2 Korintus 11
11
Hi Paulu mampopangkolowoi toKorintus hingkeꞌna inioꞌhi motuntuni guru-guru agama to mampowute poturuꞌ to salaꞌ
1Mewaliꞌ halali-halali, kuperapiꞌ hingkeꞌna sabaraꞌkei mampehoromua lolitangku, kehapoꞌa mololita hibali tobebe. Angkana umbiꞌ sabaraꞌmokei mpuꞌu pe aku. 2#Hos. 2:19-20; Yoh. 3:29; Wah. 19:7Mohiriꞌa alaꞌ uwaꞌhi toaꞌ to mangkodokoꞌi moroakei ka Kerisitu. Angkana komohiriꞌku hieꞌe hintotoꞌ hante peleihana Pueꞌ Ala,#11:2 komohiriꞌku hieꞌe motuntuni peleihana Pueꞌ Ala Notiꞌi Pueꞌ Ala, ane mengkoruꞌki pe to ntaniꞌna, hibali hante mebualosiki (basa Yer. 5:7). Basa woꞌo Kel. 20:5; Ul. 4:24, 5:9, 6:14, 15, 32:16, 21; Yos. 24:19-20; Mas. 79:5; Yeh. 39:25. alaꞌ akumo to ulu-uluꞌne mangkomikei mepoꞌohi pe Kerisitu, hibalikei anaꞌntowowalo#11:2 anaꞌntowowalo Basa Eps. 5:27. to hingkiꞌ nipohamoko hante haduo tomaꞌani, hei tomaꞌani tiꞌo iomo Kerisitu. 3Angkana kuperapiꞌ hingkeꞌna hawaꞌkei nipokonawuꞌ, koꞌukoana hamboaꞌmo ka lalimi mepoꞌohi pe Kerisitu. Hibali ule hampiha to mokeloi hi Hawa hante lolitana to meꞌakokalai. 4Kutiꞌi hatoꞌo alaꞌ motanaꞌkei mantorimo toaꞌ to hupaꞌ, to mampoturuꞌkei salaꞌ noniuꞌ i hi Yesu, hei poturuꞌra mosisalaꞌ hante hapo to kipoturuꞌkimokei. Mahamporeꞌi hinaꞌ ileikei mampehoromua lolitare? Ba ileikeireꞌi mantorimo inohaꞌ ntaniꞌna#11:4 inohaꞌ ntaniꞌna To notungkai: tokodake ba lomoa to mobagiuꞌ toaꞌ hingkeꞌna hawaꞌhi mepoꞌohi pe hi Yesu. to mosisalaꞌ hante Inohaꞌ Mangkolehi to itorimomokei? Ba ileikeireꞌi mantorimo poturuꞌ to mosisalaꞌ hante Kareba Moromiꞌ to ipoꞌohimokei? 5Toaꞌ to mepoturuꞌ hatoꞌo rotiꞌi, “Suro to meliu komoromiꞌre”, angkana kupekiri aku hawaꞌa woꞌo i wowoiꞌ ka iohi. 6Kehapoꞌi hawaꞌa mapande mololita, angkana kubahaꞌ mpololeke poturuꞌ to tuꞌu. Hei poturuꞌ tiꞌo ihorikei hei iꞌokiꞌmokei mpuꞌu i lekiꞌna waliangki i lumbumi.
Hi Paulu hawaꞌi merapiꞌ harona kolentuꞌana majama
7I tempoku mampowute Kareba Moromiꞌ pe ingkei hampiha, hawaꞌa merapiꞌ harongku pe ingkei kehapoꞌi hangkiuꞌlu. Mengkaꞌiwowoiꞌa hei majamaꞌa hante korawengku#11:7 majamaꞌa hante korawengku Jamana hi Paulu mowali tenda hante parewa ntaniꞌna ka koliꞌ pinatuwuꞌ ba wida. Basa Suro 18:3. Basa woꞌo Sur. 20:34; 1Kor. 4:12; 2Tes. 3:8. hingkeꞌna kupowute kareba to mangkomi pebarakati pe ingkei. Ba masalaꞌa halali-halali, alaꞌ hawaꞌa merapiꞌ harongku pe ingkei? 8Kolentuꞌaku tene i kotami hampiha, jumaꞌa-jumaꞌa to uwaꞌhi i bolaꞌ ntaniꞌna mampokatuhi doiꞌ pe aku. Wadi kutiꞌi: iohi wae to kupokarugiꞌ, alaꞌ doiꞌra kupakeꞌ i lali pajamangku mampowute Kareba Moromiꞌ pe ingkei. 9I tempo tiꞌo, uwaꞌ woꞌo komakuraꞌka, angkana hawaꞌkei kupomaporiꞌ, alaꞌ uwaꞌhi halalinte to mehupaꞌ ka woiꞌ Makedonia mangkomi doiꞌ to mampoganai hapo to kuparaluꞌi. Kupaliꞌ nturusi lala, hingkeꞌna hawaꞌkei kupomaporiꞌ, hei tiꞌo to hingkiꞌ kuwali nturusi. 10Tuꞌu mpololeke hapo to kutiꞌi hieꞌe, hibali kotuꞌuna lolitana Kerisitu iomo, motanaꞌ lalingka alaꞌ hawaꞌa merapiꞌ harongku pe ingkei ba pe hihimolu to meꞌohaꞌ i woiꞌ Akaia. Komotanaꞌna lalingku hieꞌe hawaꞌi hingkiꞌ tewolihi. 11Mahamporeꞌi hinaꞌ mololitaꞌa hatoꞌo? Ba itiꞌikei hawaꞌkei kupokarima, halali-halali? Pueꞌ Ala pobahaꞌ komarimana lalingku pe ingkei.
12Hapo to kuwali tiꞌo, hingkiꞌ kuwali nturusi. Hawaꞌa hingkiꞌ merapiꞌ harongku pe ingkei hibali toaꞌ ntaniꞌna to merapiꞌ harora, hingkeꞌna hawaꞌhi wadi mampokokodeꞌ mantiꞌi hibobali pajamangki. 13Toaꞌ to hatoꞌo, iomohi suro to mepomonawuꞌ alaꞌ mebagiuꞌhi. Iohi majamahi i lumbumi hei rotiꞌi koꞌiora surone Kerisitu, hantaro mowutihi! 14Waliara tiꞌo hampoliꞌmo topowuli, alaꞌ motuntunihi waliana Belisiꞌ#11:14 Belisiꞌ Basa hapo to teꞌukiꞌ i 2Kor. 6:15. to mowolihi wotana mewali hibali haduo malaꞌeka to mewanta. 15Iomo horiana hampoliꞌmo nipowuli ane topajamana Belisiꞌ mohobiꞌi waliara to kodake, hingkeꞌna niꞌokiꞌhi hibali hante topajamana Pueꞌ Ala. Angkana koꞌukoana, hingkiꞌ pahuahi howonina to hintotoꞌ hante waliara.
Hi Paulu mampotongawa koꞌiona surone Pueꞌ Yesu
16Mewaliꞌ, hibali to kutiꞌi hingkeꞌenia, kuperapiꞌ hingkeꞌna nipehoromua mpololeke lolitangka, kehapoꞌi mololitaꞌa hibali tobebe. Inioꞌ ipekirikei aku hieꞌe to bebeꞌa, angkana ane uwaꞌkei tene to mantiꞌi aku hieꞌe to bebeꞌa, sabaraꞌkei dulu hampaiꞌ, hingkeꞌna wadiꞌa mamperenaki wotangku hadoduongku. 17Kotuꞌuana, lolitangku hieꞌe hawaꞌi motuntuni parentana Pueꞌ Ala, angkana mololitaꞌa hibali toaꞌ tobebe, alaꞌ kuperenaki wotangka hadoduongku. 18Woriꞌ toaꞌ mampokokodeꞌ noniuꞌ kotuwuꞌra i duniaꞌ hieꞌe. Mewaliꞌ hinewowoꞌena hingkiꞌ kuwali woꞌo hatoꞌo. 19Itiꞌikei koꞌingkeina to mapande, angkana ipotanaꞌkei mpololeke poturuꞌre toaꞌ tobebe! 20Ane uwaꞌhi guru to mampohawiꞌkei, nitorimohi ngkoromiꞌ. Ane uwaꞌhi to mampomonawuꞌkei ba mobagiuꞌkei, nitorimohi woꞌo. Ane uwaꞌhi to mampokokodeꞌ ba motampelekei, iriilukei. 21Ba itiꞌikeireꞌi hingkiꞌ mohiliꞌa alaꞌ hawaꞌka podehoꞌ mampetuntui waliara tiꞌo?
Angkana ane podehoꞌhi mamperenaki wotara hadoduora, aku woꞌo podehoꞌluꞌa mamperenaki wotangku hadoduongku. (Iponindikei, mololitaꞌa hibali tobebe.) 22Mamperenakihi koꞌiora toIbarani, aku woꞌo toIbaraniluꞌa! Mamperenakihi koꞌiora toSaraeli,#11:22 toSaraeli toIbarani, toSaraeli hante toYahudi hibali lekiꞌna. aku toSaraililuꞌa woꞌo. Mamperenakihi koꞌiora muleꞌne hi Burahima, aku woꞌo muleꞌnaluꞌa hi Burahima. 23Mamperenakihi koꞌiora topajamane Kerisitu, Peꞌoꞌuwaꞌna tene aku ka iohi! (Pololitangku hieꞌe hibali toaꞌ to magila.) Podotoꞌa tene majama hintina iohi. Wori' mpihaꞌa nitarungkuꞌ,#11:23 Wori' mpihaꞌa nitarungkuꞌ Basa Sur. 16:22, 23. woriꞌ mpihaꞌa nipoperima-rima makaja,#11:23 woriꞌ mpihaꞌa nipoperima-rima makaja Basa Sur. 16:22. hei woriꞌ mpihaꞌa woꞌo hingkiꞌ mahi.#11:23 woriꞌ woꞌo mpihaꞌa hingkiꞌ mahi Basa Sur. 14:19. 24Limo mpihamoꞌa rohuku toYahudihi; tolu mpuluꞌ hio mpihamoꞌa nikondo.#11:24 rohuku toYahudihi; nikondoꞌa 39 mpihana Palaihana hi Paulu mengkoruꞌ tene pe pehukura toYahudi. Basa Ul. 25:1-3. 25Tolu mpihaꞌa woꞌo rohuku toRomahi, robambaꞌa hante laiꞌ.#11:25 robambaꞌa hante laiꞌ Basa Sur. 16:22. Hampihamoꞌa rowatuiꞌa toaꞌ to mangkodokoꞌi morokaꞌa.#11:25 rowatuiꞌa Basa Sur. 14:19. Tolu mpihamo kapalaꞌ tahiꞌ to kupehindeꞌi mentoriꞌ, hei#11:25 mentori' tonotungkai hi Paulu iseꞌe, hawaꞌi teꞌukiꞌ i hawaꞌna Pueꞌ. Tempona kapalaꞌna hingkiꞌ marugiꞌ i Malta (basa Sur. 27:27-44), mewali uko hi Paulu moꞌukiꞌ suraꞌ hieꞌe. hampihaꞌa mekononangko i tahiꞌ hamini haꞌando. 26I lali patengkaꞌangku, woriꞌ mpihaꞌa morumpa komaporiꞌ: kolentuꞌangku mewute noliuꞌa uwai, rorompoꞌiꞌa toperorompoꞌi, ropoperima-rimaꞌa toYahudihi, ropoperima-rimaꞌa toaꞌ to handoꞌio toYahudihi. Norumpaꞌa kohorewuꞌ i lali kota. Norumpaꞌa kohorewuꞌ i popada. Norumpaꞌa kohorewuꞌ i womboꞌ tahiꞌ. Norumpaꞌa woꞌo kohorewuꞌ ka toaꞌ to mantiꞌi koꞌiora halali hampepoꞌohingku, angkana kotuꞌuana hawaꞌi! 27I lali pampopatengkaꞌku jamana Pueꞌ, mawongkoꞌa alaꞌ majamaꞌa madori. Woriꞌ mpiha hawaꞌa hohumbo leꞌo, biloraꞌa hei mangkumaroꞌa. Woriꞌ mpiha hawaꞌi uwaꞌ pangkaku, hoholeꞌa hei hawaꞌi ganaꞌ baduꞌka.
28Peꞌoꞌuwaꞌna tene katoꞌo, to kupomaporiꞌ, ando-ando mampekiriꞌa hohumbo kotuwuꞌre toSarani i jumaꞌa-jumaꞌa. 29Ane uwaꞌhi halali hampepoꞌohingku to masusa lalire alaꞌ komoledeꞌna pepoꞌohira, masusa woꞌo lalingka. Ane uwaꞌhi to nipokonawuꞌ i lali dosa, bukotaꞌa pe toaꞌ to mepomonawuꞌ.
30 #
2Kor. 12:10
Ane hangangaa mamperenakiꞌa wotangku hadoduongku, mamperenakiꞌa noniuꞌ i komoledeꞌku. 31Lekiꞌ-lekiꞌna to kutiꞌi hingkeꞌenia, tuꞌu lekiꞌna, hawaꞌa mowuti. Pueꞌ Ala, Umoꞌna Pueꞌ Yesu, Iomo sabiꞌka! Topokodeꞌmo wute nantolou-louna! 32I tempoku uwaꞌ i kota Damasi, gubenuruꞌ to noparilangkaꞌ Datu Areta morumbaꞌ surodaduna mampoꞌodaꞌ wambaꞌ bente kota hingkeꞌna rohokiꞌa. 33#Sur. 9:23-25Angkana nosulungiꞌa awangkuhi. Rokahiꞌa i lali koranda hei roꞌuluꞌa pe howali moliu i salewaꞌ bente kota, iomo horiana himpolohoꞌa.
Currently Selected:
2 Korintus 11: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
