1 Timotius 3
3
Poturuꞌ pe hawiꞌna Pueꞌ i jumaꞌa
1Tuꞌu mpuꞌu lolita to mantiꞌi waheꞌe, “Toaꞌ to dokoꞌhi mewali hawiꞌna Pueꞌ, mangkodokoꞌi jama to moromiꞌ.” 2Iomo hinaꞌ haduo hawiꞌna Pueꞌ i jumaꞌa hangangaa to hawaꞌi uwaꞌ komasalaꞌane, haduolu hantambine, hei nobiaꞌ morii peleihana lalina to kodake, topobahaꞌ mampekiri moromiꞌ hei poꞌadaꞌ, nolei nokorampui toaꞌ hei pobahaꞌ mepoturuꞌ. 3Hawaꞌi lolonua ba poko mosisalaꞌ, to moꞌalusuꞌ pambiarane, to mohintuwuꞌ hante toaꞌ, hei to hawaꞌi padodoiꞌa. 4Hangangaa nobahaꞌ morewahi toaꞌ to meꞌohaꞌ i lali tambina, hei nobahaꞌ mampoturuꞌ anaꞌna hingkeꞌna ropengkoruꞌ pe io. 5Alaꞌ ane uwaꞌ haduo toaꞌ to hawaꞌi nobahaꞌ moꞌatoroꞌ toaꞌ i lali tambina, toa' tiꞌo hawaꞌi woꞌo nobiaꞌ moꞌatoroꞌ jumaꞌana Pueꞌ Ala. 6Ane uwaꞌ toaꞌ to handoaꞌi tene morue mepoꞌohi pe Pueꞌ Yesu, io handoaꞌi tene masipatoꞌ nihini mewali hawiꞌna Pueꞌ i jumaꞌana toSarani, hingkeꞌna hawaꞌi mampokokodeꞌ, horiana pahua pehuku hibali to nihukukihi Belisiꞌ. 7Kololiuhana, haduo toaꞌ to mewali hawiꞌna Pueꞌ i jumaꞌa hangangaa hawaꞌi uwaꞌ konunuꞌ pe io i pampeꞌelena to handoꞌiohi toSarani hantaro romoꞌi nipangkowiwiꞌi, hei monawuꞌ pe kuasaꞌna Belisiꞌ.
Poturuꞌ pe Samas
8Haduo tadulakona toSarani hibobali woꞌo hante hawiꞌna Pueꞌ i jumaꞌa, hangangaa toaꞌ to moromiꞌ waliana hei to hawaꞌi merodaꞌa lilaꞌne. Tota lolonua hante hawaꞌi padodoiꞌa. 9Hangangaa mantorimohi pepoturuꞌ to nopomombahamo Pueꞌ Ala, hei motuntunihi mpuꞌu pepoturuꞌ tiꞌo ka kopopuhiꞌna lalira. 10Ane uwaꞌi haduo toaꞌ to mangkodokoꞌi mewali tadulakona toSarani, hangangaa nipomoꞌoꞌele dulu waliane, hei ane hawaꞌi uwaꞌ salaꞌne, masipatoꞌmo nihini mewali tadulakona toSarani.
11Watoꞌo woꞌo hantambira, hangangaa to moromiꞌ waliare, handoꞌio to mampometebaꞌ-tebaꞌ lolita. Hangangaa robiaꞌ morii lalira to kodake, hei hangangaa nipoꞌohihi i langkaꞌ-langkaꞌna.
12Samas hangangaa haduolu hantambine, hei pobahaꞌ moꞌatoroꞌ toaꞌ to meꞌohaꞌ i lali tambina hante moromiꞌ. 13Toaꞌ to majama hante moromiꞌ i lali jumaꞌa hingkiꞌ niꞌadaꞌi hei pedeꞌ wurani mololita noniuꞌ pepoꞌohi pe Yesu Kerisitu.
Tungkaihana hi Paulu moꞌukiꞌ suraꞌ hieꞌe pe hi Timotius
14Timotius, uwaꞌ mpuꞌu tungkaihangka hohiꞌ nolou moweoꞌiko. Angkana kehapoꞌi watoꞌo, kuꞌukiꞌkiko suraꞌ hieꞌe, 15hingkeꞌna ane rapaꞌna morueꞌa tene honiꞌa hupaꞌ, ibahaꞌ walia to hintotoꞌ i lekiꞌ-lekiꞌna toaꞌna Pueꞌ Ala. Alaꞌ lekiꞌta hieꞌe, menombaki pe Pueꞌ Ala to tuwuꞌ wute nantolou-louna. Ingkiꞌ to mepoꞌohi hei to motiko pepoturuꞌ to tuꞌu, hibaliki watu pahurahana tambi hei ori lumbu tambi to mampomaroho tambi hingkeꞌna hawaꞌi morenda, 16Moromiꞌ mpuꞌu pepoturuꞌ to topetuntui alaꞌ pengkoruꞌta pe Pueꞌ Ala. Hampiha pepoturuꞌ tiꞌo hawaꞌi robahaꞌ toaꞌ, angkana hinewowoꞌena notidoꞌkimokiki Pueꞌ Ala. Alaꞌ hieꞌemo to topoꞌohi noniuꞌ Yesu Kerisitu:
Io hadoduona
mewali manusiaꞌ,
Inoha' Mangkolehi to mampokononto Io tuꞌu,
hei to roꞌokiꞌ malaꞌeka.
Kareba noniuꞌ Io nipowute pe toaꞌ to handoaꞌhi tene mepoꞌohi pe Pueꞌ Ala,
hei Io nopoꞌohi toaꞌ i humanele duniaꞌ,
hei noꞌoreꞌ Pueꞌ Ala nolou pe suruga i lali pewantaNa.
Currently Selected:
1 Timotius 3: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
