YIA̒APO 30
30
Wuu̒du pasali lodanti
1Tei Musa longohi mao̒ wuwuu-uduwalo botie ode mongo tau̒wa lo susuu-kuwaalo bangusa lo Isirai̒lu. 2Wonu bolo talolai̒ ngota o modanti ohilaa mohutu mao̒ hitua-hituawua meaalo mohulitao̒ danti wolo tadia ode Eeya, tilinggula tio mongawade batangalio todanti tuwau, yi tio musi mohutu mao̒ wolo u pilodantilio boito, wau diila mowali wonu diila mopoo̒polu mao̒ loi̒yaalio.
3-4Wonu bolo tadulahu ngota tabilu-biluloa̒ tobele liyamolio modabti ohilaa mohutu mao̒ hitua-tuawua ode Eeya, wau mongawade batangalio todanti tuwau, wau tiyamolio diila okabalaatani tou̒ loo̒dungohe sua̒li boito, yi tadulahu boito musi moe̒elao̒ ngoa̒amila loi̒ya wau dantilio boito. 5Bo wonu tou̒ tiyamolio loo̒dungohe sua̒li boito okabalaatani, yi tadulahu boito diila leibuto to loi̒yaalio wau dantilio. Eeya mamo ngambungu mai olio, sababu tio dilini liyamolio.
6-7Wonu bolo taabua ngota tadiipo lonika modanti meaalo mongawade batangalio todanti tuwau, diila otaawa lou̒ tilimbangilio leimulo meaalo bo odito wambai̒o, yi tio meibuhuto toloi̒ya meaalo dantilio boito. Wonu todulahee momooli tio monika, yi tio debo meibuhuto toloi̒ya usaaha wau dantilio boito, asali dilelio diila okabalaatani tou̒ moo̒dungohe pasali losua̒li boito. 8Bo wonu dilelio tou̒ lodungohe modini olio, yi tio diila meibuhuto to loi̒yaalio meaalo dantilio boito.
9Wonu bolo janda ngota meaalo taabua tamaa bilua̒ya mohutu mao̒ loi̒ya meaalo danti umongawade batangalio, yi tio meia̒wade toloi̒ya meaalo danti boito wau musi pohutuwolo.
10Wonu bolo taabua ngota tamalo nika mohutu mao̒ loi̒ya meaalo danti mongowade batangalio, 11tio musi mopoo̒polu totoonulalo upilo dantilio boito, asali dilelio diila okabalaatani tou̒ tio moo̒dungohe sua̒li boito. 12Bo wonu tou̒ loo̒dungohe sua̒li boito dilelio talolai̒ lodini olio, yi taabua boito diilalo meia̒wade toloi̒ya meealo dantilio. Eeya mamo ngambungu mai olio, sababu tio dilini lodilelio. 13Dile talolai̒ ohaku u moa̒akolo mao̒ meaalo diila mopomata timii̒du loi̒ya upilohutu lodilelio taabua. 14Bo wonu tou̒ loo̒dungohe sua̒li boito dilelio diila okabalaatani, yi taabua boito musi mohutu ngoa̒amilalo loi̒ya meaalo dantilio. Dilelio akolo wolo loi̒ya meaalo danti boito sababu tio diila okabalaatani tou̒ lodungoheo̒. 15Wonu todulahee momooli dilelio talolai̒ boito diila mopomata mao̒ loi̒ya meaalo danti lo dilelio taabua, yi dilelio talolai̒ boitolo tamusi momanta akiibati lo polobatali boito.
16Ui-uitolo wuu̒du uilohi mai lo Eeya odelei Musa pasali lo loi̒ya wau danti upohutuo mao̒ lo tadulahu ngota tabilu-biluloa̒ tobele liyamolio, meaalo lotaabua ngota tamalo nika.
Currently Selected:
YIA̒APO 30: LAIGOR
Highlight
Copy
Compare
Share
Want to have your highlights saved across all your devices? Sign up or sign in
