HOSEA 8
8
Eeya lohukuumani Isirai̒lu sababu timongolio helolubo to balaahala
1 Eeya lotahuda, “Potingohe mola tuoto lou̒ topotala mai! Musu loluhu lipu-U̒ debo odelo bulia lodehita mangusa! Umati-U̒ helo lambanga daantia-U̒ woli mongolio, wau helo luwali totoonulalo pongaajali-U̒. 2Eleponu timongolio mongunte ola-U̒ Allahu Taa̒ala limongolio, wau moloi̒ya deu̒ timongolio yito umati-U̒ tamoo̒onuhu ola-U̒, 3bo timongolio diila mohuto mololimo wolo u mopiohe. Masababu uito timongolio mawanela lo mumuu-suuwaalo limongolio.
4Umati-U̒ helo lolulaota olongia lou̒ diila lohintu deu̒ woloolo mola huhamaa-U̒. Timongolio lohama hulawa wau talaa̒ limongolio tulusi helohutu bui̒ balaahala uloo̒ akiibati oa̒antulu limongolio lohihilao. 5Wau̒ molonuo̒ tosapi hulawa u hetuboo lo ulipu kota Samaria. Wau̒ muluka daa̒ olimongolio. Tunggula omolua timongolio matulusi mopokootolo batanga wolo hemolubo balaahala? 6Sapi hulawa u tilubo to Samaria boito yito huhutu lotau-tauwalo tahi osiipatia moo̒olohu lo Isirai̒lu! Uito diila Allahu Taa̒ala, wau musi antuluwolo! 7Umati-U̒ lomua̒yade dupoto yi timongolio mamoo̒ toduo dutalo! Halabolu lopale limongolio diila molalahu, yi diila tamongohi tilapulo labu duo̒lo ua̒alo. Bo wonu halabolu boito molalahei olo, yi palelio poo̒pulito lo babaa-ngusawalo wewo. 8Debo odelo ulongo ulopoo̒, odi-odieelo mola bangusa lo Isirai̒lu diilalo oboliilio, wau malowali bangusa u biaasa debo odelo babaa-ngusawalo wewo. 9Debo odelo kolodai molinggelo udiila mohuto moduduo̒ palenta, odi-odieelo mola tau-tauwalo Isirai̒lu helo dudua̒ u otohilaalio lohihilao. Timongolio helei̒ bantu mai lonto Asyur, wau helolualo polo sahabati lo babaa-ngusawalo wewo. 10Bo boli odito Wau̒ mamongambu wau mohukuumani mai olimongolio. Diilalo mohiheo timongolio mamopo ilaalo molaasa mongongoto, wonu bolo timongolio madeehe li olongia lo Asyur.
11Lebe dadaata mesba bongulo lotau Isirai̒lu u moluluta dusa, lebe dadaata olo tambati u pohutua limongolio dusa! 12Wau̒ loludei dadaata daa̒ pongaajali ode limongolio, bo ngaaa̒mila boito pilotouli limongolio sababu to aanggapu limongolio diaaluo aitaalio woli mongolio. 13Timongolio motohilaa mopodewo bake ode Olau̒, wau molamela tapu lobake boito, bo Wau̒ Eeya, diila sanangi wolo babaa-keyaalo boito. Botia Wau̒ mamoe̒ela mai dusa limongolio wau mohukuumani olimongolio sababu duduu-sawaalo boito; Wau̒ mamolao mola olimongolio muli mohualinga ode Masiri!
14Taulo Isirai̒lu helomongu bebee-leyaalo biluloa̒ saaha li olongio, bo timongolio helo malongo to Talopowali mai olimongolio. Taulo Yehuda helo poo̒daata kokoo-tawaalo obiintengi, bo Wau̒ mamopo tuhutai tulu u momobu tunggula maahu bebee-leyaalo biluloa̒ saaha li olongia wau kokoo-tawaalo limongolio.”
Currently Selected:
HOSEA 8: LAIGOR
Highlight
Share
Copy
Want to have your highlights saved across all your devices? Sign up or sign in
