3 Yohanes 1
1
1Halalingku Gaiu to kupokarima. Suraꞌ hieꞌe ka aku, pinatua. 2Halalingku! Mekokaeꞌa hingkeꞌna moromiꞌ-romiꞌko i lali hapo-hapolu to iwali. Kubahaꞌmo komoromiꞌne lalimu, hei kuperapiꞌ hingkeꞌna moromiꞌ-romiꞌ woꞌo kotuwuꞌma.
3Motanaꞌ mpuꞌu lalingka, alaꞌ uwaꞌ haꞌumbora duo halali hampepoꞌohinte to mehupaꞌ iseꞌe mampowute kareba noniuꞌ ingko, rotiꞌi, ipetuntui nturusi poturuꞌ to tuꞌu, hei waliamu motuntuni woꞌo poturuꞌ tiꞌo. 4Makaja mpololeke komotanaꞌka ane kuhoriꞌi kareba anaꞌ-anaꞌku mampetuntui nturusi poturuꞌ to tuꞌu.
Hi Yohanes mamperenaki hi Gaiu
5Halalingku! Mombahamo nipoꞌohiko alaꞌ mosulungimoko nturusi halali hampepoꞌohinta, kehapohi handoaꞌhi ibahaꞌ. 6Uwaꞌhi to humei iseꞌe mampowute i hinarona jumaꞌa noniuꞌ komarimamu pe halali hampepoꞌohinta. Mewaliꞌ, kupohinaru hingkiꞌ isulungihi nturusi hei ipopewotuhi moromiꞌ hingkeꞌna robiaꞌ mampololiu jamara. Iomo to mampomotanaꞌ Pueꞌ Ala. 7Halalinta tiꞌo mampopatengkaꞌhi jamana Pueꞌ Yesu. Hei hawaꞌhi hiniꞌ mantorimo hapo-hapo ka toaꞌ to hawaꞌhi mepoꞌohi pe Pueꞌ. 8Io horiana, masipatoꞌ mpololeke ane tosulungihi, alaꞌ ane towaliꞌi hatoꞌo, palaihana majamaki moꞌawa-awa i lali pajamara mampowute kareba to tuꞌu.
Hi Dioterepe hante hi Demeteriu
9Uwaꞌ halangkaꞌ suraꞌ to kupokatu pe jumaꞌa to itoꞌo. Angkana hi Dioterepe, mampaliꞌ konaꞌ dokoꞌ mewali tadulako jumaꞌa hei io hawaꞌi mampehoromua lolitangku. 10Io horiana, ane mehupaꞌa hantudoꞌ, hingkiꞌ kupokonontokiko waliane to kodake. Nosalaꞌika nturusi, angkana hawaꞌi tuꞌu pesalaꞌine. Hei handoꞌio tiꞌolu to nowali. Ane halalinta to mampowute Kareba Moromiꞌ holampihi i bolaꞌmi, hawaꞌhi notorimo, hei noꞌopihi woꞌo toaꞌ to rolei mantorimo. Hei himolu to mantorimo to mangkomi kareba, nopopesuwuhi ka jumaꞌa.
11Halalingku! Anioꞌko mampetuntui hapo to kodake, angkana ipetuntuimo hapo to moromiꞌ. Toaꞌ to mowali romiꞌ, anaꞌnahi Pueꞌ Ala. Toaꞌ to mowali dake, hawaꞌhi pobahaꞌ Pueꞌ Ala.
12Ane hi Demeteriu, roperenaki lekiꞌ-lekiꞌna toaꞌ, hei masipatoꞌ mpololeke niperenaki, alaꞌ waliana motuntuni poturuꞌ to tuꞌu. Waliana hi Demeteriu, kiperenaki woꞌo, hei ibahaꞌ kotuꞌuna pepokodeꞌki.
Koꞌukoana lolita
13Woriꞌ tene to kukodokoꞌi kupowutekiko, angkana hawaꞌa hiniꞌ moꞌukiꞌ lekiꞌ-lekiꞌna i lali suraꞌ hieꞌe. 14Alaꞌ kupohinaru hamboaꞌi morue hingkiꞌ mohidupaꞌ womoki, hingkeꞌna uwaꞌ tempote mololita moꞌawa-awa.
15Mekokaeꞌa hingkeꞌna pahuako Romiꞌ Ngkotuwuꞌ. Tabea ka lekiꞌ-lekiꞌna awamu iseꞌe. Ipowute tabeangka pe lekiꞌ-lekiꞌna awangku haduo hei haduo.
Currently Selected:
3 Yohanes 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)