Kini Wuppiige 3
3
Iniki warak logonet, ambinom eekkologo logorak wone
1Naput wae.
Kogoba an nen wone mamunggege nogo mari eerogo mbo puurak mage o.
Ata, “Yogop ee'nu ndogop ee'nu,” wone yokkege nogo kinikime liirogon porogo logot o.
2Wone ti paga nen kat ndarak eyom nggorek eerogo pagage,
Aakelo li a'nuk, kambuurak eeppagage,
Kiniki ugun tayenak lombok logonok nduk eeppagage,
Eeke kaamunggun o.
3Kat Ala kiniki kunik eeke,
At oone yugu nogo liirogon mugurok nage,
Eeke nogo
Kat nen mbo puurak mage o.
Ata, kagiinggen kwak kenggaanok me yikkolage,
Kinikime liiru negen mbanogo pake,
Eeke logot o.
4 #
Luk. 2:52
Togop eeke keenok, Ala enegen keege, aakumi inigen keegwi, eeko logonet,
Inale'nggen koba pagagwi, “Aap yi obeelom o,” yinuk, yogwe,
Eeko logogun o.
5Yi wone ndi wone keenu agagindak paga kiniki panggombunuk logorak mage o.
Ata, kiniki ambit eeppunuk, at Aliku ALA oba panggombunuk logot o.
6Ala nen eeriyak kombake nogo, “Eerikit o,” yinuk, yi eekak ndi eekak eerit nage keenok,
At nen eeriyak abok aret karu koonogo pagage logogin o.
7 #
Oro. 12:16
“An wone abok neenu aret o,” mbake ti mage o.
Ata, Aliku ALA kagabiti mbake, maluk kenok ogole nen mbagangge,
Eeke logot o.
8Ti eeremenggendak paga obat kwak kat keebe andi lek eekkake,
Kowak omaawi eerogo pagage,
Eerigin o.
9Kat kamendek kiniki kundugu paga,
Kamendek iyaalok yugu anggen mbanak paga,
Aliku ALA endage tiyappege logot o.
10Ti eeke keenok, anggen mbanak pege menggenom yagabit age,
Anggur amburu aambiranogo toologo pege menggenom kilu-kilu wungge,
Eeke kaamunggun o.
11-12 #
Ayup 5:17, Wayu 3:19 Naput yi wae.
Aap ambi aput iniki kunik nen iniki koonnaruwak nduk mberege menggi kwak,
Aliku ALA nen it aap iniki kunik nogo iniki koonnaruwak nduk, eeppiige menggerak me,
At Aliku ALA nen kiniki koonnaruwak nduk, eeppagage kenok, “Neebi o,” yinuk, mbo pege,
Karuk wake kenok, “Koneniyak anggon o,” yinuk, teppege,
Eeriyak mage o.
13-14Mbuti perak onggo kunggologwe paga ambinom iya negen nabenogo kologo menggaarak kwe,
Iniki warak logonet eerit nugwi ti perak, iya lombok eekkologwe,
Ndi, mbuti emas paga yelok-malok eerogo iya lombok nabenggologo menggaarak kwe,
Iniki warak nen eerit nugwi ti perak, iya lombok eekkologwe,
Eeko menggaarak.
15Yugum etenggen kere'li-kere'lo eerak ti, onggo iya negen kwe,
Iniki warak perak, iya lombok wonage,
Kat nen yi mendek ndi mendek abe kenok, koloorak uugwe mbake nogo ti, iya negen kwe,
Iniki warak koloorak uugwe mbake ti perak, iya lombok wonage,
Eeke menggerak o.
16Iniki warak ti nen eenggi abe paga aap nda'nagagerak eyom nggorek eerogo punuk wonage,
Eenggi kwaarek paga nen aap ineenggi warak eeppiiga inom,
Inayuk warak inom, piirogo wonage,
Eeke menggerak o.
17Iniki warak nen yorage eerit nogwe iinok, inale'nggen ambik aret kogwe,
At nen tu titik irage abok aret mugurok nogwe iinok, iniki ugun obeelom aret wonogwe,
Eeko menggaarak.
18Aakumi nen iniki warak ti waganggwi iinok, eyo ki pogom ineenik aret kologwe,
Aap nen iniki warak nu'lek pipporogo wonogwe iinok, inale'nggen aret kogwe,
Eeko logogun o.
19Iniki warak paga Aliku ALA nen o nggween yi, alom ndoonogo pege,
Wone alom eenu paga nen mbogut ti koonogo nappege,
20Yi wone ndi wone eenu paga nen niyo agi-ogu mogonogo pege,
Ndugwi nen konaananggen luurogo pit wambi woraawak nduk koonogo pege,
Eereegerak o.
21Togop me, naput yi wae.
Iniki warak nen koonit nega inom, yi wone ndi wone yelok kaga inom, ti, kenegen lambek kaagun o.
Ata, mondok nggirik-nggerok porogo logot o.
22Pipporogo wonage paga keebe kili eerogo pagage,
Keebe amuni mbanak keyaawak nduk,
Kagiinggen kenggaanok me yirik kwak eeppagage,
Eeremenggerak me,
23Kat tu kuuri'me aret nage,
Kiyok paga iri'ngga ambi yiluk yaga'lek nage,
24Kogut naga'lek kagak ugun winnage,
Nogo nggaruk lek yippunuk, kale'nggen paga keenik age,
Eeke logomunggun o.
25-26Aliku ALA nen kat pikkeren nage,
Kiyok nggerok yukwak, “Keele pugu yi o,” yokkege,
Eerigin me,
Kagabolo ne agan noorak mendek yini-panip koba ari wage,
Aap maluk eeka lek eerogo piyoorak mendek kat kunduk koba kwi'nari wage,
Eeke kenok,
Kat kagabiti mbariyak mage o.
27Aakumi eeppiyaanok nduk unde eeppagamenggerak logonet,
Op eerit nugwi iinok, non mbanogo piiga'lek obeelom eeppiige logomunggun o.
28At wogoriyak wonage kagak, koreeluk yoge logonet,
“Ko'lu wokkirikit nen yogondak we aret kame nak o,” yinuk, wogoga'lek porogo wonage,
29Aap kore ambi nen, “At op aret nimbirak wonage,” kombake kagak, maluk eeppuurak koonogo pege,
30Alom lek kagak aap ambi kimbirak ndugwi pege,
Maluk eeppagulik kagak, koone omaawi yoge,
Eeriyak ti mage o.
31-32It aap ineraambe nggolawe iinok, Aliku ALA eebi lombok inombake,
Ndi, it aap iniki koonak iinok perak, at iniki kunik lombok eeginake,
Eeke menggerak me,
Aap inogogun worokot logonet, inamendek abe kenok, “An ambi kolaakit lak it mban kologwe yi, ao,” yinuk, keebi inombake,
It eerit nugwi nogo, “Eeke logokit o,” yinuk miike,
Eeriyak mage o.
33Aap maluk mendek iname ti, Aliku ALA nen pulunogo piige menggerak kwe,
Aap abe iniki koonak menggam ti perak, ale'nggen eerogo piige menggerak o.
34 #
Yak. 4:6, 1Pet. 5:5 It miyuk-meya eerogo piiga ti, Aliku ALA nen it aret miyuk-meya eerogo piige menggerak kwe,
Aap iniki tebenak wonogwe iinok perak, inabuwa nen obeelom eeppiige menggerak o.
35Aap iniki warak kenok, yate kwak inendage tiyanak logowak nduk eeppiige menggerak kwe,
Aap iniki lek wi negen kenok perak, inenggali mbakak nugwi iyaawak nduk, eeppiige menggerak o.
