2 Korintus 12
12
Hi Paulu mampowute hapo to nopetidoꞌki Pueꞌ
1Kotuꞌuana, hawaꞌi uwaꞌ dumbuꞌne ane mamperenakiꞌa wotangku hadoduongku, angkana kehapoꞌi hatoꞌo, hangangaa kupololita noniuꞌ i hapo to nopokonontokiꞌa moliu i peponoꞌokiꞌi ka Pueꞌ. 2Hampuluꞌ iba ntoꞌa to liu uwaꞌ haduo toSarani to niꞌoreꞌ nolou pe suruga to i womboꞌ-womboꞌ mpololeke, koꞌuwaꞌana Pueꞌ Ala.#12:2 I lali wiharo Yunani: suruga to katolu. Hawaꞌi kubahaꞌ ba wotaneꞌi mpuꞌu to niꞌoreꞌ, ba pahualuꞌi peponoꞌokiꞌi, angkana Pueꞌ Ala to pobahaꞌ. 3-4To kubahaꞌ mpololeke, niꞌoreꞌ nolou pe peꞌohaꞌa to meliu komoromiꞌne to nikokeneꞌi Paradesi.#12:3 Paradesi I lali podandia to wolaꞌ, Paradesi palaihana peꞌohaꞌa to moromiꞌ mpololeke, hibali Kineteꞌ Paradesi to ropeꞌohaꞌi hi Adama hante hi hawa hampiha (basa Pwl. 2:8-10). Ane mahimohi toaꞌ to mepoꞌohi pe Pueꞌ, inohaꞌra nolou meꞌohaꞌ pe Paradesi (basa Luk. 23:43). Uwaꞌ guru agama to mantiꞌi Paradesi tiꞌo, hibali hante suruga (basa 2Kor. 12:2-4). I lali suraꞌ peponoꞌokiꞌ, Yohanes pangkiꞌ lentena suruga hibali mpuꞌu Kineteꞌ Paradesi. Hampiha tene kutiꞌi, hawaꞌi kubahaꞌ ba niꞌoreꞌi mpuꞌu, ba peponoꞌokiꞌiluꞌi pe aku. Pueꞌ Ala to pobahaꞌ. Kolentuꞌana i tanti, nohori lolita to moromiꞌ mpololeke, to hawaꞌi hohumbo nipokononto hante wiharo manusiaꞌ, hei to hawaꞌi wadi notiꞌi-tiꞌi toaꞌ. 5Kotuꞌuana, masipatoꞌ toaꞌ tiꞌo kuperenaki handoꞌio wotangku to kuperenaki, angkana ane mamperenakiꞌa wotangku hadoduongku komoledeꞌkulu to kuperenaki. 6Kotuꞌuana, ane kekukodokoꞌi mamperenaki wotangku hadoduongku, hawaꞌa hibali tobebe, alaꞌ hawaꞌa mowuti. Angkana hawaꞌi kuwali hatoꞌo, hingkeꞌna hawaꞌi uwaꞌ to mamperenakiꞌa. Ane uwaꞌ toaꞌ to mangkodokoꞌi mamperenakiꞌa, agina roperenakiꞌa motuntuni hapo to roꞌokiꞌ i waliangku hei rohori i lolitangku.
7Mewaliꞌ, hingkeꞌna hawaꞌa mampokokodeꞌ alaꞌ lekiꞌ-lekiꞌna to notidoꞌkiꞌa Pueꞌ Ala moliu i peponoꞌokiꞌi, iomo horiana Nopaꞌaniꞌa komaporiꞌ. Komaporiꞌ tiꞌo wadi nipandiriꞌ hibali rui i wotangku ba hibali haduo rumbaꞌana Belisiꞌ to mehupaꞌ pe aku mampoperima-rimaꞌa, hingkeꞌna hawaꞌa mampokokodeꞌ. 8Tolu mpihamo kuperapiꞌ pe Pueꞌ hingkeꞌna Nopohenteꞌa ka komaporiꞌ to mosalemporiꞌa tiꞌo. 9Angkana Notiꞌikiꞌa, “Kupokarimaluko, tiꞌo maganaꞌmo alaꞌ hingkiꞌ Kupomombaha kuasaꞌKa moliu komoledeꞌmu.” Iomo horiana motanaꞌa mpololeke mamperenaki lekiꞌna komoledeꞌku, hingkeꞌna kuasaꞌna Kerisitu mombaha moliu kotuwuꞌku. 10#Plp. 4:11; 1Tim. 6:6-8Mewaliꞌ, ane moledeꞌa, kupotanaꞌ mpololeke. Motanaꞌa ane nisalaꞌiꞌa ba nipoperima-rima, ba pahuaꞌa komasusa hante komaporiꞌ alaꞌ petuntuku pe Kerisitu. Alaꞌ ane moledeꞌa, i tempo tiꞌo, marohoꞌa alaꞌ Kerisitu to mosulungiꞌa.
Masusa laline hi Paulu mampekiri waliara toKorintus
11Hingkonia mamperenakiꞌa wotangku hadoduongku hibali haduo tobebe, angkana hapo to kuwali tiꞌo, hangangaa kuwali nokomi koꞌingkeina. Tempoku ropononaꞌa kotuꞌuana, keꞌingkeimowae to hangangaa mamperenakiꞌa. Aku hieꞌe handoꞌioꞌa hapo-hapo, angkana hawaꞌa i wowoiꞌ ka suro-suro to rotiꞌi toaꞌ meliu komoromiꞌne to mamperenakiluhi konaꞌra hadoduora. 12#1Kor. 9:1-2Kolintuꞌaku tene moꞌawa hante ingkei, kuwali mpuꞌu tandaꞌ-tandaꞌ kuasaꞌ to mampotongawa koꞌakuna surone Pueꞌ Yesu. Majamaꞌa nturusi i lali komaporiꞌ, mowaliꞌa tandaꞌ-tandaꞌ kuasaꞌ to mepohele nokomi kuasaꞌ to kutorimo ka Pueꞌ Ala. 13Halali-halali, ba itiꞌikeireꞌi handoaꞌi tene ganaꞌ pajamangka i lumbumi? Pajamangku pe ingkei hawaꞌi uwaꞌ poꞌoriane hante pajamangku i jumaꞌa-jumaꞌa to ntaniꞌna. Halangkaꞌlu poꞌoriane, hawaꞌkei kupomasusa hante hapo to kuparaluꞌi. Ba paraluꞌi kuperapiꞌ ampu pe ingkei alaꞌ komasalaꞌku tiꞌo? Hawaꞌi!
14Hingkeꞌna ibahaꞌkei, hingkiꞌ nolouꞌa mokadoroꞌikei ikotolu mpihana, hei hawaꞌi hingkiꞌ kuperapiꞌ ba hapolu ka ingkei. Handoꞌio lumami to kupaliꞌ, angkana to kupaliꞌ, hingkeꞌna marimakei pe aku. Alaꞌ handoꞌio oꞌanaꞌ to mampaliꞌ pangkane tomotodira, angkana tomotodira wae to mampaliꞌ pangkane anaꞌra. 15Mewaliꞌ, lekiꞌna to uwaꞌ i aku hingkiꞌ kupoposulingikei. Hingkoweꞌ wotangku, ane kehohumboꞌi, hingkiꞌ kupaꞌanikei woꞌo. Mewaliꞌ ane kodeꞌ komarimangku pe ingkei, mahamporeꞌi hinaꞌ makuraꞌ rimami pe aku?
16Ibahaꞌkei halali-halali, hawaꞌkei kahampiha kupomaporiꞌ. Angkana uwaꞌhi toaꞌ to mosalaꞌiꞌa. Rotiꞌi kuꞌakalaikei. Rotiꞌi pahuaꞌa rasiꞌ ka ingkei alaꞌ powutingku. Tiꞌo hawaꞌi tuꞌu! 17Uwaꞌhireꞌi toaꞌ to kurumbaꞌ nolou pe ingkei to moꞌakalaikei hingkeꞌna pahuaꞌa rasiꞌ? Hawaꞌi uwaꞌ! 18Hampiha kuperapiꞌ hingkeꞌna hi Titus nolou mololoꞌokei, hei uwaꞌ woꞌo haduo halalinte to kurumbaꞌ mampoꞌowoniꞌi. Ba i tempo tiꞌo hi Titus moꞌakalaikei hingkeꞌna nopahua rasiꞌ? Ibahaꞌkei mpololeke halali-halali, hi Titus hante aku hampekokirika.
19Inioꞌ wae ipekirikei lekiꞌ-lekiꞌna to kiꞌukiꞌ hieꞌe, hingkeꞌna mototunduluka wotangki. Halali-halali lekiꞌ-lekiꞌna to kiꞌukiꞌ i suraꞌ hieꞌe, kiꞌukiꞌ hingkeꞌna mampomaroho pepoꞌohimi. Mantiꞌika hatoꞌo pe ingkei nokomi pohintuwuꞌki hante Kerisitu, hei Pueꞌ Ala to mosobiꞌi hapo to kipowute. 20To kukomomaꞌa, ane hupaꞌa pe ingkei, hingkiꞌ kuhua waliami to hawaꞌi hintotoꞌ hante hapo to kupohinaru hei ingkei woꞌo hingkiꞌ pahua waliangku to hawaꞌi hintotoꞌ hante to ipohinarukei. To kukomomaꞌa: inioꞌna intu kuhuakei kolentuꞌami mosisalaꞌ hante momepohiriꞌi, momekobukotai haduo hei haduo, mampohimpodululukei peleihami hadoduomi, mampeꞌoꞌuwaꞌ lolita, mohohunu lalina hangko awami, mampokokodeꞌ hei mowali pohihoa. 21Hei to kukorokaꞌ woꞌo, ikohupaꞌangku pe ingkei, Pueꞌ Ala Pueꞌku hingkiꞌ mampokohiliꞌa i hinaromi, hei hingkiꞌ meꞌolaꞌa alaꞌ woriꞌ toaꞌ i lumbumi handoaꞌhi tene mengkatobaꞌ ka dosara, pebualosira hei waliara ntaniꞌna to mekokomaꞌi.
Currently Selected:
2 Korintus 12: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
