Lukas 5
5
Ma nonoma-nomaka o Yesus o nyawa waaso la idadi to Una Awi muri
(Matius 4:18-22, Markus 1:16-20)
1So ma moiku o Yesus kanaga womaokoye o Genesaret ma talaga ma dateka, de o nyawa yadadala iwisidehelo Unaka, yodupa o Gikimoi Awi demo yoise. 2Kagena o talaga ma dateka de Una wakelelo o deru ngai sinoto. O orasi magena o nao isasari ona magena youtika, de manga soma yatiodo. 3So Una o deru moiku wopane, gena o Simon awi deru, de wogolo la o Simon awi deru magena o dowongika de wasihito wosikahoko sutu ikuruka. Dabolo de Una o deruka wogogeku de o nyawa wadoto. 4Una wadoto daboloka, de asa wotemo o Simonka, “Nosihoru iluku-lukuko de o nao nasoma.”
5De o Simon wotemo, “Baba Guru, o putu moi ngomi mimanara duma o nao moi lo miamakewa. Ngaroko komagena, sababu Ngona ngomi nomisuloka, so ngohi asa ai soma taumoli.” 6Kagena de manga soma yaumoka, de ato yanano, pei, o nao gena ka idala poli iwosa sidago manga soma yaliaye gena he iracaka. 7So manga dodiao o deru ma somoaka gena, ona imagaso la ona magena yahino imakiriwo. So igogou ona yahino de o deru sinoto gena o nao isingado iwedo-wedo sidago o deru magena he dangade dalutu.
8Magena o Simon Petrus wakelelo, de gila-gila una wobukuku o Yesus Awi simaka de wotemo, “Jou, noidongosa ngohi! Sababu ngohi o nyawa ma dorou!” 9Awi demo komagena, sababu una de lo awi dodiao ona yangodu yosawangi yakelelo o nao ma dala komagena de yamake. 10Komagena lo o Yakobus de o Yohanes yosawangi, ona yasinoto magena o Zebedeus awi ngopa, o Simon awi dodiao imomanara.
Kagena de o Yesus wotemo o Simonka, “Upa nosawangi. O orasi manena asa o manara damomuane tonihike la ngona o bi nyawa asa nadoto la imote Ngohika, imatero maro o nao nasoma la natolomu.” 11Dabolo de gila-gila ona manga deru yalia o dowongisa, de manga moi-moi ona yodongosa de ona yaruwange o Yesus iwimoteka.
O Yesus wipapado moi wisiloha
(Matius 8:1-4, Markus 1:40-45)
12Ma moiku de o Yesus kanaga o doku moika, de o nyawa moi wipapado, awi rohe yapasiku, una magena iwimakeka, de wobukuku wosuba de wotemo, “Baba, nako nomode, de igogou aku noisiloha.”
13Magena de o Yesus Awi gia watoa de una magena, ngaroko wipapado, duma awi roheka wapada, de wotemo, “Ngohi tomode, so nilohaka bato.” So o orasi magena dabolo de una wilohaka so he wipado kawa. 14Dabolo de o Yesus wipoma wotemo, “Upa nodedemo o nyawaka. Cawali nogila-gila o imamka, la ani rohe yatailako. So naaka maro o Musa awi bobita wotetemoka, de ani gaso natota o Gikimoika, maro o sinako moi o bi nyawaka igogou ngona nilohaka.”
15Duma o habari magena isihabari kiaka bato, so yogiise de o nyawa yadala icarawa asa yakahika Unaka, gena yodupa yoise Awi dodoto de yogolo manga panyake wosiloha. 16So Una bilasu womatinga wahika o riho moika de o riho moi kali, la kagena asa Una wosumbayang.
O Yesus wolulugu moi wisiloha la yanako Awi kuasa ma ngale o dorou wosiapongu
(Matius 9:1-8, Markus 2:1-12)
17O wange moiku o Yesus wodoto, de kanaga o Farisika ma nyawa de lo o guru agama ona magena yamuruo naga kagena yogogeku. Ona magena yahino o Galilea ma tona ma sigilolino, de komagena lo o Yudea ma daerano de lo o Yerusalemno. O Jou Gikimoi Awi kuasa kanaga Unaka la o bi nyawa manga panyake aku wasiloha. 18So Awi manara ma rabaka, de o nyawa wolulugu moi awi nyawa yamuruo naga so o dangiku#5:18 o dangiku: Gena ma ngale o dangi ma ceceke moi ma ronga o kokiroba, ma orasi o nyawa yasiri eko ibodito de kugena yasitide. iwisitide. Ona o ngeko isisari o tahuka yowosa, yodupa iwingaho o Yesuska. 19Kagena o nyawa yadala poli, so idadiwa yahika Unaka. Yahika idadiwa, so o tahu ma dokuye idola de o katu kudaku yahoi, so o dangiku wingado la kugena o Yesus Awi simaku iwisiha o nyawa manga sidongirabaka. 20La o Yesus wakelelo manga piricaya ma lamo komagena, de wotemo woluluguka, “Ai ngopa, to ngona ani dorou tosiaponguka.”
21Duma ona gena o Farisika de o bi guru agama kanaga manga sininga ma rabaka itemo, “Wobarani bolo! Wotemo woluluguka, ‘Ani dorou tahoi.’ Ngone panako ka cawali o Gikimoi aku o dorou wahohoi, so Awi demo magenena ma meta o Gikimoi wisiceke.”
22Kagena de manga sininga ma takasiri o Yesus wosihoda, so wotemo, “Upa niafikiri koloko to ngini nia sininga ma rabaka. 23Nako Ngohi totemo, ‘Ani dorou tosiapongu,’ de nakoso imahoi, eko hiwa, ngini niakelelowa so nianakowa. Duma nako totemo, ‘Nomaoko la notagi,’ de ngini aku niakelelo de nianakoka Ai buturu iwisilohaka. 24So Ngohi asa towisiloha la asa ninako, Ngohi o Nyawa ma Duhutu manena o duniaka tahino de Ai kuasaka la nia dorou tosiapongu.” So wotemo woluluguka, “Nomaoko! De ani dangi naaho la noliho.” 25Ato wobicara dabolo, de una magena gila-gila o nyawa manga simaka womaoko awi dangi watoti de womajobo woliho, de o ngeko ma soaka una o Gikimoi iwisigiliri.
26Ma orasi o kia idadadika gena yakelelo, de o nyawa magena yangodu yamodo de yohairani icarawa, de o Gikimoi wisigiliri itemo, “Igogou! O kia naga ihahairani moi o wange manena pakeleloka.”
O Lewi de lo o bi nyawa yahoholu ma binuka o Yesus waaso
(Matius 9:9-13, Markus 2:13-17)
27Dabolo de o Yesus kagena wokahika, de wikelelo o nyawa moi o balastengi wototolomu, awi ronga o Lewi (iwisiaso lo o Matius), o kantorka wogogeku. Kagena de o Yesus wotemo unaka, “Nahino noimote Ngohi.” 28Gila-gila o Lewi womaoko, de awi moi-moi dangodu wodongosa de wotagi o Yesus iwimoteka.
29Ma orasi magena ipasaka, o Lewi o rarame waaka awi tahuka, de o Yesus womatamiye woodo. De o balastengi itotolomu yadala de o bi nyawa yadala manga sininga datotorou o bi kawasa yahoholu, ona magena lo imatamiye yoodo de o Yesus. 30Kagena de o bi guru agama yamuruo naga, ona magena o Farisika, Una wikelelo womatamiye woodo de o bi nyawa ma dorou magena, so ona asa imaridemo de Una Awi muri-murika yotemo, “Aistagala! Dadoohaso Una woodo de o balastengi itotolomu de o bi nyawa ma dorou ona magena.”
31Duma Una wogiise manga demo-demo magena de Una wosango wotemo, “O nyawa yapoputuru upa he ma dokterka yahino, cawali ka o nyawa yasisiri. 32Magena imatero maro Ngohi tahino gena, taasowa o nyawa la kanaga itemo manga sininga itotiai, duma ma ngale taaso o nyawa de manga dorouka, la ma ngale manga dorouno gena ona aku imatoba de imatoduba.”
O Yesus de Awi muri-muri so upa he ona yoodowa de lo youdowa
(Matius 9:14-15, Markus 2:18-20)
33O orasi magena o nyawa yahino o Yesuska, yosano itemo, “Baba, o Yohanes Wooosi awi nyawa wimomote de o Farisika ma nyawa masoa-masoa gena iodowa de iudowa, duma dadoohaso to Ngona Ani muri-muri gena ka iodo de lo iudosi.”
34Kagena de o Yesus wosango de wosiade-ade wotemo, “Ma orasi o kawi ma rarame ma rabaka, de wokakawi una magena de o nyawa yakokoro yahino kagena so imatamiye, de imatekedodiao de o nali de o more ma dongirabaka, igogou itiaiwa nakoso ona yoodowa de youdowa. 35Duma done ma orasi imasidiado la wokakawi una magena wituda wisisupuka to ona manga sidongirabano. Done ma orasi magenaka asa ona iodowa de iudowa.”
O ade-ade itemo idadiwa o Yesus Awi dodoto isicapu de o Yahudika manga adati
(Matius 9:16-17, Markus 2:21-22)
36Dabolo de o Yesus wotemo o ade-ade ngai sinotoli, “O nyawa moi lo pamakewa o baju damomanalo de asa isitapa de o baro damomuane. Sababu ma dadapa damomuane magena isilia sidago o baju damomanalo magena itola so yaraca, de lo ma dadapa gena o baju damomanaloka asa panano datorou. 37Komagenali o nyawa moi lo asa pamakewa, o anggur damomuane de yoguse ma ngihi idodomaku, upa sidago o anggur damomuane done asa iwaka so ma ngihi idodoma magena yapolote. Ma dodoguku ma anggur de ma ngihi sinoto lo sona podahewa. 38So o anggur damomuane gena bilasu poguse ma ngihi lo damomuaneku.
39O nyawa moi lo asa pamakewa, nakoso o anggur idodoma yaudo kasi de yodupa o anggur damomuane yaudo. Komagenawa, sababu itemo, ‘O anggur idodoma gena ifoloi damonge.’ ”
Currently Selected:
Lukas 5: LAIGBI
Highlight
Share
Copy
Want to have your highlights saved across all your devices? Sign up or sign in