IMAAMATI 7
7
Bake poluloo̒ uiluhi
1Uti-utieelo wuwuu-uduwaalo pasali poluloo̒ uiluhi. Bake boito mantali daa̒. 2Binatangi duo̒lo bake musi olotolo to tambati pongongolotalo binatangi duo̒lo bake yilalango, lapatao̒ duhulio pomuhutao̒ to opato biihu mesba. 3-4Ti iimamu musi mopodewo mao̒ toitaato mesba ngoa̒amila tabo lobinatangi boito, deu̒yito-yito: Patahio u otabo, tabo ulomolu tuango ombongio, oile wolo tabolio, wau wimbihu umopiohe daa̒ monto wantohio. 5Ngoa̒amila boito musi lalangolo toitaato mesba odelo bake lou̒ aalo ode Eeya. Bake boito yito duo̒lo bake poluloo̒ uiluhi. 6Timii̒du mongo lolai̒ todelomo ngaalaa̒ lomongo iimamu mowali molamela tapu lobake boito, bo musi tamelo mao̒ limongolio totambati utolo-tolomodu, sababu bake boito mantali daa̒.
7Duo̒lo bake pongambungualo dusa wau bake poluloo̒ uiluhi pohu-pohutu wuu̒du u tutuuwauwa, deu̒yito-yito: tapu lobibiahe u pobakeelo yito tayadu li iimamu tamo podewo mao̒. 8Walito lobibiahe boito olo duo̒lo li iimamu. 9Timii̒du bake pohinta u yilalango todelomo polalangalo meaalo tubuwolo todelomo ulongo meaalo u pilanggangi, mowali tayadu li iimamu tamo podewo mao̒. 10Bo bake pohinta udiila tilubu, mopio u ilulau wolo winulo meaalo u mohengu, ngoa̒amilalo duo̒lo mongo iimamu wali lei Haruna, wau musi tayadulo tutuuwauwa towolota limongolio.
Bake lo polodame
11Uti-utieelo wuwuu-uduwaalo pasali bake lo polodame u podewolo ode Eeya. 12Wonu bake boito podewolo ode oduo̒lo, yi wolo binatangi boito musi podewolo olo roti udiila momake ragi. Roti boito mowali u mohulodu monto ulau lolabu wolo winulo jaitun, mowali olo roti mohengu wau molipa u piladeta wolo winulo, meambo kuukisi labu u pilohutu wolo winulo jaitun. 13Ngopohia mao̒ leeto musi podewolo olo roti u pohutuwola momake ragi. 14Monto timii̒du roti ngodalaala ngotayadio musi podewolo ode Eeya, wau uito tayadu li iimamu tamohama duhu lo binatangi boito wau mopo muhutao̒ tomesba duo̒lo bake lo polodame. 15Tapulio musi tamelolo tou̒ binatangi boito podewolo, penu boli ngoi̒di mao̒ diila mowali polabitolo tunggula loombulio mola dumodupo.
16Wonu tahingota-ngotaawa modelo bake lo polodame duo̒lo mopoo̒polu mao̒ niyatilio, meaalo duo̒lo bake iloheela lohilao, yi diila palalu ngoa̒amilalo tamelolo todulahee boito olo. To wimbihu lebelio mowali tamelolo loombulio mola. 17Wonu todulahee u otolulio donggo woluo labitio, tapu boito musi pobuwolo tunggula maahu. 18Bo wonu todulahee u otolulio tapu boito debo tamelolo, yi bake boito diila tatolimoolo wau diila modelo balakati ode tau boito, tumbao̒ mowali haramu. Taa u molamelao̒ ototala wau musi momanta akiibatilo.
19Tapu u ilotuhata lou̒ hitua-tuawua u najisi musi pobuwolo tunggula maahu wau diila mowali tamelolo.
Tapu lobake polodame bo mowali tamelo lotaa udiila najisi. 20Wonu taa molamela tapu boito tou̒ tio donggo najisi, yi tio diilalo anggapuolo pongawaa̒ umati lo Allahu Taa̒ala. 21Wonu bolo tahingota-ngotaawa molamela tapu lobake boito lapatao̒ moo̒dedeta u hitua-tuawua unajisi, mopio u asaliilio monto manusia meaalo monto binatangi, yi tio olo diilalo anggapuolo pongawaa̒ umati lo Allahu Taa̒ala.
22 Eeya longohi olei Musa wuwuu-uduwaalo botie, 23ode bangusa lo Isirai̒lu. Tabo losapi, himba meaalo batade diila mowali tamelolo. 24Tabo lo binatangi uilate lohilaalio meaalo sababu dilangapo binatangi mongantau, diila mowali tamelolo bo mowali pomake to kaparluani wewo. 25Taa u molamela tabo lo binatangi u mowali podewolo duo̒lo bake lou̒ aalo duo̒lo Allahu Taa̒ala, diilalo anggapuolo pongawaa̒ umati lo Allahu Taa̒ala. 26Taulo Isirai̒lu, penu boli tou̒toonu poti biluloa̒alio, diila mowali molamela duhu lobulungi meaalo duhu lo binatangi uwewolio. 27Tatoonu tamo lambanga wuu̒du boito diilalo anggapuolo pongawaa̒ umati lo Allahu Taa̒ala.
28 Eeya longohi olei Musa wuwuu-uduwaalo botie, 29ode bangusa lo Isirai̒lu. Titaalo tita tamodelo bake lo polodame, musi mopowiwi mao̒ ngotayadu duo̒lo dewo poheetu ode Eeya. 30Tio lohihilao musi modelo mao̒ bake lou̒ aalo boito. Tabo wau duhelo binatangi boito musi podewolo odelo dewo poo̒taa ode Eeya. 31Ti iimamu musi molalangao̒ tabo boito toitaato mesba, bo duhelio yito tayadu lomongo iimamu. 32Bungolopalio olowala musi wohiyalo odelo tolomodu dembulo 33odeli iimamu tamo podewo duhu wau tabo lobake polodame boito. 34Duhelo wau bungolopa olowala yito tolomodu wowohi u hilama lo Eeya lonto dewo poo̒taa bangusa lo Isirai̒lu wau yilohi ode mongo iimamu. Ui-uitolo dembulo bangusa lo Isirai̒lu ode mongo iimamu u ohiheo-hiheolo mao̒. 35Monto ua̒alo u podewolo ode Eeya, tayade ui-uitolo u yilohilio odelei Haruna wau mongo walai̒o todulahee timongolio pilopo mantaliilio lowali iimamu. 36Todulahee boito Eeya lomalentao̒ bangusa lo Isirai̒lu alihu monto dewo limongolio, tayade boito duo̒lo mongo iimamu. Wuu̒du botie musi dungohe mao̒ lo bangusa Isirai̒lu u ohiheo-hiheolo mao̒.
37Odi-odieelo mola wuwuu-uduwaalo pasali lobake yilalango, bake pohinta, bake pongambunguala dusa, bake poluloo̒ uiluhi, bake mopo mantali wau bake lo polodame. 38Eeya longohi mao̒ papaa-lentaalo boito odelei Musa to Hui̒dee Sinai tou̒ Tio lopoa̒hu bangusa lo Isirai̒lu helo podewo bake tohuta datahu wau luasi udelita lo Sinai.
Currently Selected:
IMAAMATI 7: LAIGOR
Highlight
Copy
Compare
Share
Want to have your highlights saved across all your devices? Sign up or sign in
