1 Timotius 2
2
Pekokaena jumaꞌa
1Kaꞌisaꞌ-isaꞌ kuperapiꞌ hingkeꞌna ingkei to mepoꞌohi mekokae pe Pueꞌ Ala, merapiꞌ, moꞌawerasiꞌ hei mampekokaeki toaꞌ ntaniꞌna. Lekiꞌna tiꞌo iwalikei pe lekiꞌ-lekiꞌna toaꞌ. 2Lekiꞌ-lekiꞌna datu hante topoparenta, hangangaa topekokaekihi, hingkeꞌna moromiꞌ kotuwuꞌte hei hawaꞌi uwaꞌ toaꞌ to mampopoꞌioꞌioki, hingkeꞌna holangkoki menomba pe Pueꞌ Ala hei mowaliki nturusi walia to hintotoꞌ rotorimo hangko awanta. 3Moromiꞌ ane mekokaeki hibali tiꞌo, alaꞌ tiꞌo mampomotanaꞌ lalina Pueꞌ Ala, to mohompoꞌki. 4Alaꞌ peleihaNa hingkeꞌna lekiꞌ-lekiꞌna toaꞌ niposalamaꞌ ka pehuku dosa, hei pobahaꞌ pepoturuꞌ to tuꞌu. 5Pueꞌ Ala haduolu, hei haduolu woꞌo To mampelumbui Pueꞌ Ala hante manusiaꞌ. To mampelumbui tiꞌo toaꞌlu woꞌo, iomo Yesu Kerisitu. 6Io to mampewei wotaNa nirokoꞌ hingkeꞌna mohompoꞌ lekiꞌ-lekiꞌna toaꞌ. Tiꞌo mewali i tempo to nopokonontomo Pueꞌ Ala, hingkeꞌna tongawa pe ingkiꞌ komarimane Pueꞌ Ala mohompoꞌ lekiꞌ-lekiꞌna toaꞌ ka pehuku dosa. 7Iomo horiana nirumbaꞌa pe toaꞌ to handoꞌiohi toYahudi mampekarebaiki noniuꞌ pepoꞌohi to tuꞌu. Lekiꞌna to kutiꞌimo tuꞌu, hawaꞌa mowuti. 8Peleingku hingkeꞌna i umbo-umbolu porampuami menomba, tomaꞌani mekokae hante lali to mangkolehi, hei hawaꞌhi wadi bukota hante mosisalaꞌ. 9Watoꞌo woꞌo towoweꞌe, hangangaa mopakeꞌhi baduꞌ topoꞌadaꞌ. Anioꞌhi mobungai baduꞌra hingkeꞌna noperenakihi awara. Anioꞌhi mampopongaangaa wilolura. Anioꞌhi mopakeꞌ bulawa ba parewa to masuliꞌ. 10Angkana towoweꞌe hangangaa mampomaranga wotana hante walia to moromiꞌ, to masipatoꞌ hibali towoweꞌe to menomba pe Pueꞌ Ala. 11Towoweꞌe hangangaa mengkoruꞌ hei menondoꞌ mampehoromua pepoturuꞌ. 12Towoweꞌe hawaꞌi kupoliu mampoturuꞌ ba moparentai tomaꞌani. Hangangaa mondiiꞌhi hei mampehoromua. 13Alaꞌ to uluꞌ-uluꞌna nowali Pueꞌ Ala, iomo hi Adama, honiꞌi hi Hewa. 14Haꞌio hi Adama to noꞌakalai Belisiꞌ, angkana hi Hewareꞌi to noꞌakalaino, hinaꞌ molungkaꞌi parentana Pueꞌ Ala. 15Angkana towoweꞌe kehapohi pahua pehuku i lali komaporiꞌ tempora moꞌanaꞌ, tontona niposalamaꞌhi, asalana maroho mepoꞌohi pe hi Yesu Kerisitu hei marima pe toaꞌ ntaniꞌna, tuwuꞌ mangkolehi i hinarona Pueꞌ Ala. Lekiꞌna tiꞌo niwali hante walia to masipatoꞌ.
Currently Selected:
1 Timotius 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
