2 Yohanes 1
1
1Suraꞌ hieꞌe to ka aku pinatua, kupokatu pe Inoꞌ to noꞌuwiꞌ Pueꞌ Ala, hante lekiꞌ-lekiꞌra anaꞌmu to kupokarima mpololeke. Handoꞌio akulu to mampokarimakei, angkana lekiꞌ-lekiꞌra woꞌo toaꞌ to pobahaꞌ poturuꞌ to tuꞌu mampokarimakei. 2Kupokarimakei alaꞌ mampoꞌohikei poturuꞌ to tuꞌu, hei poturuꞌ to tuꞌu tiꞌo topoꞌilali wute nantolou-louna.
3Pueꞌ Ala umoꞌta, hante Yesu Kerisitu AnaꞌNa mobarakatiki ka kopopuhiꞌna laliNa, mampatidoꞌkiki rimaNa, hei mampaꞌaniki Romiꞌ Ngkotuwuꞌ. Lekiꞌ-lekiꞌna tiꞌo totorimo hante lali to mononto hei lali to marima.
Hangangaa momepokarimaki
4Motanaꞌ mpololeke lalingka alaꞌ kupohidupaꞌkimohi haꞌumbora duo anaꞌma iseꞌe, hei waliara motuntuni poturuꞌ to tuꞌu, hibali to nohowoꞌikiki Pueꞌ Ala Umoꞌta. 5Mewaliꞌ, kuperapiꞌ pe ingko Inoꞌ, hingkeꞌna momepokarimaki haduo hei haduo. To kuꞌukiꞌ hieꞌe, handoꞌio hawaꞌ to wolaꞌ, angkana hawaꞌ hieꞌe iomo hawaꞌ to tohorimo mepongka ka uluꞌ-uluꞌna. 6Hieꞌemola palaihane rima, iomo mampetuntuiki hawaꞌna Pueꞌ Ala. Hei hawaꞌna hieꞌe ihorimokei mepongka ka uluꞌ-uluꞌna, hangangaa momepokarimaki.
Hangangaa majaga-jagaki i toaꞌ to mampowute poturuꞌ to salaꞌ
7I humanele duniaꞌ woriꞌ topeꞌakalai to mampowute poturuꞌ to mepowewoꞌ. Hawaꞌhi mampoꞌohi kohiYesuna Datu to Mamposalamaꞌ to mewali manusiaꞌ. Toaꞌ to hatoꞌo, to peꞌakokalai hante poniꞌna Kerisitu. 8Iomo horiana majaga-jagakei, alaꞌ ane ipohentekei pepoꞌohimi pe Pueꞌ Yesu, hawaꞌi uwaꞌ dumbuꞌne pajamangki mampowute Kareba Moromiꞌ pe ingkei. Hangangaa mepoꞌohikei nturusi pe Pueꞌ, hingkeꞌna i ando pobutusiNa hingkiꞌ ihuakei lekiꞌ-lekiꞌne howonina pepoꞌohimi.
9Lekiꞌ-lekiꞌna toaꞌ to mekoꞌela ka poturuꞌ to tuꞌu hei hawaꞌhi motuntuni poturuꞌna Kerisitu, toaꞌ tiꞌo hawaꞌhi mohintuwuꞌ hante Pueꞌ Ala. Toaꞌ to motuntuni nturusi poturuꞌna Kerisitu, iomohi to mohintuwuꞌ hante Pueꞌ Ala Umoꞌta, hei hi Yesu anaꞌNa. 10Io horiana, ane uwaꞌ haduo topeꞌakalai to mehupaꞌ i porampuami to mampowute poturuꞌ to mosisalaꞌ hante poturuꞌ hieꞌe, inioꞌhi nipoliu mekahi i lali tambimi. Howeꞌ nikamorokihi inioꞌ. 11Alaꞌ hihimo to mokamorokihi, hibalimo hante mosulungihi woꞌo i lali jamara to kodake tiꞌo.
Koꞌukoana lolita
12Woriꞌ tene to kukodokoꞌi kupowutekikei, angkana hawaꞌi kulei moꞌukiꞌ lekiꞌ-lekiꞌna i lali suraꞌ hieꞌe. Alaꞌ tungkaihangku hingkiꞌ akokei kukadoroꞌi, hei lekiꞌ-lekiꞌna tiꞌo hingkiꞌ kupowutekikei, hingkeꞌna makaja komotanaꞌte.
13Halalimu towoweꞌe iseꞌe to noꞌuwiꞌ woꞌo Pueꞌ Ala, anaꞌnahi mopakatuhi tabea pe ingkei.
Currently Selected:
2 Yohanes 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
