TINGULI 33
33
Tei Musa helo balakati susuu-kuwaalo Isirai̒lu
1Tou̒ diipo yilate, tei Musa, utolia lo Allahu Taa̒ala helo balakati bangusa lo Isirai̒lu wolo tataa-heyaalo botie:
2“Eeya dungga-dungga mai lonto Hui̒dee Sinai;
Tio lobutu toitaato Edom debo odelo mato lodulahu
wau lonto Hui̒dee Paran Tio lolinelai umati-Lio.
Tio tilunuhe lo mopuulo lihulota malai̒kati;
tulu lei̒-lei̒ita to ambahu olowala-Lio.
3Otutu, Eeya momonu bangusaa-Lio
Tio moduo̒lai ngoa̒amila taa u mowali milikii-Lio.
Dulo ito mosujudu totalu lo oa̒a-Tio
wau modungohe papaa-lentaa-Lio.
4Butoo̒ uilohi mai lei Musa dungohento,
miliki ulaba-labaalo ohalaga ode lo bangusa botie.
5Tou̒ Isirai̒lu moa̒mbuwa wolo mongo tau̒waalio,
Eeya mowali Olongia to umati-Lio.”
6Pasali losuku Ruben, tei Musa loloi̒ya mao̒,
“Pohileaala dua̒ suku Ruben diila pee̒enta mao̒ binasa,
penu boli taulio bo ngoi̒di wambai̒o.”
7Pasali losuku Yehuda tio loloi̒ya mao̒:
“Eeya, ambunguolo dungohilo mai iibodu lo Yahuda;
ambunguolo muli potuwauwa mai wolo bangusaalio.
Ambunguolo popaateyaalo duo̒lo olimongolio, yaa Eeya,
ambunguolo tulungiyalo mai timongolio to laawani.”
8Pasali losuku Lewi tio loloi̒ya mao̒:
“Wolo Urim wau Tumim pilopo ilalo Eeya kahandaki lo Eeya,
lotimbulude to taulo Lewi wato lo Eeya tadebo molotolo hilao.
Eeya malo himontala olimongolio to Masa,
wau lobaatata woli mongolio tobutu lotaluhu Meriba.
9Timongolio tatapu wau molotolo hilao to Eeya mongilaboto lo totoonulalo mao̒,
mongilaboto lomongo panggola wau mongo pohutato.
Papaa-lentaalo Eeya dilungohe limongolio,
daantia lo Eeya ileela limongolio.
10Timongolio helo ngaajali umati lo Eeya lodungoheo̒ ngoa̒amila palenta lo Eeya
wau helo podewo bake toitaato mesba lo Eeya.
11Yaa, Eeya, ambunguolo tulungia mai umati botie alihu timongolio molotolo,
pohileaala dua̒ Eeya motuhatawa to kalaja limongolio.
Pobinasaalo mao̒ ngoa̒amila musu limongolio
alihu diilalo moo̒ bongu mai.”
12Pasali losuku Benyamin tio loloi̒ya mao̒:
“Uti-utieelo suku tapilonu lo Eeya.
Tio moduo̒lai olimongolio hui wau dulahu
wau motibiluloa̒ towolota limongolio.”
13Pasali lo wali mai lei Yusu tio loloi̒ya mao̒:
“Pohileaala dua̒ timongolio balakatia mai lo Eeya wolo didi,
wau wolo taluhu monto walungo huta.
14Pohileaala dua̒ timii̒du sembo dadaata daa̒ huhuu-ngowaalo
huhuu-ngowaalo ulaba-labaalo mopiohu u molutu to bungolio.
15Pohileaala dua̒ huhuuludio monto jamani muloololio mai daa̒
mopolu wolo tilapulo huta upolu-polutuo̒.
16Pohileaala dua̒ hutalio poo̒daatalio tutu wolo totoonulalo ulaba-labaalo mopiohu,
wau balakatia lo opopiohu Eeya
tahelo tahuda mai todiu̒to u hinta-hintalabu.
Pohileaala dua̒ balakati boito motuhutai ode yitaato wali mai lei Yusu,
sababu tiolo tau̒wa towolota lomongo wutatio.
17Tei Yusu o olootolo sapi lo oa̒yuwa tuwau,
wau tunge losapi ulai̒ lo oa̒yuwa
uitolo lihua lo Manasye wau pulua lihu lo Epraim.
Babaa-ngusawalo tiluwootio
wau yiluntulalio demola huhuu-duuwaalo dunia.”
18Pasali lo susuu-kuwaalo Jebulon wau Isakhar tio loloi̒ya mao̒:
“Pohileaala dua̒ Jebulon maa̒amulu sababu nonao̒olio,
Isakhar aamani sontosa boli maa̒amulu to kekee-maalio.
19Timongolio moloduo babaa-ngusawalo ode hui̒du limongolio
wau mopodewo bake u otutu mola teto.
Timongolio moo̒tapu okokaya monto deheto,
wau monto hungayo to ngohilayaa̒ biihu pentadu.”
20Pasali lo suku Gad tio loloi̒ya mao̒:
“Ilopujiaalo mola Allahu Taa̒ala
talo poluasi madala lo Gad.
Gad mohima debo odelo singa tuwau
mamo ngedenga polotodu meaalo alipo lo lunggongo.
21Huta ulaba-labaalo mopiohu hamaalio duo̒lo batangalio
tayadu lotau̒wa uiludu ode limongolio.
Timongolio moponao̒ totoonulalo palenta wau butoo̒ lo Eeya tou̒ mongo tau̒wa motia̒mbu pee̒-pee̒enta.”
22Pasali losuku Dan tio loloi̒ya mao̒:
“Dan debo odelo singa buboto tuwau
u lumantio̒ lumualao̒ monto Basan.”
23Pasali losuku Naputali tio loloi̒ya mao̒:
“Naputali pilopo daata daa̒ lo balakati wau ponu lo Eeya;
madalaalio lonto Bulalo Galilea demola huliaalio.”
24Pasali losuku Asyer tio loloi̒ya mao̒:
“Asyer bilalakatia mongilaboto susuu-kuwaalo wewolio;
pohileaalo dua̒ tio mowali tao̒ tolia̒ngo lo mongo wutatio,
wau bungo lojaitun mobutu molomiodu tohutalio.
25Pohileaala dua̒ kokoo-taalio tilanggua
wolo huhuu-hebuwaalo hulubangi lotombaha wau wate
alihu tutumulio laito aamani wau tantalamu.”
26“Wuu Isirai̒lu! Diaaluo ila debo odelo Allahu Taa̒ala limongoli;
Tio molibaya hulungo wolo ohohaama
wau molapata toheengo u motulungi olimongoli.
27Allahu Taa̒ala ohiheolo mao̒ mowali potiduo̒la limongoli,
polooto-Dio u ohiheo-hiheolo mao̒ molumude olimongoli.
Tio lopolahi musu lonto talumu,
wau lopoa̒hu olimongoli mopobinasa mao̒ olimongolio.
28Yi wali mola lei Yako matumumulo wolo tantalamu
tolipu u opale dadaata daa̒ wau taluhu lo anggurulio,
wau hileheeto wolo wambulo lonto hulungo.
29Potisanangilo tutu yio̒, wuu Isirai̒lu!
Diaaluo bangusa tadebo odelo yio̒ piloa̒ahu lo Eeya.
Eeya debo odelo wamilo wau polame olemu;
u mopoduulua olemu wau mopoo̒haama olemu.
Mumuu-suumu mamei dungga mai mei̒ tolia̒ngo,
wau yio̒ mamo lumbe-lumbetaa̒ olimongolio.”
Currently Selected:
TINGULI 33: LAIGOR
Highlight
Copy
Compare
Share
Want to have your highlights saved across all your devices? Sign up or sign in
