampaliꞌ-paliꞌlukei salaꞌ ngkodeꞌ.”
6Konodongkeꞌnalu toporewahi tambina gubenuruꞌ halaline hi Yusuf, nopowutekimohi mpuꞌu hibobali hante pantiꞌina hi Yusuf. 7Mehoniꞌhi, “Hapo tungkaihama tua? Hawaꞌka wurani mowali walia to kodake hibali tiꞌo 8Ibahaꞌlu tua, hingkohoweꞌ doiꞌ to kihua i lali karuꞌ to uwaꞌ i womboꞌ kina hampiha, kipopahuliꞌlu woꞌo. Hapo tene hingkiꞌ mangkomika peraꞌ ba bulawa ka tambina tuamu. 9Ane nihuaꞌi haduo ka lumbu-lumbungki to moroa luma tiꞌo, aginamo io mahi hei lekiꞌ-lekiꞌki mewalimoka hawiꞌna datu.”
10Notiꞌi to nirumbaꞌ tiꞌo “Moromiꞌ rahimo, ane hihimo to nihua morodiꞌ paꞌinua tiꞌo, bateꞌna mpuꞌu io mewali hawiꞌku, to hantenaꞌna mahuliꞌmolu.” 11Rohohiꞌi mampohou komiara hei roꞌuweꞌmo karure hori-hori. 12Katoꞌo to mampoꞌodaꞌ tambina hi Yusuf noparesaꞌmo mpuꞌu karune to kokokaꞌ wute i karuꞌna tohinoneeꞌ, hei mombaha mpuꞌu paꞌinua tiꞌo nohua i karuꞌna hi Benami. 13Kokaꞌ-kokaꞌnahi maporiꞌ mpuꞌu rohori lalire, horiana mohepaꞌ-hepaꞌhi baduꞌra, uko tiꞌo mohumboꞌakimohi komiara pe kalide, hei mahuliꞌmohi pe kota peꞌohaꞌana hi Yusuf.
14Ikohupaꞌralu hi Yehuda hampohalalia i tambina hi Yusuf, rohualu tene hi Yusuf i tambina. Katoꞌo melingkotuꞌhi i kapuꞌna hi Yusuf menomba. 15Notiꞌi hi Yusuf, “Mahamporeꞌi hinaꞌ hatoꞌo waliamio? Hawaꞌkei ibahaꞌ koꞌakuna to makuasaꞌ hei pobahaꞌ mampelao, mampeꞌele walia toaꞌ to kodake?”
16Uko tiꞌo hi Yehuda mantiꞌi, “Haporeꞌi tene to kitiꞌi pe tuaki, ingka hawaꞌka himpehoniꞌ hei motundu wotangki. Pueꞌ Ala mampomombahamo komasalaꞌki. Lekiꞌ-lekiꞌki, mewalimoka hawiꞌmu, hawaꞌi podo to nipahuahilu paꞌinua tiꞌo.”
17Angkana notiꞌi hi Yusuf, “Hawaꞌi hatoꞌo, tungkaihangka, hihimo to kupahuahi paꞌinua tiꞌo, iomo to kupohawiꞌo. To hantenaꞌna mahuliꞌmolu pe umoꞌmi.”
Hi Yehuda mamperorui hi Benami
18Uko tiꞌo hi Yehuda mekododungku pe hi Yusuf noperapiꞌ, hei notiꞌi, “Ane moromiꞌi hingkiꞌ mololitaꞌa pe tua, hawaꞌakae ipokoiꞌ tua, alaꞌ ingko hibobali koniꞌadaꞌima hante Pirao. 19Tua hampiha iteneika, ‘Ba uwaꞌluꞌi tene umoꞌki hei halalingki ntaniꞌna?’ 20Mehoniꞌka, ‘Umoꞌki uwaꞌlu tene, i tempona memolo hineeꞌki umbiꞌ motodimo umoꞌkio. Kokaꞌna hineeꞌki to haꞌinoꞌ-inoꞌhi mahimo, mewaliꞌ, hadoduo romo to tuwuꞌo, iomo hinaꞌ nopotundeꞌ umoꞌki.’ 21Katoꞌo tua morumbaꞌka mampoꞌawaꞌi humei, hingkeꞌna iꞌokiꞌi 22katoꞌo mehoniꞌka, ‘Anaꞌ tiꞌo hawaꞌi mpuꞌu hupeꞌ mampokaꞌaki umoꞌna, alaꞌ ane nopokaꞌakiꞌi umoꞌna hingkiꞌ mahi.’ 23Angkana itiꞌi womo tua, ‘Hawaꞌkei wadi mehinaro, ane hawaꞌkei ipoꞌawa hineeꞌmio humei.’ 24Kohupaꞌkilu i umoꞌki kipowutekimo mpuꞌu lolitama tuaki. 25Katoꞌo norumbaꞌ womoka umoꞌki humei mehili kopongkonangki. 26Katoꞌo mehoniꞌ womoka, ‘Ingka hawaꞌka hiniꞌ nolou, alaꞌ ingka hawaꞌka wadi mehinaro pe gubenuruꞌ ane hineeꞌki tohinoneeꞌ hawaꞌi kipoꞌawa, hiniꞌluka nolou ane hineeꞌki noloulu woꞌo metuntu.’ 27Notiꞌi umoꞌki, ‘Ibahaꞌlukei hantambika hi Raheli, roduolu anaꞌne. 28To kokokaꞌ moruemo molai ka aku, wora intu mahimo nohokiꞌ pinatuwuꞌ to meꞌoꞌoka horiana wute hinewowoꞌena hamboaꞌmo ka mehupaꞌ-hupaꞌ. 29Ane iroa womokei hineeꞌmi ka aku hei ane uwaꞌ mewali hapo-hapo pe io, kohanondoiha to ipopehupaꞌkei pe aku tiꞌo hingkiꞌ mampomahiꞌa, alaꞌ aku hieꞌe motodimoꞌa.’”
30-31“Ala tiꞌo tuaku,” Notiꞌi hi Yehuda pe hi Yusuf, “Ane mahuliꞌka pe umoꞌki, hawaꞌi kikomi hineeꞌki mahuliꞌ bateꞌna nopomahi umoꞌki. Alaꞌ pampekirina umoꞌki medokiꞌ i anaꞌna iomo hineꞌki hieꞌe, umoꞌki hawaꞌi nobiaꞌ tuwuꞌ mokaꞌa hante anaꞌna tohinoneeꞌ alaꞌ motodimoꞌi mpuꞌu. Horiana kohanondoiha to kipopehupaꞌ pe io hingkiꞌ mampoꞌuwaꞌ komahiana. 32Modandimoꞌa i umoꞌki, kutiꞌi pe umoꞌki ane hawaꞌi kukomi anaꞌ tiꞌo mahuliꞌ, aku hingkiꞌ mampotumba i kotuwuꞌku wuteꞌa mahi. 33Kuperapiꞌ pe ingko tua! Aginamo aku to ipohawiꞌno, mampohawa anaꞌ tiꞌo, hingkeꞌna io mahuliꞌlu moꞌawa hante kokaꞌ-kokaꞌnahi. 34Hawaꞌi kudehoꞌ mahuliꞌ pe umoꞌki, liaꞌ hawaꞌi kupokohori mampeꞌele komaporiꞌ to merumpa i powotana umoꞌki, ane hineeꞌki hawaꞌi kipoꞌawa mahuliꞌ.”
Currently Selected:
Pewaliana 44: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
