YEHESKIEL 20
20
Kahandaki lo Allahu Taa̒ala wau ololeeto manusia
1To dulahu opululio hulalo olimolio, todelomo taunu opitulio maasa lo polayahu lami, dengolo lota tau̒wa lo Isirai̒lu lonao̒ mai odelaatia u lohile potuhata lonto Eeya. Tou̒ timongolio lotihuloa̒a totalu lowatia, 2ilodungohe lowatia Eeya lotahuda mai odelaatia, 3“Wuu manusia panaa, pobisalaalo tomongo tau̒wa boito wau polelea mao̒ deu̒ Wau̒, Eeya Taa Laba-labaalo molanggato lotahuda mai odie, ‘Buheli tutu timongoli mohile potuhata monto ola-U̒! Domi Wau̒, Allahu Taa̒ala tatumu-tumulo, Wau̒ diila ihilasi pohileyamu potuhata! Wau̒, Eeya Taa Laba-labaalo molanggato malo tahuda mai.’
4Wuu manusia panaa, malo tidapato yio̒ momutoo̒ olimongolio? Naa, ponao̒owalo! Poe̒elai mao̒ olimongolio to ngoa̒amila u kootolo u hepilohutu linenemoya limongolio. 5Potunggula mota wolo upilo tahudaa-U̒ mai botie. Wau̒ malo lulaoto Isirai̒lu wau lomintaa̒ tadia ode limongolio. To Masiri, Wau̒ lopobiloheo̒ batanga ode limongolio wau lotahuda, ‘Wau̒ulo Eeya Allahu Taa̒ala limongoli.’ 6Tou̒ boito Wau̒ lotadia mamodelo olimongolio u lumuala monto Masiri motidulunga ode lipu u tilulaotu-U̒ ode limongolio. Lipu boito kaya wau molomiodu, huta u mopiohe daa̒ to ngoilnggubu dunia. 7Ilahulaa-U̒ timongolio molapi bubuu-iyaalo moo̒olonuo̒ u otohilaa limongolio boito, wau dilini-U̒ timongolio moponajisi batanga wolo molubo babaa-laahalaalo monto Masiri, sababu Wau̒ulo Eeya Allahu Taa̒ala limongolio. 8Bo timongolio loluwali ola-U̒ wau diila lohuto lodungohe ola-U̒. Timongolio diila lohuto lolapi bubuu-iyaalo u moo̒olonuo̒ boito wau olo diila lohuto lohuheli hipoluboa babaa-laahalaalo lo Masiri. Tou̒ timongolio donggo mola teto, Wau̒ malo podapato ohilaa mopomukaa̒i omulukaa-U̒ ode limongolio. 9Bo Wau̒ diila lohutu mao̒, alihu tanggulu-U̒ diila mao̒ hinaa lo babaa-ngusawalo to tambati ilowoluwoa limongolio. Sababu totalu lo babaa-ngusawalo boito, Wau̒ malo pomalalumu deu̒ bangusa lo Isirai̒lu madeloo-U̒ lumuala lonto Masiri.
10Lapatao̒ dileloo-U̒ timongolio lotidulunga ode huta luasi ohungayo. 11Mola teto, yilohi-U̒ olimongolio papaa-lentaa-U̒ wau pilo ngaajali-U̒ bubuu-too̒o-U̒ u musi dungohe limongolio, sababu taa u modungoheo̒ madebo tumumulo. 12Ilahulaa-U̒ timongolio mohulumati dulahu Saabati odelo tuoto lo daantia-U̒ woli mongolio, u mopoe̒ela olimongolio deu̒ Wau̒ulo Eeya, malo potolomodu olimongolio ode Olau̒. 13Bo tohuta luasi ohungayo boito olo timongolio helo luwali ola-U̒. Timongolio helo lambanga papaa-lentaa-U̒ wau bubuu-too̒o-U̒ u mopongaku mao̒ deu̒ taa u modungoheo̒ debo tumumulo. Timongolio helo ponajisi daa̒ dulahu Saabati. Sababu uito, tohuta luasi ohungayo boito, Wau̒ ohilaa mopomukao̒ omulukaa-U̒ uwali-walihuhu ode limongolio wau mopobinasa olimongolio. 14Bo Wau̒ diila loponao̒ mao̒ domi ohulumati tanggulu-U̒, alihu tanggulu-U̒ diila mao̒ hinaa lo babaa-ngusawalo tamoo̒onto ola-U̒ mopolualao̒ Isirai̒lu monto Masiri. 15To huta luasi ohungayo boito olo Wau̒ helo ngaanjamu deu̒ bangusa lo Isirai̒lu diila tadeloo-U̒ tumuwoto ode huta u mapilohetu ode limongolio, huta u kaya wau molomiodu boli mopiohe daa̒ to ngoilanggubu dunia. 16Aanjamu boito yilapali-U̒ mai masababu timongolio helo malonga papaa-lentaa-U̒, helo lambanga bubuu-too̒o-U̒ wau helo ponajisi dulahu Saabati. Timongolio lebe motohilaa molubo babaa-laahalaalo limongolio.
17Bo lapatio mao̒ Wau̒ lodehu hilao toli mongolio, tilinggula timongolio diila lomata pilate-U̒ yila-yilateelo mao̒ tohuta luasi ohungayo boito. 18Bolii̒o mao̒, tahi muudawa towolota limongolio, yilohiya-U̒ naseehati odie, ‘Diila mao̒ podudua̒ wuwuu-uduwaalo u pilohutu linenemoyaamu. Diila mao̒ podudua̒ obobiaasa limongolio wau diila mao̒ olo ponajisia batangamu wolo molubo babaa-laahalaalo limongolio. 19Wau̒ulo Eeya Allahu Taa̒ala limongoli. Dungohiilo bubuu-too̒owaalo wau papaa-lentaa-U̒. 20Hulumatiyalo dulahu Saabati alihu mowali tuotolo daantia to wolota-U̒ woli mongoli, u mopoe̒elao̒ olimongoli deu̒ Wau̒ulo Allahu Taa̒ala limongoli.’
21Bo hilaide lotahi muudawa boito olo helo tibaaa̒ngi to Olau̒. Timongolio lolambanga bubuu-too̒o-U̒ wau lomalonga papaa-lentaa-U̒, u pongakuwalo deu̒ taa u modunguheo̒ debo tumumulo. Timongolio helo pokootolo daa̒ dulahu Saabati. Sababu uito Wau̒ malo podapato ohilaa mopomukaa̒i omulukaa-U̒ uwali-walihuhu tohuta luasi ohungayo boito wau momate olimongolio mate-mateelo mao̒. 22Bo Wau̒ diila lopohutu mai alihu tanggulu-U̒ diila mao̒ hinaa lo babaa-ngusawalo tamoo̒onto ola-U̒ mopolualao̒ Isirai̒lu monto Masiri. 23To huta luasi ohungayo boito olo Wau̒ lotadia deu̒ Wau̒ mamopo bubuua̒yawa olimongolio ode ngoilanggubu dunia, 24sababu timongolio malo malonga papaa-lentaa-U̒, wau lolambanga ngoa̒amila bubuu-too̒o-U̒, loponajisi dulahu Saabati, wau debo hipoluboa dedeewaalo u hepiluja linenemoya limongolio.
25Lapatao̒ yilohiya-U̒ mai olimongolio bubuu-too̒owaalo udiila mopiohu wau papaa-lentawalo u diila moo̒ wohi tutumulo. 26Piloluli-U̒ timongolio helo ponajisi batanga wolo babaa-keyaalo limongolio lohihilao, tumbao̒ walai̒ mongo lolai̒ tamohuhula hepilobake limongolio. Wolo dudelo boito, Wau̒ helo hukuumani mai olimongolio alihu otaawa mao̒ limongolio deu̒ Wau̒ulo Eeya.
27Naa, manusia panaa, potunggula mota ode taulo Isirai̒lu, wolo u Wau̒ Eeya Taa Laba-labaalo molanggato lotahuda mai olimongolio: Utie tuoto wewo u mopobiloheo̒ woloolo mola tinene moyaamu helohina ola-U̒ wau diila tatapu wau molotolo hilao to Olau̒. 28Wau̒ lodelo olimongolio ode huta u mapilo danti-U̒ olimongolio. Tou̒ timongolio loo̒onto huhuu-luduwaalo u molanggato wau bubuu-ngowaalo ayu mohimbungo, timongolio helo podewo bake to tataa-mbatiyalo boito. Timongolio helo pomuluka ola-U̒ sababu babaa-keyaalo yilalango wau dewo lo angguru limongolio. 29Wau̒ lohintu mai olomongolio, ‘Tataa-mbatiyalo molanggato wolo u henilao̒ limongoli boito?’ Yi tumulalo mai tou̒ boito tataa-mbatiyalo boito ilunteelio ‘Tataa-mbatiyalo molanggato’.
30Oditolio potunggula mota ode taulo Isirai̒lu wolo u Wau̒, Eeya Taa Laba-labaalo molanggato lotahuda mai olimongolio. ‘Yilongola timongoli hipohutua dusa debo odelo u hepilohutu linenemoya limongoli? Debo odelo timongolio, timongoli olo helo dudua̒ babaa-laahalaalo u moo̒olonuo̒ boito. 31Tumbao̒ tunggula to dulahee botie olo timongoli hemo ponajisi batanga wolo hemodelo dewo wau hemomobu mongo walai̒ mongoli odelo bake ode babaa-laahalaalo. Lapatao̒ tingga donggo buheeli timongoli mei̒ potuhata monto Olau̒? Domi Wau̒, Allahu Taa̒ala tatumu-tumulo, Eeya Taa Laba-labaalo molanggato, timongoli diila luasiya-U̒ mei̒ potuhata monto Olau̒. 32Timongoli motohilaa motutuu-wauwa wolo babaa-ngusawalo wewo wau ulipu lo lilii-puwaalo wewo tahi poluboa bungo lo ayu wau botu. Bo u otohilaa limongoli boito diila tao̒oma limongoli.’ ”
Allahu Taa̒ala mohukuumani wau mongambungu
33-34“Domi Wau̒, Allahu Taa̒ala tatumu-tumulo, Eeya Taa Laba-labaalo molanggato, timongoli poe̒ela-U̒ mai deu̒ sababu omulukaa-U̒, timongoli mapalentaa-U̒ wolo palangi wau pintalo tilinggula molaasa mao̒ kawasaa-U̒. Timongoli maa̒ambuwo-U̒ wau muli deloo-U̒ monto totoonulalo lipu tambati limongoli mapilo bubuua̒yawa. 35Lapatao̒ timongoli madeloo-U̒ ode ‘Huta luasi udiila mowali pobutua lo pilomulo lo babaa-ngusawalo’. Mola teto timongoli butoo̒o-U̒ wolo motaalua baya, 36debo odelo u mapilohutu-U̒ odeli nenemoyaamu to Huta luasi udiila mowali pobutua lo pilomulo lo Sinai. Wau̒ Eeya Taa Laba-labaalo molanggato malo tahuda mai.
37Timongoli mapohutuwo-U̒ mai wolo parangi alihu timongoli modungoheo̒ daantia-U̒. 38Tahipo malakalawa wau tahileeta mainggilo-U̒ monto huungi mongoli. Timongolio madeloo-U̒ lumualo monto lilii-puwaalo tambati biluloa̒ limngolio botia wau diila luasiya-U̒ muli mohualinga ode huta lo Isirai̒lu. Yi mao̒taawa mao̒ limongoli deu̒ Wau̒ Eeya.”
39 Eeya Taa Laba-labaalo molanggato lotahuda mai, “Wuu tau-tauwalo Isirai̒lu, botia bolo totoonulalo olimongoli. Potolongalo mola mohutu dusa wolo molubo babaa-laahalaalo limongoli! Bo eelailo deu̒ lapatao̒ uito timongoli musi modungoheo̒ ola-U̒ wau diilalo mopokootolo tanggulu-U̒ u mantali lou̒ modelo dewo ode babaa-laahalaalo limongoli boito. 40Sababu tohuta lo Isirai̒lu, to bolitutuo̒ lo hui̒du-U̒ u mantali, timongoli ngoa̒amila, bangusa lo Isirai̒lu mamolubo ola-U̒. Mola teto Wau̒ masanangi olimongoli wau motuhatawa mololimo babaa-keyaalo limongoli, dedee-wowaalo limongoli ulaba-labaalo mopoihu wau ngoa̒amila wowohi limongoli utolo-tolomodu. 41Lapatao̒ timongoli deloo-U̒ lumuala monto lilii-puwaalo tambati pilo bubuua̒yalio olimongoli, Wau̒ mamongambu olimongoli wau mololimo totoonulalo bake yilalango limongoli. Yi mao̒taawa mao̒ lo ngoa̒amila bangusa deu̒ Wau̒ botie Allahu Taa̒ala Taa Laba-labaalo mantali. 42Wonu bolo timongoli muli deloo-U̒ ode huta lo Isirai̒lu, huta u pilodanti-U̒ mai odeli nenemoya limongoli, yi mao̒taawa mao̒ limongoli deu̒ Wau̒ulo Eeya. 43Mola teto timongoli mamoo̒ eela mola to ngoa̒amila huhutu moo̒lonuo̒ u malo ponajisi batangamu. Yi timongoli mamolaasa motuo̒ moe̒ela mola totoonulalo uilowali mai boito. 44Wonu bolo timongoli mapilohutu-U̒ mai odito domi ohulumati tanggulu-U̒, wau diila motuuu̒de wolo pii̒limu u mobulilo wau huhutuumu u moleeto, yi mao̒taawa mao̒ limongoli taulo Isirai̒lu deu̒ Wau̒ulo Eeya. Wau̒ Taa Laba-labaalo molanggato malo tahuda mai.”
Tulu to ambahu huliaalio
45 Eeya lotahuda mai odelaatia, odie, 46“Wuu manusia panaa, pomilohulo ode ambahu huliaalio. Dinia mao̒ huta huliaalio wau tombulaa̒alo oa̒ayua mola teto. 47Ahuliilo oa̒ayua boito, modungoheo̒ wolo u Wau̒ Eeya Taa Laba-labaalo molanggato motahuda mai olio, ‘Dungohiilo! Wau̒ mamopo lei̒itai tulu u momobu tunggula maahu bungo lo ayu uwoluo to olemu, mopio u mohengu mopio u molomiodu. Tulu u lei̒-lei̒ita boito diila mowali pateelo. Tulu boito mau̒umalapo monto huliaalio ode tilayo, wau ngoa̒amila tau mamolaasa patulio. 48Timongolio mamongalati deu̒ Wau̒, Eeya malo polei̒ita tulu boito, wau diaaluo penu boli ngotaa tamoo̒ pate mao̒.’ ”
49Bo watia, Yeheskiel lopoi̒laalo kabalatani lowatia wau loloi̒ya, “Eeya Taa Laba-labaalo molanggato, diila mao̒ ahuli watia moloi̒ya mao̒ uito! Ngoa̒amila tau malo poi̒laalo suusa sababu watia motohilaa mobisala wolo pohumaya tilinggula mototolo paahamuwolo.”
Currently Selected:
YEHESKIEL 20: LAIGOR
Highlight
Share
Copy
Want to have your highlights saved across all your devices? Sign up or sign in
