2 Timotius 2
2
Yesu Kerisitu mewali pandiri'
1Mewaliꞌ, Timotius, anaꞌku! Ipokaroho mpololeke lalima ka roho to tohua ka hi Yesu Kerisitu motuntuni rima ngkotuwuꞌ to ka Pueꞌ Ala. 2Hampiha itorimomo lekiꞌ-lekiꞌne poturuꞌku, hei woriꞌ woꞌo toaꞌ to mosobiꞌi hante mampehoromua poturuꞌku tiꞌo. Mewaliꞌ, pepoturuꞌ tiꞌo hangangaa ipowutekihi woꞌo pe toaꞌ-toaꞌ to nipoꞌohi hei to mapande hingkeꞌna mopaguruhi woꞌo toaꞌ ntaniꞌna. 3-4Hangangaa timomoko woꞌo morii komaporiꞌ moꞌawa hante ingka, nokomi pajamamu pe hi Yesu Kerisitu. Toaꞌ to morii komaporiꞌ alaꞌ mampopatengkaꞌi jamana Pueꞌ, wadi nipandiriꞌ hibali haduo surodadu to moromiꞌ. Hei hawaꞌi woꞌo mamponindi urusiana hadoduona, alaꞌ nolei mampomotanaꞌ lalina tadulakona. 5Watoꞌo woꞌo toaꞌ to mampopatengkaꞌ jamana Pueꞌ wadi nipandiriꞌ hibali haduo toposilumba. Io hangangaa motuntuni atura-atura, alaꞌ ane hawaꞌi notuntuni, hawaꞌi hingkiꞌ pahua harona. 6Hei toaꞌ to mampopatengkaꞌ jamana Pueꞌ wadi nipandiriꞌ hibali haduo topokineteꞌ. Ane modotoꞌi majama, bateꞌna io to uluꞌ-uluꞌna mangka wuaꞌ pajamana. 7Ipoꞌilali poturuꞌka hieꞌe, alaꞌ Pueꞌ hingkiꞌ mampokononto lalimu hingkeꞌna ibahaꞌi lekiꞌ-lekiꞌne tiꞌo.
8Iponindi, Yesu Kerisitu iomo muleꞌna Datu Daudi, hei Io to tuwuꞌ huliꞌ ka komahia. Iomo ohine Kareba Moromiꞌ to kupowute. 9Nokomi kokupowutena Kareba Moromiꞌ, iomo hinaꞌ kuhua komaporiꞌ, wuteꞌa nitarungkuꞌ hibali haduo toaꞌ to kodake waliana. Angkana Boona Pueꞌ Ala hawaꞌi tetaha. 10Iomo hinaꞌ kubiaꞌ morii lekiꞌ-lekiꞌne komaporiꞌ hieꞌe hante sabaraꞌ, hei tontonalu kupekarebaiki Boone Pueꞌ Ala, hingkeꞌna toaꞌ to Noꞌuwiꞌ hingkiꞌ pahua kotuwuꞌ to wolaꞌ hei komanobaꞌ, to hawaꞌi mokoꞌukoa, moliu i Yesu Kerisitu. 11Tuꞌu mpuꞌu lolita hieꞌe to mantiꞌi:
Ane mahiki moꞌawa-awa hante Io,
hingkiꞌ tuwuꞌki woꞌo moꞌawa-awa hante Io.
12Ane sabaraꞌki metuntu Io, hei morii komaporiꞌ,
hingkiꞌ moparentaki woꞌo moꞌawa-awa hante Io.
Ane tosapuakaꞌI,
Io Woꞌo hingkiꞌ mosapuakaki.
13Ane hawaꞌki tungkuꞌ pe Io,
Io tontona tungkuꞌ,
alaꞌ Io hawaꞌi wadi mosapuaka wotana hadoduoNa.
Hangangaa moromiꞌ pambiarama ane mewaliko topajamana Pueꞌ Ala
14Timotius! Lekiꞌ-lekiꞌna to kutiꞌi hieꞌe hangangaa ipekolowoiki woꞌo pe toaꞌ ntaniꞌna. Ipaꞌanihi poturuꞌ i hinarona Pueꞌ Ala hingkeꞌna inioꞌhi mampomehoniꞌ-honiꞌi noniuꞌ ipolangkaꞌ-langkaꞌana pepoturuꞌ agamanta. Alaꞌ pomehoniꞌ tiꞌo hawaꞌi modumbuꞌ i lali kotuwuꞌta, angkana mampomodangkeleꞌilu pepoꞌohira toaꞌ to mampehoromua. 15Angkana ingko, Timotius, ipowute pepoturuꞌ to tuꞌu-tuꞌuna. Ipokaroho mpuꞌu jama tiꞌo, hingkeꞌna hawaꞌko mohili. Ane iwaliꞌi hatoꞌo, Pueꞌ Ala hingkiꞌ motanaꞌ alaꞌ pajamamu hei Norekeꞌko hibali topajamaNa to moromiꞌ. 16Anioꞌko moꞌawa hante toaꞌ to mampowute lolita to hawaꞌi modumbuꞌ. Alaꞌ pepoturuꞌra tiꞌo hawaꞌi mangkomi toaꞌ i kotuwuꞌ to manobaꞌ, angkana mangkomihi moꞌela ka Pueꞌ Ala. 17Poturuꞌ to kodake tiꞌo hibali hakiꞌ to menele. Hi Himeneu hante hi Filetu, iohi woꞌo to mampowute pepoturuꞌ to kodake. 18Mepoturuꞌhi to hawaꞌi tuꞌu rotiꞌi: liumo tempone Pueꞌ Ala mampopeꞌaro toaꞌ ka komahia. Poturuꞌ tiꞌo mampowuli toaꞌhi horiana pepoꞌohira mokero. 19Angkana Pueꞌ moꞌaro jumaꞌaNa hibali mampopahura tambi i wombo' pahura to maroho hei i womboꞌna teꞌukiꞌ waheꞌe,
“Nobahaꞌ Pueꞌ hihimolu to Noꞌompui”
Hei
“hihimolu to mantiꞌi konaꞌNa,
io hangangaa mampolihi walia to kodake.”
20I lali tambina tosugiꞌ woriꞌ langkaꞌ parewa i rapu to ka bulawa hei ka peraꞌ, hei uwaꞌ woꞌo ka loti hante woiꞌ. To moromiꞌ, ropakeꞌ ikohupaꞌna tolori to rotorimo, to hawaꞌi moromiꞌ, ropakeꞌ ando-andona. 21Ane toaꞌ mampomangkolehi wotana ka to kodake, toaꞌ tiꞌo nipakeꞌ ikoparaluꞌa to moromiꞌ, io noꞌuwiꞌ tumpu tambi alaꞌ moromiꞌi nipopodumbuꞌ ijama to moromiꞌ. 22Anioꞌko mampetuntui peleihana lalina toaꞌ to moleaꞌlu tene, iwalimo to mononto, komanondo, komarima hei podame moꞌawa-awa hante iohi to meꞌoꞌando pe Pueꞌ i lali kopopuhiꞌ lalira. 23Anioꞌko mampekahi pomehoniꞌ-honiꞌna toaꞌ to hawaꞌhi pobahaꞌ hapo-hapo hei hawaꞌi modumbuꞌ. Ibahaꞌlukei lekiꞌna tiꞌo mampopehupaꞌ poheꞌero-eroa. 24Iana woꞌo haduo hawiꞌna Pueꞌ hawaꞌi wadi moheꞌero, hangangaa moromiꞌ pe lekiꞌna toaꞌ, hei mapande mampoturuꞌ toaꞌ hante sabaraꞌ. 25Hawiꞌna Pueꞌ hangangaa moꞌalusuꞌ mampoturuꞌ toaꞌ to meꞌewa, woi-woina Pueꞌ Ala mampaꞌaniꞌi koholangkoa pe toaꞌ-toaꞌ tiꞌo hingkeꞌna ropengkatobaꞌ ka dosa-dosara hante pobahaꞌhi poturuꞌ to moromiꞌ. 26Alana lalire tepohente ka kuasaꞌna Belisiꞌ to mokeloihi hei to mohiluꞌhi motuntuni peleihana.
Currently Selected:
2 Timotius 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
