Lukas 6:27-49

“Duma ngini la Ai demo niiiseka orasi manena gena Ngohi totemo nginika, o nyawa nidodoosa de nidoduhudu, ona magena lo bilasu niadodara de lo niaaka daloha. O nyawa la kanaga inisilalahi, ma ngale ona magenaka bilasu o Gikimoika nigolo la Awi laha wasidumu, de lo o nyawa la manga sininga datotorou nginika, gena niasisumbayang. Nakoso o nyawa la nia ngingiti ma sonongaka yangapo, de hika nia ngingiti ma sonongali niahike la yangapo kali. De nakoso ngini la o nyawa nia baju yadehe, de foloi daloha nia kameja lo niahikeka. De lo nakoso kanaga nia arata moi la o nyawa ma somoa yagolo, de hika niahike bato onaka. De upa lo niagolo la isigiliholi nia moi-moi, nakoso o bi nyawa yodupa so yadeheka nginino. O gogoho kia naga ngini niodupa la o nyawa yaaka nginika, maro komagena lo ngini bilasu niaaka onaka. Nakoso niadodara la ka cawali o nyawa nidododara nginika, de nia manara magena nakoso o Gikimoi wafanggali gena ma loha lo ihiwa. O bi nyawa manga sininga foloisi datotorou lo, ona gena aku o nyawa yadodara la ma ngale o nyawa magena lo yadododara onaka. De nakoso o loha niaaka la ka cawali o nyawa o loha yaaaka nginika, de nia manara magena nakoso o Gikimoi wafanggali gena ma ngale lo ihiwa. Ce! O bi nyawa manga sininga foloisi datotorou lo aku yaaka maro komagena. De lo nakoso o pipi niasibau la ka cawali o nyawa yaaakuka nia pipi isigiliho nginika, de nia manara magena nakoso o Gikimoi wafanggali gena ma ngale lo ihiwa. Ce! O bi nyawa manga sininga foloisi datotorou, ona gena yodupa o pipi yasibau manga dodiao manga sininga datotorouka, sababu done aku yagololi isigiliho onaka. Ngaroko he upa komagena! Duma o nyawa nidodoosa ona gena lo bilasu niadodara de lo niaaka daloha. Nagoonaka bato o kia naga niasibau, de upa he niongongano done aku isigiliho kali nginika, de nia manara magena o Gikimoi wafanggali gena foloi ilamo. Nako komagena, de ngini gena niaaka imatero de nia Baba o sorogaka Awi ngopa-ngopa. Sababu Una Awi sininga ma loha gena ma meta o nyawa yananakowa manga sukuru yatide de ma meta lo o bi nyawa manga sininga datotorouka. Nia Baba kadaku o sorogaka gena wagalusiri o bi nyawa yangoduka, so ngini lo bilasu niagalusiri o bi nyawa yangoduka.” “Upa o nyawa niasisala, la ma ngale ngini masirete lo o Gikimoi asa upa winisisala kali. Upa lo nitemo o nyawa o sala yaaaka, so ona magena bilasu yasangisara, la ma ngale ngini masirete lo o Gikimoi asa upa winisangisara kali. O nyawa manga sala gena bilasu niasiapongu, la ma ngale ngini masirete lo o Gikimoi asa winisiapongu kali. Ngini bilasu niahike o nyawa ma somoaka, la ma ngale ngini masirete lo done o Gikimoi asa winihike kali. Una magena winihike o ngongike daloloha gena de ma boloika de iwedo-wedo wosituga nginika, sababu o duduga kiaka ngini o nyawa niasituga, maro komagena lo asa o Gikimoi winituga ngini kali.” Dabolo de o Yesus lo woade-ade onaka maro komanena, “Nakoso o nyawa moi wopipilo watuda o nyawa ipipiloli, de igogou yasinoto asa itura o busuneku. Nako o muri ona gena, igogou idadiwa itemo, ‘Nako ngohi de ai guru, ngohi foloi tolamo.’ Ka daloha nakoso idadi o muri moi womaaka maro awi guru, hitilahi awi sakola wasiboloka. Ce! To ngini nia dodiao manga sala daceke maro o gaapo manga lakoka de magena aku niakelelo, duma niakelelowa kanaga nia sala ilalamo maro o ifa moi yodebesu nia lako masireteka. Idodooha so ngini nitemo nia dodiaoka, ‘Nahino la ngohi o gaapo ani lakono tosisupu,’ duma kanaga lo maro o ifa moi yodebesu to ngini nia lako masireteka. He! Ngini manena nikokulai! Ma nonomaka ngini bilasu o ifa moi yodebesu to ngini nia lako masireteka nisisupu kasi. Dabolo la nia lako asa datebika, de asa idadi so o gaapo nia dodiao manga lakoka gena aku niakelelo so nisisupu kali.” “Kanaga idadiwa o gota daloloha gena ma sopo datorou, de lo o gota datotorou gena ma sopo daloha. Ngone asa panako o gota daloloha de o gota datorou nako ma sopoka ponano. Idadiwa o ngangaru datotopoka ma sopo o ara, eko pamake ma sopo o anggur. Komagena lo o nyawa o duniaka. O bi nyawa ma loha gena igogou o demo daloloha yobicara, sababu manga sininga ma rabaka o bi moi-moi daloloha yadiahi. O bi nyawa ma dorou gena manga bicara lo datorou, sababu manga sininga ma rabaka o bi moi-moi datotorou yadiahi. Sababu o kia bato manga sininga ma rabaka, magena asa isupu so yosibicara.” “Dadoohaso ngini Ngohi niaso ‘Jou! Jou!’ duma niaakawa o bi moi-moi o kia tinisusulo nginika. O nyawa la kanaga yahino Ngohika, Ai demo manena yoise de lo yaaka, o nyawa ona magena pasitero maro o ade-ade manena: O nyawa moi la kanaga o tona wapuawe walukuku so awi tahu ma sosode wosigoko o teto ma dokuka. La ma orasi imuura, de o nguuhi so o selera ma ake dasosihilo idola asa o tahu magena yatusa, duma maena irubawa, sababu isigoko o sosode dapoputuruka. De o nyawa la kanaga Ai demo manena yoise duma yamotewa de yaakawa, ona magena imatero maro o nyawa moi la kanaga awi tahu wosigoko ka o tonaka de ma sosode o teto lo ihiwa. Ma orasi o selera ma ake dasosihilo asa o tahu magena yatusa, so imatodoka o tahu magena iruba de ibiau dangodu.”