Pewaliana 42
42
Kokaꞌ-kokaꞌna hi Yusuf mehili kina pe Masiri
1Ikonohorinalu hi Akoꞌ koꞌuwaꞌna kina i Masiri, notiꞌi pe anaꞌnehi, “Mahamporeꞌito hinaꞌ lebaꞌ-lebaꞌlukei? 2Kuhorimo koꞌuwaꞌna kina i Masiri, noloumokei mehili kina hingkeꞌna hawaꞌki mahi bilora.” 3Katoꞌo noloumohi mpuꞌu hampuluꞌ duo kokaꞌne hi Yusuf tiꞌo ako mehili kina i Masiri. 4Angkana hi Akoꞌ hawaꞌi mampoliu hi Benami hineeꞌ hampemomolona hi Yusuf nolou metuntu iohi, alaꞌ io morokaꞌ nioꞌ-nioꞌna intu uwaꞌ kohorewuꞌ mewali pe anaꞌna tiꞌo.
5Alaꞌ kobilora i woiꞌ Kanaꞌa, iomo horiana toaꞌ ntaniꞌna woꞌo moꞌawa-awa hante anaꞌna hi Akoꞌ, mehupaꞌhi mehili kina i Masiri. 6To mampobaluꞌ kina pe toaꞌ mampopiha iomo hi Yusuf, akeleꞌna datu i woiꞌ Masiri. Toaꞌ mehupaꞌ ka humalele duniaꞌ ako mehili kopongkona, io horiana kokaꞌ-kokanehi hi Yusuf hupaꞌhi hei menomba i hinarona. 7Ikonoꞌokiꞌnalu hi Yusuf kokaꞌ-kokanehio, liu nobahaꞌhi, angkana io hantoniꞌ hawaꞌi nobahaꞌ kohalalina. Io meꞌitano pe iohi hante wiharo to mohiu “Ingkei to ka hapokei?”
Mehoniꞌhi, “Ingka toaꞌ toKanaꞌa humeika mehili kopongkonangki.”
8Kehapohi nobahaꞌ hi Yusuf kokaꞌ-kokaꞌnehio, angkana io hawaꞌi robahaꞌ. 9Katoꞌo io mangkolowoi pepoturuꞌna noniuꞌ halalinehi hei io mantiꞌi, “Ingkei hieꞌe humei mekamomata, hupaꞌkei humei mampeꞌele i imbo kolembeꞌangkio i woiꞌki hieꞌe.”
10Halalinehi mehoniꞌ, “Hawaꞌi tua.” “Ingka hawiꞌ-hawiꞌmu hupaꞌka mehili kopongkonangki. 11Ingka hieꞌe hampohalaliaka, ingka toaꞌ to moromiꞌluka handoꞌioka mata-mata.”
12Angkana notiꞌi hi Yusuf pe iohi “Wutimi! Ingkei hieꞌe mehupaꞌkei humei hingkiꞌ mampeꞌele i umbo komoledeꞌ hei kolembeꞌangki i woiꞌ hieꞌe.”
13Katoꞌo rotiꞌi, “Ingka hieꞌe hampuluꞌ meroduoka mohalali, ingka anaꞌna haduo umoꞌ i woiꞌ Kanaꞌa. Haduo ka ingka mahimo hei tohinoneeꞌ uwaꞌlu moꞌawa umoꞌki.”
14Mehoniꞌ hi Yusuf, “Umbiꞌ tuꞌu hibali pantiꞌiku, ingkei hieꞌe hupaꞌ humei mekaamata, 15hingkiꞌ kupampeꞌeleikei, aku mosumpaꞌa i lali konaꞌna datu, ingkei hawaꞌkei hingkiꞌ molai ka woiꞌ hieꞌe, ane hineeꞌmi tohinoneeꞌ tiꞌo hawaꞌi hupaꞌ humei. 16Haduo ka ingkei hangangaa mahuliꞌ moroaꞌi, to hantenaꞌna hingkiꞌ kutaha wute to itiꞌikei kuꞌokiꞌ. Ane hawaꞌi, i lali konaꞌna datu, mata-matakei mpuꞌu!” 17Katoꞌo iohi nipopekahimohi pe lali tarungkuꞌ tolu ando komoruene.
18Ikotolu andona notiꞌi hi Yusuf pe iohi, “Aku toaꞌ to motehuꞌ hei to mengkoruꞌ pe Pueꞌ Ala, ingkei hingkiꞌ kuposalamaꞌ hante halangkaꞌ lala. 19Hingkeꞌna notongawa ingkei hieꞌe toaꞌ to mononto, haduo ka ingkei hingkiꞌ nitaha i petarungkuꞌa, to hantenaꞌna wadilu mahuliꞌ mangkomi kina to ihilikei hingkeꞌna halalimuhi hawaꞌi bilora. 20Katoꞌo ingkei hangangaa ipoꞌawakei humei hineeꞌmi tohinoneeꞌ pe aku. Io intu to mewali kotongawane hapo to itiꞌikei hei hawaꞌkei hingkiꞌ nihuku mahi.” Ropetuntuimo mpuꞌu hapo to notiꞌi gubenuruꞌ.
21Katoꞌo mololitamohi haduo hei haduo, “Eleko, ingkiꞌ hinewowoꞌena nihukuki, alaꞌ salaꞌta to towali hampiha pe hineeꞌta, io merapiꞌ rima, merapiꞌ mpololeke angkana ingkiꞌ hawaꞌki hiniꞌ moꞌoreꞌi, kehapoꞌi toꞌokiꞌ komaporiꞌne iomo horiana hinewowoꞌena hinaꞌ pahuaki komaporiꞌ.”
22Notiꞌi hi Rube, “Hareꞌi ka kutiꞌi hampiha pe ingkei hingkeꞌna anaꞌ tiꞌo anioꞌ nipahampo-hampoꞌi? Angkana hawaꞌkei mampehoromua. Hinewowoꞌena komahine nihowonimo pe ingkiꞌ.” 23Hi Yusuf nobahaꞌ palaihane wiharora, angkana iohi hawaꞌi robahaꞌ kohapona to notiꞌi hi Yusuf, alaꞌ ane iohi mowiharo hante hi Yusuf, mopakeꞌhi haduo toaꞌ to pobahaꞌ molimba wiharo. 24Hi Yusuf mekahi pe kamaraꞌ ako meꞌola. Hi Yusuf mahuliꞌ nodiaꞌ womo mololita pe iohi, katoꞌo moroa hi Simeo ka lumbura hei noperumbaꞌki nihiluꞌ i hinarora lekiꞌna halalina.
Kokaꞌ-kokaꞌna hi Yusuf mahuliꞌhi pe Kanaꞌa
25Hi Yusuf mohawaꞌ hingkeꞌna lekiꞌna karuꞌra niꞌohii kina, hei doiꞌra hori-hori nikahi mahuliꞌ pe lali karuꞌra, hante nipaꞌanihi woꞌo bakura i lala. Hawaꞌna tiꞌo nipetuntui. 26Uko tiꞌo kokaꞌnehi mohumboꞌakimo komiara pe womboꞌ kalide iomo kina to rohili, hei molaimohi. 27Katoꞌo i kohaminiara, haduo ka iohi moꞌuweꞌ pehiluꞌna karuꞌ kina, mampaꞌani mangka kalidena. Katoꞌo nohua doiꞌ i womboꞌ kina tiꞌo. 28Notiꞌi pe halalinahi, Elekei, doiꞌku nipopahuliꞌ! Kuhua i lali karuꞌku!” Ropohele hei morokaꞌhi katoꞌo mometenei-teneihi, “Haporeꞌito to nowalikiki Pueꞌ Ala pe ingkiꞌ?”
29Kohupaꞌra i Kanaꞌa, liu rololita pe umoꞌra lekiꞌna to mewali pe iohi rotiꞌi, 30“Gubenuruꞌ mowiharo pe ingka mohiu, mokamorokika hante noraiꞌka momatai-matai kota tiꞌo. 31Angkana kitiꞌi pe io, ingka toaꞌ to moromiꞌluka haꞌioka to momatai-matai kotami. 32Ingka lekiꞌki hampuluꞌ meroduoka mohalali haꞌoꞌumoꞌka, haduo hineeꞌki hamboaꞌmo uwaꞌ, angkana tohinoneeꞌ hinewoꞌena uwaꞌlu mampoꞌawa umoꞌki i Kanaꞌa.”
33Katoꞌo gubenuruꞌ tiꞌo mantiꞌi pe ingka, “Hingkiꞌ kupampeꞌeleikei ane umbiꞌ to moromiꞌkei, haduo ka ingkei hangangaa holampi, to hantenaꞌna mahuliꞌmo mangkomi kina pe tinomi to kolentuꞌana norumpa kobiloraha 34Ikomikei humei halalimi tohinoneeꞌ tiꞌo honiꞌi intu kubahaꞌ kohandoꞌiomi mata-mata, angkana toaꞌ to moromiꞌlukei, honiꞌiwae intu halalimi to kutaha tiꞌo kupopahuliꞌmo pe ingkei hei ingkei wadimolukei meꞌohaꞌ i hieꞌe hei holangkokei mampaliꞌ kototuwuꞌami.”
35Katoꞌo i temporamo mobobo karuꞌra, hori-horihi pahua dompeꞌ to moꞌohi doiꞌ, katoꞌo pedeꞌ morokaꞌ lekemohi, hatoꞌo woꞌo umoꞌra. 36Katoꞌo notiꞌi umoꞌre, “Ingkeilato pongkane horiana nokomoholiiꞌa anaꞌku, hi Yusuf hamboaꞌmo uwaꞌ, hi Simeo woꞌo hamboaꞌmo uwaꞌ hei hinewoꞌena hingkiꞌ irodiꞌ womokei hi Benami, liukamorahi kohanondoihangka hei maporiꞌ kuhori!”
37Katoꞌo notiꞌi hi Rube pe umoꞌna, “Anaꞌku roduo tomaꞌani hawaꞌi mahampo irokoꞌ ane hawaꞌi kukomi mahuliꞌ hi Benamino pe ingko, pohinarukimoꞌa pe aku hei io bateꞌna kukomi mahuliꞌ pe ingko.”
38Angkana notiꞌi hi Akoꞌ, “Inioꞌ! Hi Benami hawaꞌi wadi ikomi, kokaꞌna mahimo hei io romo to uwaꞌ hinewowoꞌena. Nioꞌ-nioꞌ intu io pahua komarugiꞌ i patengkaꞌami tiꞌo, aku hieꞌe motodimoꞌa, hingkiꞌ motambai womokei kohanondoihangku tiꞌo to hingkiꞌ mampomahiꞌa.”
Currently Selected:
Pewaliana 42: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
