2 Timotius 3
3
Waliana manusiaꞌ i koꞌukoana duniaꞌ
1Ibahaꞌkei alaꞌ i ando-ando koꞌukoana hingkiꞌ mehupaꞌ tempo to maporiꞌ. 2Manusiaꞌ hingkiꞌ mampokarima wotana hadoduona hei hingki' mewali hawiꞌna doiꞌ. Iohi hingkiꞌ mampokokodeꞌ, mepononaꞌahi, hingkiꞌ mampomehoniꞌki tomotodi hei hawaꞌhi pobahaꞌ moꞌawerasiꞌ, hawaꞌi uwaꞌ pepoꞌohire, 3hawaꞌhi marima, hei hawaꞌhi mohintuwuꞌ. Poko mampometebaꞌ-tebaꞌhi lolita, hawaꞌi robiaꞌ morii peleihana lalira, kabobuneꞌa hante hawaꞌi rolei hapolu to moromiꞌ. 4Dokoꞌhi metaloleuꞌ, mampokokodeꞌ hei hawaꞌhi mampekiri ngkurauꞌ. Ropotanaꞌ tene koduniaꞌa ntina motuntuni peleihana Pueꞌ Ala. 5Kehapohi mampopatengkaꞌ pamingura angkana kotuꞌuane hingkenaꞌlu noꞌokiꞌhi toaꞌ. To kotuꞌuana hawaꞌi roꞌokui kuasaꞌne Pueꞌ mowolihi pekiri. Walia to watoꞌo Ikoꞌelai! 6Alaꞌ i lumbura, uwaꞌhi toaꞌ to mampowute pepoturuꞌ to salaꞌ mekahi pe tambi-tambi, hante mampokonawuꞌhi towoweꞌe to mololihaꞌhi nikeloi. Madori rohori alaꞌ dosara, hei motuntuniluhi peleihana lalira. 7Kehapoꞌi dokoꞌhi towoweꞌe tiꞌo nipoturuꞌ, angkana hawaꞌhi hampiha pobahaꞌ poturuꞌ to maniuꞌ ka Pueꞌ Ala. 8Hibali hi Yane hante hi Ambereꞌ to moꞌewa hi Musa hampiha, hatoꞌolu woꞌo toaꞌ-toaꞌ tiꞌohi to meꞌewa poturuꞌ ka Pueꞌ Ala. Pekirira hamboaꞌi mononto, pepoꞌohira tetuhumo hante hamboaꞌi maniuꞌ. 9Tuꞌu morasiꞌhi angkana hawaꞌi uwaꞌ pelaworoane, alaꞌ kobebera hingkiꞌ nobahaꞌ lekiꞌna toaꞌ, hibali to norumpamo hi Yane hante hi Ambereꞌ.
Pepoꞌohi maroho i lali pehohongkeꞌ hei i lali pobasa Boo Mangkolehi
10Angkana ingko Timotius, alaꞌ moruemoko kupoꞌawa, ipetuntuimo mpuꞌu poturuꞌka, waliangku hei tungkaihana lalingku. Hei ipetuntuimo woꞌo pepoꞌohingka, kosabaraꞌku, komarimangku, hei morii i lali komaporiꞌ. 11Ibahaꞌmo konipopoꞌioꞌiongka horiana manasaꞌa. Ibahaꞌlu lekiꞌna to mewali pe aku i Antokia, i Ikonium, hei i Listra, hei ibahaꞌmo lekiꞌ to kupomaporiꞌ! Angkana Pueꞌ mamposalamaꞌa ka lekiꞌna tiꞌo. 12Tuꞌu lekiꞌna toaꞌ to dokoꞌ tuwuꞌ menomba pe Yesu Kerisitu hingkiꞌ nipoperima-rima. 13Angkana toaꞌ to kodake waliana hei poꞌakala hingkiꞌ tetambai kokodakere, metobebeahi hei hingkiꞌ nitobobeahi woꞌo. 14Angkana noniuꞌ ingko Timotius, hangangaa metatikoko i poturuꞌ-poturuꞌ to maniuꞌ to nipoturuꞌkimoko pe ingko hei to ipoꞌohi mpololeke alaꞌ iponindi hihimo guru to mampoturuꞌko. 15Ikolowoi mepongka kokiuꞌko tene, ingko pobahaꞌmoko Boo Mangkolehi to mepaꞌani pekiri pe ingko hei mangkomiko pe kosalamaꞌa, alaꞌ pepoꞌohi pe Yesu Kerisitu. 16Lekiꞌ-lekiꞌna to teꞌukiꞌ i lali Boo Mangkolehi, niꞌukiꞌ hintotoꞌ hante kuasaꞌ Inohaꞌ Mangkolehi, modumbuꞌ i ingkiꞌ, hingkeꞌna tobahaꞌ pepoturuꞌ to tuꞌu, tobahaꞌ woꞌo hapo to salaꞌ, tokoꞌelai walia to kodake, hei tobahaꞌ lala to mampokononto walianta pe to moromiꞌ. 17Moliu i Boo Mangkolehi, lekiꞌna toaꞌ to mampopatengkaꞌ jamana Pueꞌ Ala, Nopoganaꞌimo hingkeꞌna mowalihi lekiꞌna walia to moromiꞌ.
Currently Selected:
2 Timotius 3: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
