YEHESKIEL 29
29
Hukuumani ode Masiri
1To dulahu opulaa dulu hulalo opululio, todelomo taunu opululio tomaasa lo polayahu lami, Eeya lotahuda mai odelaatia, 2“Wuu manusia panaa, tuleteilo wolo ti olongia lo Masiri. Polelea mao̒ olio wolo ngoilanggubu ulipu lo Masiri mahukuu-maniyola.”
3 Eeya Taa Laba-labaalo molanggato lopoa̒hu mai olaatia odeli olongia lo Masiri lopotunggulo tahuli botie, “Wau̒ botie musuumu, wuu huwayo lakisasa u luu̒luu̒uto tohuungo dutulaa. Yio̒ hemolatabu deu̒ Dutulaa Nili yito milikimu wau deu̒ yio̒olo talohutu mao̒. 4Wau̒ mamo pohuli oa̒aito to walemu wau mopo dembingo totoo-lawaalo to tolitiu̒mu. Lapatao̒ yio̒ bantanga-U̒ lumualo monto Dutulaa Nili wolo totoonulalo tola u dembi-dembinga to tolitiu̒mu boito. 5Lapatao̒ yio̒ wau totoonulalo tola boito pomahulo-U̒ ode huta luasi ohungayo. Batangamu mameibanti tohuta wau meibalata teto. Diaaluo penu boli ngotaa mao̒ tamaa molobunga olemu. Batangamu mawohi-U̒ ode bubuu-lungiyalo wau bibii-natangiyalo wewo u mowali aalolio. 6Yi mao̒taawa lo ngoilanggubu ulipu lo Masiri deu̒ Wau̒ulo Eeya.”
Eeya lotahuda mai, “Wuu bangusa lo Masiri! Taulo Isirai̒lu hemohalapu bantuwamu, bo yio̒ malo ilaalo bo debo odelo tunggudu u moluluhio̒ wambai̒o. 7Tou̒ timongolio lotiwunela to olemu, yio̒ loboli wau loluhio̒ huangee̒ limongolio, tilinggula bungguhi mongolio lopoi̒! 8Masababu uito Wau̒, Eeya Taa Laba-labaalo molanggato, motahuda mai ode olemu, deu̒ Wau̒ mamolao mai suludadu tamaa moluhu olemu wolo wamilo, wau mamate-mateelo mao̒ ulipu wau bibiahumu. 9Masiri mamowali huta u moliilo daa̒. Yi mao̒taawa mao̒ limongoli deu̒ Wau̒ulo Eeya.”
Eeya lotahuda mai, “Wuu olongia lo Masiri! Sababu yio̒ loloi̒ya deu̒ Dutulaa Nili yito milikimu wau deu̒ yio̒olo talohutu mao̒, 10yi Wau̒ mowali musuumu, wau musu lo Dutulaa Nilimu. Ngoilanggubu Masiri mapowaliyo-U̒ huta u moliilo daa̒ tumulalo monto kota Migdol to tilayo demola kota Aswan to huliaalio, tunggula sipatana lo Sudan. 11Diaaluo manusia meaambo binatangi tamaa molibaya mao̒. Ngotilonggadu wopato pulu lotaunu mola diaaluo taa mamoti biluloa̒ao̒. 12Wau̒ mamohutu mai Masiri moliilo daa̒ tilinggula towolota lo lilii-puwaalo moliilo wewolio, Masirilo ulaba-labaalo moliilo. Ngotilonggadu wopato pulu lotaunu mola kokoo-tawaalo to Masiri madebo odelo tutuu-wodeyaalo ulebe mobulilo daa̒ wolo tutuu-wodeyaalo penu boli toonu wambai̒o. Bangusa lo Masiri mapowaliyo-U̒ tahi poa̒ahua batanga ode tambati aamani. Timongolio mamololadu ode totoonulalo lipu wau motibiluloa̒ tohuungo bangusa wewo.”
13 Eeya Taa Laba-labaalo molanggato lotahuda mai, “Wuu bangusa lo Masiri, mopaluto wopato pulu lotaunu mola boito, timongoli mamuli deloo-U̒ monto lilii-puwaalo to tambati u mapilo loladu limongoli. 14Timongoli mapo nguliyo-U̒ wau ahula-U̒ motibiluloa̒ to Masiri ambahu huliaalio, huta u pilohuluta mai loduhumu. Mola teto timongoli mamopo tihula yilaidia moluluhio̒, 15ulaba-labaalo moluluhio̒ to ngoilanggubu dunia. Wau̒ mamohutu mai olimongoli molulupuhe daa̒ tilinggula timongoli diila tamoo̒ palenta babaa-ngusawalo wewo meaambo mopo sombongi batanga ode limongolio. 16Isirai̒lu madiilalo mei̒bantu to olemu. Paladumu wuu bangusa lo Masiri mamo poe̒elao̒ Isirai̒lu deu̒ malo odito talaalio mopomangga Masiri, debo odelo u pee̒enta pilohutulio. Yi mao̒taawa mao̒ lo Isirai̒lu deu̒ Wau̒ulo Eeya Taa Laba-labaalo molanggato.”
Ti Olongia Nebukadnejar mamopo olaaheo̒ Masiri
17To dulahu bohulio hulala bohulio todelomo taunu odulo pulaa pitu tomaasa lo polayahu lami, Eeya lotahuda mai odelaatia, 18“Wuu manusia panaa, ti Olongia Nebukadnejar lonto Babel heloluhu lotutuuyuta ode Tirus. Tio lopoa̒hu mongo pajule helomota babaa-ntawaalo u odito buheetio, tilinggula lunggongi mongolio lowali dayato wau binggungi mongolio lomilato, bo mopio olongia mopio suludadulio diila loo̒tapu tilapulo penu boli wolo tolopani tio̒opatea boito. 19Sababu uito, Wau̒ Eeya Taa Laba-labaalo molanggato motahuda mai: Huta lo Masiri mawohi-U̒ odeli Olongia Nebukadnejar. Tio mamohehu wau molambato boli momintaa̒ ngoa̒amila okokaya lo Masiri odelo wuupa ode suludadulio. 20Huta lo Masiri wohi-U̒ ode olio odelo wuupa tou̒ ngoa̒amila huhutuulio u mopiohu ode taa wewo, sababu suludadulio malo kalaja ode Olau̒. Wau̒, Eeya Taa Laba-labaalo molanggato malo tahuda mai.
21Wonu bolo sua̒li boito motoduo mai, Wau̒ mamopowali Isirai̒lu bangusa tamolotolo, wau mopoluasi olemu Yeheskiel, mobisala wolo beebasi tilinggula ngoa̒amila tau mowali modungohe olemu. Yi mao̒taawa mao̒ limongolio deu̒ Wau̒ulo Eeya.”
Currently Selected:
YEHESKIEL 29: LAIGOR
Highlight
Share
Copy
Want to have your highlights saved across all your devices? Sign up or sign in
