YEHESKIEL 28
28
Olongia lo Tirus hilukumanilio
1 Eeya lotahuda mai odelaatia, 2“Wuu manusia panaa, potunggula mao̒ odeli olongia Tirus, wolo u Wau̒ Eeya Taa Laba-labaalo molanggato lotahuda ode olio, ‘Wolo sombongi yio̒ hemolantobu batangamu dewa u tataambati to huhuloa̒ li olongia tohuungo deheto. Mowali olo wambai̒o yio̒ motihutu debo odelo dewa, bo eelai mao̒, yio̒ bo manusia biaasa. 3To lantobumu yio̒ lebe motota wolei Daniali, tilinggula diaaluo hehuliyolo u tuutuuo̒ olemu. 4Pilomakemu hikimati wau pongototamu u lohimoa̒ halata, hulawa wau talaa̒. 5Memangi, yio̒ motota modaahangi wau botia makilaya daa̒, wau okokayaamu boito heloo̒ sombongi olemu!’ ”
6-7 Eeya Taa Laba-labaalo molanggato lotahuda mai, “Wuu Tirus, sababu yio̒ hemolantobu batangamu tutuuwauwa debo odelo Allahu Taa̒ala, yi Wau̒ mamolao suludadu deli talaba-labaalo palangi mai moluhu olemu. Timongolio mamo ngantulu ngoa̒amila odudaa̒ u malotapumu sababu hikimati wau pongototamu. 8Yio̒ mapateelio mate-mateelo mao̒ wau lobungolio todelomo deheto. 9Naa, wonu meidungga wakutu boito, tingga donggo mowali yio̒ moloi̒ya deu̒ yio̒ Allahu Taa̒ala? Totalu lo tamoomatea olemu mate-mateelo mao̒, malo ilaalo deu̒ yio̒ bo manusia wambai̒o. 10Yio̒ maamate debo odelo taa hina sababu pilatee mate-mateelo mao̒ lotaa deli tadiila motota lo Allahu Taa̒ala. Wau̒, Eeya Taa Laba-labaalo molanggato malo tahuda mai.”
Dudehulio li olongia Tirus
11 Eeya luli lotahuda mai odelaatia, tahuda lo Eeya, 12“Wuu manusia panaa, pohilumutolo mola odeli olongia Tirus. Potunggula mao̒ wolo u Wau̒, Eeya Taa Laba-labaalo molanggato lotahuda mai ode olio, ‘Yio̒ pee̒enta lowali bayahu lo owimumuto totoonulalo u hitua-tuawua; muloololio mai yio̒ otutu molinepo wau gaaga! 13Tambati biluloa̒amu to Eden, ilengi u pilomuloa wolo bubuu-ngawaalo Allahu Taa̒ala. Pakeyangimu polo-polomu polioto hidala-dalaala: botu dalima wau iintan, topas, botu pirus, botu jakut, ratna, campaka, botu nilamu, botu polioto moidu ohalaga daa̒ wau botu alkali meela. Polomu hulawamu olo dadaata. Babaa-langiyalo boito pilohutu ode olemu todulahee yio̒ pilowali mai. 14Malai̒kati tamoo̒ tihela hapato pilopo tambati-U̒ teto u lodaha olemu. Yio̒ lotibiluloa̒ toitaato hui̒du-U̒ u mantali wau lonao̒ to huungo botu polioto u hei̒nta-intaawa. 15Pii̒limu wimu-wimumuto ngoa̒amilalo tumulalo yio̒ pilopowali mai dilumutu yio̒ lolumula lohutu u moleeto. 16Yio̒ dadaata kalaja hemo potataalia, wau uitolo u lodelo olemu ode palangi wau dusa. Yi pilopolahi-U̒ yio̒ lonto Hui̒du-U̒ u mantali, wau malai̒kati tamoodahawa olemu lopoa̒hu lonao̒ olemu lonto huungo palioto u hei̒nta-intaawa boito. 17Bayamu ugaaga heloo̒ sombongi olemu wau omasaahulu loo̒sababu olemu helohutu mohulodu. Sababu uito yio̒ pobanti-U̒ ode huta wa powaliyo-U̒ poe̒ela ode mongo olongia wewo.’ ”
18 Eeya lotahuda mai, “Wuu Tirus, yio̒ helo pokotoolo tataa-mbatiyalo potabiyamu sababu totoonulalo totala wau diila motulidu hale tou̒ hemo potataalio. Sababu uito tumbila-U̒ mai yio̒ tuggula mowali payadu wolo huta. Ngoa̒amila taa u momilohe olemu bo moo̒onto wahu. 19Yio̒ mailooli sama-samaata u ohiheo-hiheolo mao̒. Ngoa̒amila bangusa tamotota olemu mowali hulu-huluhelio sababu moohe mamoo̒ toduo mai paladu debo odelo uito.”
Wahi u tiluhutai odeli nabi pasali lo hukuumani ode Sidon
20 Eeya lotahuda mai, 21“Wuu manusia panaa, laa̒natiyalo kota Sidon. 22Potunggula mao̒ ode ulipulio, deu̒ Wau̒ Eeya Taa Laba-labaalo molanggato lotahuda mai ode limongolio, ‘Wau̒ botie musuumu, wuu Sidon. Tau-tauwalo mamomuji ola-U̒ sababu huhutuu-U̒ ode olemu. Tou̒ Wau̒ mohukuumani mai ulipumu, mao̒taawa mao̒ limongolio deu̒ Wau̒ulo Eeya tamantali. 23Wau̒ mamopo dungga mai wembelo lo ngongoto wau mopoluli mao̒ duhu humeheto to dadaa-lalaalumu. Yio̒ matuhuo lomusu monto totoonulalo tutulio, wau ulipumu mapateelio mate-matelo mao̒ Yi mao̒taawamu deu̒ Wau̒ulo Eeya.’ ”
Isirai̒lu mabalakatialo
24 Eeya lotahuda mai, “Lilii-puwaalo to tiheede tapee̒enta lohina Isirai̒lu, diilalo debo odelo hutia u oduhi wau duhi u mopo ngongoto Isirai̒lu. Timongolio mamongalati deu̒ Wau̒ulo Eeya Taa Laba-labaalo molanggato.”
25 Eeya Taa Laba-lablaalo molanggato lotahuda mai, “Wau̒ mamongambu tau-tauwalo Isirai̒lu monto lilii-puwaalo u molamingo to tambati u mapilo bubuua̒yaa-U̒ olimongolio, wau ngoa̒amila bangusa mamotota deu̒ Wau̒ mantali. Bangusa lo Isirai̒lu mamuli motibiluloa̒ tohuta limongolio lohihilao, huta u mailohi-U̒ mai odelei Yako wato-U̒. 26Timongolio matumumulo wolo aamani teto wau momongu bebee-leyaalo wau momuo̒ ii̒i-lengiyalo angguru. Wau̒ mamo hukuumani mai ngoa̒amila tiheedi mongolio tamaa lohina olimongolio, tilinggula Isirai̒lu mowali aamani. Yi mao̒taawa limongolio deu̒ Wau̒ulo Eeya Allahu Taa̒ala limongolio.”
Currently Selected:
YEHESKIEL 28: LAIGOR
Highlight
Share
Copy
Want to have your highlights saved across all your devices? Sign up or sign in
