YIA̒APO 18
18
Uwajibu tomongo iimamu wau taulo Lewi
1 Eeya lotahuda mai odelei Haruna, “Yio̒, mongo walau̒mu wau tau-tauwalo Lewi musi momanta mao̒ akiibati totoo-talawaalo uilowali todelomo Kema-U̒, bo wambao̒ yio̒ wau mongo walau̒mu wambai̒o tamusi momanta mao̒ totala todelomo kalaja lomongo iimamu. 2Mongo pohutatamu, suku Lewi, musi poduduu̒mu mao̒ odelo tamomantua todelomo moponao̒ lo tuugasimu wau tuugasi lomongo walau̒mu. 3Suku Lewi musi moponao̒ mao̒ uwajibu olimongolio to olimongoli wau mohutu mao̒ tuugasi limongolio to Kema-U̒, bo timongolio diila mowali mohimbideo̒ mesba meaalo uu̒u-pangowalo mantali to Huwali Leidaa̒ Mantali. Wonu timongolio molambanga wuu̒du boito, mopio timongolio meaambo timongoli maamate. 4Timongolio musi mokalaja pee̒-pee̒enta woli mongoli wau mohutu mao̒ tutuu-gasiyaalo u owumbuta wolo totoonulalo bubaya todelomo Kema-U̒, bo tadiila wohiyalo haku woleeto, diniyolo mokalaja pee̒-pee̒enta woli mongoli. 5Bo yio̒, tei Haruna, wau mongo walau̒mulo tamusi mohutu mao̒ tuugasi to Huwali Leidaa̒ Mantali wau tomesba, alihu Wau̒ madiilalo mowali muluka ode bangusa lo Isirai̒lu. 6Tutuulio tutu, Wau̒ malo lulaotai mongo pohutatamu tau-tauwalo Lewi towolota bangusa lo Isirai̒lu odelo wowohi ode olemu. Timongolio mapilohetu ode ola-U̒, u momaya to Kema-U̒. 7Bo wamabao̒ yio̒ wau mongo walau̒mu wambai̒o tamowali moponao̒ lotuugasi odelo iimamu, todelomo totoonulalo kalaja u owumbuta wolo mesba wau wolo uwoluo to Huwali Leidaa̒ Laba-labaalo mantali. Ui-uitolo titihulamu, sababu Wau̒ malongohi mai huhuloa̒a olimongoli odelo iimamu. Timii̒du taa udiila ohaku boito mahukuu-maniyolo mate wonu mohimbideo̒ uu̒u-pangowalo mantali boito.”
Tayadu wariisani lomongo iimamu
8 Eeya lotahuda mai odelei Haruna, “Eelai mao̒! Ngoa̒amila dewo poheetu uwohi ola-U̒ udiila yilalango yito ode olemu. Ui-uitolo tayadumu u matilantu mao̒ u ohiheo-hiheolo mao̒. Uito wohi-U̒ mai olemu wau ode waliimu mola. 9Monto dedee-wowaalo ulaba-labaalo mantali udiila yilalango toitaato mesba, u wumbutio mola botie yito ode olemu: Bake pohinta, bake pongambungualo dusa wau bake poluloo̒ uiluhi. Ngoa̒amilalo boito dewo mantali umowali tayadumu wau tayadu lomongo walau̒mu. 10Uito yito mantali olemu, oditolio musi tamela mao̒ limongoli totambati u mantali olo. Bo mongo lolai̒ tamowali molamelao̒.
11Totoonulalo dewo poheetu wewolio upilodewo taulo Isirai̒lu ode ola-U̒, deu̒yito-yito ode olemu olo. Wau̒ mongohi mai olemu wau tomongo walau̒mu talolai̒ wau taabua. Wuu̒du boito pohu-pohutu u ohiheo-hiheolo mao̒. Timii̒du pongawaa̒ lo ngaalaa̒mu tadiila najisi mowali molamelao̒.
12Wohi-U̒ mai olemu totoonulalo ulaba-labaalo mopiohu monto bohulo sembo u pilodewo taulo Isirai̒lu ode ola-U̒ timii̒du taunu, deu̒yito-yito winulo jaitun, taluhu angguru wau pale. 13Ngoa̒amila boito yito ode olemu. Timii̒du pongawaa̒ lo ngalaa̒mu tadiila najisi mowali molamelao̒.
14Totoonulalo u hitua-tuawua tohuta lo Isirai̒lu u mapiloheetu ode ola-U̒, deu̒yito-yito ode olemu.
15Ngoa̒amila u bohulo pilotutu mai towolota lomanusia meaalo binatangi upilodewo taulo Isirai̒lu ode Olau̒, deu̒yito-yito tayadi mongoli. Bo timongoli musi motolotao̒ mongo walau̒mu tamohuhula daa̒, olo walao̒ binatangi haramu ubohulo pilotutu mai. 16Taukekeei̒ musi tolotalo tou̒ timongolio ou̒umulu ngohula. Halaga utilantu mao̒ woleeto yito limo lopita doi talaa̒, moduduo̒ halaga upohu-pohutu to Kema-U̒. 17Bo sapi, himba wau batade ubohulo pilotutu mai, diila mowali tolotalo. Bibiahu boito musi ode Olau̒ wau musi pobakeelo. Poloohe mao̒ duhulio tomesba wau lalanga mao̒ tabolio odelo bake. Boolio moo̒sanangi hilaa-U̒. 18Tapulio yito ode olemu, tutuuwauwa debo odelo duhelo, bungolopa olowala monto dewo u pilopo bilohe ode Olau̒.
19U ohiheo-hiheolo mao̒, ngoa̒amila dewo poheetu udilelo tau-tauwalo Isirai̒lu ode Olau̒, wohi-U̒ mai olemu wau ode mongo walau̒mu talolai̒ wau taabua. Wuu̒du boito pohu-pohutu u ohiheo-hiheolo mao̒ wau mowali pomuhuto daantia towolota-U̒ wolemu wau waliimu mola.”
20 Eeya luli lotahuda mai ode lei Haruna, “Timongoli diila moo̒tapu wariisani wolo-wolo. Tolipu u pilodanti-U̒ mai boito diaaluo penu boli huta ngopita mao̒ umowali milikiimu. Wau̒, Eeya, deu̒yito-yito tayadu lo wariisanimu.”
Tayadu lo wariisani tau-tauwalo Lewi
21Tahuda mai lo Eeya olei Haruna, “Ngoa̒amila dewo ngotayade mopulu taulo Isirai̒lu wohi-U̒ mai ode tau-tauwalo Lewi. Ui-uitolo tayadu wariisani limongolio duo̒lo kalaja limongolio to Kema-U̒.
22Tau-tauwalo Isirai̒lu wewolio diilalo mowali mohimbideo̒ Kema boito alihu diila mao̒ moo̒toduo mai dusa wau hukuumani mate tobatanga limongolio. 23Tumulalo mai botia bo taulo Lewi tamowali mongulusi Kema-U̒ wau momanta mao̒ polupolu tokalaja boito. Wuu̒du boito pohu-pohutu olo ode waliimu mola dilumutu ohiheo-hiheolo mao̒. Taulo Lewi diila owariisani to Isirai̒lu, 24sababu duo̒lo tayadu wariisani limongolio Wau̒ malongohi mai ngoa̒amila dewo ngotayade mopulu upilodewo taulo Isirai̒lu ode ola-U̒ odelo wowohi u poheetu. Uito sababuulio pasali taulo Lewi Wau̒ motahuda mai deu̒ timongolio diila tamoo̒tapu tayadu wariisani to Isirai̒lu.”
Dewo ngotayade mopulu monto taulo Lewi
25 Eeya lopoa̒hu olei Musa 26mopo tunggulao̒ palenta botie ode taulo Lewi: Wonu bolo timongoli mololimo monto taulo Isirai̒lu dewo ngotayade mopulu uiludu mai lo Eeya olemu duo̒lo tayadumu, timongoli musi mopodewo mao̒ ngotayade mopulu tayadio ode Eeya duo̒lo dewo poheetumu. 27Dewo poheetu boito ilanggapu tutuuwauwa wolo dewo lopale bohu wau taluhu angguru bohu. 28Lou̒ odito timongoli olo musi mopodewo mao̒ duo̒lo dewo poheetu ode Eeya ngotayadu monto dewo ngotayade mopulu taulo Isirai̒lu. Dewo poheetu boito musi wuduo mao̒ limongoli odeli Iimamu Haruna. 29Wohia mao̒ tayadu ulaba-labaalo mopiohe monto wolo u tilolimo limongoli. 30Lapatao̒ mohudu mao̒ tayade boito, timongoli mowali mohama labitio, debo odelo ngotaalio tamoomengia olo helohama wolo u ilolabita lapatao̒ tio lodelo dewolio. 31Ulabitio boito mowali tamelo limongoli penu boli tou̒toonu wambai̒o pee̒-pee̒enta wolo ngaalaa̒mu, odelo wuupa lo kalajamu to Kema lo Eeya. 32Timongoli diila ototala wonu molamelao̒, asali tayadio ulaba-labaalo mopiohe boito mapilodewo limongoli ode Eeya. Diila mao̒ ponajisia dewo mantali taulo Isirai̒lu wolo molamela u hitua-tuawua monto dewo boito tou̒ diipo tayadio ulaba-labaalo mopiohe pohetuwolo ode Eeya. Wonu timongoli molambanga palenta boito, timongoli maamate.
Currently Selected:
YIA̒APO 18: LAIGOR
Highlight
Copy
Compare
Share
Want to have your highlights saved across all your devices? Sign up or sign in
