YIA̒APO 29
29
Dewo to Potihunggu Taunu Bohu
(Im. 23:23-25)
1Tobohulo dulahu hulalo opitulio timongoli musi mohutu mao̒ dudunggaya u potabiyalo, diila mowali mohutu mao̒ kalaja u mobuheeto. Todulahee boito totoo-rompetiyalo musi potingohulo. 2Podewowa mao̒ ode Eeya bake yilalango debo odelo sapi ulai̒ tuwau buboto, himba ulai̒ tuwau, wau pitu walao̒ himba ulai̒ ou̒umulu ngotaunu, tinggai udiila otailio. Boolo bake boito moo̒sanangi hilaa lo Eeya. 3Podewowa mao̒ olo bake pohinta u pilowajibu, debo odelo labu ilulau lowinulo jaitun: tolokilo ode sapi ulai̒, dulokilo ode himba ulai̒, 4wau ngokilo ode timii̒du walao̒ himba. 5Podewowa mao̒ olo sapi ulai̒ tuwau ode bake pongambungualo dusa. Wolo dudelo boito timongoli mohutu mao̒ upacala polulutalo dusa lo umati. 6Babaa-keyaalo boito debo odelo poduhengo tobake yilalango u podewolo pee̒-pee̒enta wolo bake pohintalio, tobohulo dulahu timii̒du hulalo. Wau olo debo odelo poduhengo tobake yilalango timii̒du dulahu u podewolo pee̒-pee̒enta wolo bake pohinta wau bake taluhu lo anggurulio. Boolo bake boito moo̒sanangi hilaa lo Eeya.
Dewo to Dulahu Pongambungualo Dusa
(Im. 23:26-32)
7Todulahee opululio hulala opitulio timongoli musi mopowoluo mao̒ dudunggaya u potabiyaalo. Todulahu boito timongoli musi mopuasa wau diila mowali mokalaja. 8Podewowa mao̒ ode Eeya bake yilalango debo odelo sapi buboto ulai̒ tuwau, himba ulai̒ tuwau wau pitu walao̒ himba ulai̒ ou̒umulu ngotaunu, tinggai diila otailio. Boolo bake boito moo̒sanangi hilaa lo Eeya. 9Podewowa mao̒ bake pohinta u pilowajibu, debo odelo labu ilulau lo winulo jaitun: tolokilo ode sapi ulai̒, dulokilo ode himba ulai̒, 10wau ngokilo ode timii̒du walao̒ himba. 11Podewowa olo batade ulai̒ tuwau ode upacala pongambungualo dusa lo umati, ngopohia bake pongambunguala dua wau bake yilalango timii̒du dulahu wolo bake pohinta wau bake taluhu lo anggurulio u podewolo todulahee boito.
Dewo to Potihunggu Wombohe Duungo
(Im. 23:33-44)
12Todulahu opulaa limo hulala opitulio timongoli musi mohutu mao̒ dudunggaya u potabiyalo, wau diila mowali mohutu mao̒ kalaja u mobuheeto. Ngotilonggadu pitu hui mola timongoli musi mohutu lameyangi u pohulumatiala to Eeya. 13Todulahee u bohulio podewowa mao̒ ode Eeya bake yilalango debo odelo mopulaa totolu sapi ulai̒ buboto, duluo himba ulai̒ buboto, wau mopulaa pato walao̒ himba ulai̒ ou̒umulu ngotaunu, tinggai udiila otailio. Boolo bake boito moo̒sanangi hilaa lo Eeya. 14Podewowa mao̒ olo bake pohinta u pilowajibu debo odelo labu ilulau lowinulo jaitun: tolokilo ode timii̒du sapi ulai̒, dulokilo ode timii̒du himba ulai̒, 15wau ngokilo ode timii̒du walao̒ himba. Pee̒-pee̒enta wolo bake pohinta boito musi podewolo olo bake taluhu lo angguru u palaluwolo. 16Ngopohia leeto podewowa olo batade ulai̒ tuwau ode bake pongambungualo dusa. Bake boito debo odelo poduhengo tobake yilalango timii̒du dulahu wolo bake pohinta wau bake taluhu lo anggurulio.
17Todulahee u oluolio podewowa mao̒ mopulaa duluo sapi ulai̒ buboto, duluo himba ulai̒ buboto, wau mopulaa pato walao̒ himba ulai̒ ou̒umulu ngotaunu, tinggai udiila otailio. 18-19Podewowa mao̒ pee̒-pee̒enta woleeto ngoa̒amila bake wewo debo odelo u pilalalu todulahee ubohulio.
20Todulahee u otolulio podewowa mao̒ mopulaa tuwau sapi ulai̒ buboto, duluo himba ulai̒, wau mopulaa pato walao̒ himba ulai̒ ou̒umulu ngotaunu, tinggai udiila otailio. 21-22Podewowa mao̒ pee̒-pee̒enta woleeto ngoa̒amila bake wewo debo odelo u pilalalu todulahee ubohulio.
23Todulahee u opatio podewowa mao̒ mopulu sapi ulai̒ buboto, duluo himba ulai̒, wau mopulaa pato walao̒ himba ulai̒ ou̒umulu ngotaunu, tinggai udiila otailio. 24-25Pee̒-pee̒enta woleeto podewowa olo ngoa̒amila bake wewo debo odelo u pilalalu todulahee ubohulio.
26Todulahee u olimolio podewowa mao̒ tio sapi ulai̒ buboto, duluo himba ulai̒, wau mopulaa pato walao̒ himba ulai̒ ou̒umulu ngotaunu, tinggai udiila otailio. 27-28Pee̒-pee̒enta woleeto podewowa olo ngoa̒amila bake wewo debo odelo u pilalalu todulahee ubohulio.
29Todulahee u olomolio podewoa mao̒ walu sapi ulai̒ buboto, duluo himba ulai̒, mopulaa pato walao̒ himba ulai̒ ou̒umulu ngotaunu, tinggai udiila otailio. 30-31Pee̒-pee̒enta woleeto podewowa olo ngoa̒amila bake wewo debo odelo u pilalalu todulahee ubohulio.
32Todulahee u opitulio podewowa mao̒ pitu sapi ulai̒ buboto, duluo himba ulai̒, mopulaa pato walao̒ himba ulai̒ ou̒umulu ngotaunu, tinggai udiila otailio. 33-34Pee̒-pee̒enta woleeto podewowa olo ngoa̒amila bake wewo debo odelo u pilaalu todulahee ubohulio.
35Todulahee u owalulio timongoli musi mohutu mao̒ dudunggaya u potabiyalo wau diila mowali mohutu mao̒ kalaja u mobuheeto. 36Podewowa mao̒ ode Eeya bake yilalango debo odelo tuwau sapi ulai̒ buboto, tuwau himba ulai̒, wau pitu walao̒ himba ulai̒ ou̒umulu ngotaunu, tinggai udiila otailio. Boolo bake boito moo̒sanangi hilaa lo Eeya. 37-38Pee̒-pee̒enta woleeto podewowa mao̒ olo ngoa̒amila bake wewo debo odelo u pilalalu todulahee ubohulio.
39Ui-uitolo wuwuu-uduwaalo pasali lobake yilalango, bake pohinta, bake taluhu lo angguru, wau bake lo polodame umusi podewo mao̒ limongoli ode Eeya to lalaa-meyangiyalo limongoli u matilantu mao̒. Babaa-keyaalo boito debo odelo poduhengo to babaa-keyaalo u podewo mao̒ limongoli pomayali danti meaalo bake iloheela lohilao.
40Tei Musa lopo tunggulao̒ ode bangusa lo Isirai̒lu totoonulalo u hitua-tuawua upilo malentai lo Eeya olio.
Currently Selected:
YIA̒APO 29: LAIGOR
Highlight
Copy
Compare
Share
Want to have your highlights saved across all your devices? Sign up or sign in
