YEHESKIEL 21
21
Wamilo Eeya
1 Eeya lotahuda mai odelaatia, tahuda lo Eeya, 2“Wuu manusia panaa, laa̒anatiyalo Yerusalemu. Laa̒anatiyalo tataa-mbatiyalo potabiyalo mola teto. Poe̒elailo mao̒ huta lo Isirai̒lu, 3deu̒ Wau̒, Eeya lotahuda mai odie, ‘Wau̒ botie musuumu. Wau̒ mamomahuta wamilu-U̒ wau momate olimongoli ngoa̒amila mate-mateelo mao̒, tamoleeto meaambo tamopiohu. 4Wolo wamilu-U̒ matuwaliya-U̒ ngoa̒amila tau monto tilayo demola huliaalio. 5Yi ngoa̒amila tau mamotota deu̒ Wau̒, Eeya, momahuto wamilu-U̒ wau diilalo mopo tau̒upao̒ poli.’
6Wuu manusia panaa, poi̒laalowalo suusa wau podulohelo totalu lotau-tauwalo Isirai̒lu, debo odelo yio̒ didu ohilao wau yilooli halapani. 7Wonu timongolio mohintu yilongola yio̒ mopodulohu, polelea mao̒ deu̒ yio̒ suukali hilao sababu habari u mamei dungga mai. Habari boito mamohutu hilaa limongolio humuhela, uluu̒ limongolio molulupuhu, wau huu̒u limongolio polo-polopalio, timongolio madidu osumaangati. Otutu wakutuulio malei dungga, wau ngoa̒amila boito mamotoduo mai. Wau̒ Eeya Taa Laba-labaalo molanggato malo tahuda mai.”
8 Eeya lotahuda mai odelaatia, 9“Wuu manusia panaa, polamalilo mola! Poleleaalo ode tau-tauwalo deu̒ Wau̒, Eeya lotahuda mai odie,
‘Woluo wamilo ngomato,
wamilo u dilumbato wau piloo̒lalito.
10Tio piloo̒lalito alihu mowali momate-mateelo mao̒,
piloo̒ dipuluto alihu ilatao̒-ilatao̒.
Duo̒lo umati-U̒ diduu̒ oweengahu
sababu totoonulalo poe̒ela wau hukuumani pilalongi mongolio.
11Wamilo boito dilumbato alihu laito dapadapato pomake
lapatao̒ yiludu ode ngotaalio tamoo-ngolotawa.
12Wuu manusia panaa, polapalilo hilimuto wau mongiibodu!
Sababu wamilo boito dapadapato moluwali umati-U̒.
Mongo tau̒wa lo Isirai̒lu wolo ngoilanggubu bangusa
mabituo̒ lo wamilo boito tunggula binasa.
Yi taa̒apalo mola duhelumu wolo suukali daa̒,
13sababu Wau̒ donggo hemotesi umati-U̒,
wonu timongolio diila mohuto mopoo̒piohu pii̒liilio,
ngoa̒amila boito mamotoduo mai toli mongolio.’
14Naa, manusia panaa, polamalilo mola. Taa̒apalo uluu̒mu, odelo tuoto duo̒lo wamilo boito u molumulo molambalo. Wamilo boito malo moo̒ohe. 15Tio mohutu bangusaa-U̒ meenggi obuheliilio wau modehu meiteduo̒. Wau̒ monganjamu kota limongolio boito wolo wamilo u molilingga debo odelo ilato, wau u dapadapato momate-mateelo mao̒. 16Wuu wamilo u molalito, polimadelo ode olowala wau ode oloihi, wau ode ambahu toonu wambai̒o modudua̒ otohilaamu. 17Wau̒ mamolaa̒apo uluu̒ olo, lapatao̒ omulukaa-U̒ mamoole. Wau̒, Eeya malo tahuda mai.”
Wamilo li olongia Babel
18 Eeya lotahuda mai odelaatia, tahuda lo Eeya, 19-20“Wuu manusia panaa, gaambalia mao̒ dulo dalalo u mowali polibaya li olongia lo Babel tamodelo wamilio. Dulo dalala boito musi tumulalo monto lipu u motutuu-wauwa; dalalo u tuwau dulu-dulunga ode Raba, kota Amon; u tuwau poli ode Yerusalemu, kota obiintengi to Yehuda. Popohulia mao̒ dupi polunu dalalo tou̒toonu dalalo boito mamotitango. 21Ti Olongia Babel timihulao̒ totili lodupi polunu dalalo boito. U motota mao̒ dalalo toonu umapo libayaalio, tio mohile potuhata monto babaa-laahalaalio, mohunggungo pana wau momalakisa hilaa lo binatangi u boheli pilopobake. 22Maa lopatao̒ pana u ilohamawa lo uluu̒ olowalalio otuoto Yerusalemu! Uito boliilio deu̒ ti olongia musi moluhu kota lo Yerusalemu, mongiibode mola tingalao̒ lo popaatea wau mopoa̒hu mao̒ suludadulio mohuludu pakaa-kasiyaalo poloohubu, mopohuli mao̒ to huhuu-hebuwaalo hulubangi lo Yerusalemu, molambulao̒ huta mowali dingingo meeseli pomalaalo wau mongau̒de tataa-nggiyaalo. 23Ulipu lo Yerusalemu diila tayaakini deu̒ timongolio tuhuwolo, sababu timongolio malo daantia wolo Babel. Bo laamali botie mamopo eelao̒ olimongolio deu̒ timongolio mawau̒polio sababu duduu-sawaalo limongolio. 24Wau̒, Eeya Taa Laba-labaalo molanggato lotahuda mai ode limongolio, ‘Duduusaamu mai̒lotahua wau ngoa̒amila tau lotota deu̒ timongoli ototala. Ololeetumu oontonga todelomo huhutuumu. Botia malei dungga wakutuulio timongoli hukuu-maniyola wau timongoli mawuduwo-U̒ ode musumu.’
25Wau odeli olongia lo Isirai̒lu Wau̒ motahuda mai, ‘Wuu olongia tamoleeto wau tamomaahu palenta! Saaa̒ti lo hukumanimu maleembidei. 26Wau̒, Eeya Taa Laba-labaalo molanggato malo tahuda mai. Yinggilaalo makutamu wau bua̒dilo sulubanimu. Botia, owowoluwoa malo bolio̒. Polaia̒alo huhuloa̒a lotaa mosikini wau wohia mao̒ timongolio kawasa! Polaahelo tahi kawaasawa monto dalaajatilio! 27Kota botie maa̒antuluwo-U̒ mai sama-samaata, tilinggula penu boli tou̒toonu odungga tutuuodeelo. Bo sua̒li boito boheli motoduo mai wonu bolo taa u tulaotu-U̒ mai u mohukuumani kota botie malei dungga. To olioolo mawuduwo-U̒ mai kota botie.’ ”
Wamilo wau taulo Amon
28“Wuu manusia panaa, polaamalilo mola! Poo̒taa mao̒ ode taulo Amon tamalohina Isirai̒lu, deu̒ Wau̒, Eeya Taa Laba-labaalo molanggato lotahuda mai, ‘Wamilo ngomato mapilo dapato u mongoloto; wamilo boito madilumbato molilingga debo odelo ilato, alihu podapatolo u momate-mateelo mao̒. 29Bibilohu u iloontonga limongoli yito paaluti, wau laamali uiloi̒ya limongoli olo toongi wau wimbulo. Timongoli moleeto boli momaahu palenta, wau saaa̒ti lo hukuumanimu u pulitio maleembidu. Wamilo boito mamolimade buloo̒omu.
30Wuu taulo Amon, muli potau̒paalo wamilumu! Timongoli mabutoo̒o-U̒ to tambati ilowalia wau pilotutua mai olimongoli. 31Wau̒ madiila mongoto-ngotongao̒ omulukaa-U̒ uwali-walihuhu ode limongoli. Wau timongoli mawuduwo-U̒ ode tau-tauwalo tahi palangia tamoolato u mopobinasa. 32Timongoli mamopulito maahu lotulu. Duhumu mamo bangguwato to lipumu lohihilao, wau diaaluo penu boli ngotaa mao̒ tadonggo moe̒ela olemu. Wau̒ Eeya malo tahuda mai.’ ”
Currently Selected:
YEHESKIEL 21: LAIGOR
Highlight
Share
Copy
Want to have your highlights saved across all your devices? Sign up or sign in
