Kini Wuppiige 2
2
Iniki warak logonet, eekkoloorak wone
1Naput yi wae. Noone yokkege yi, liirogon wagangge,
Wone, “Yogop ee'nu ndogop ee'nu,” yokkege yi, waganogo kiniki paga lombok pake,
2Kiniki warak ariyak wone yogwe nogo, karuk liirogon konengge,
Yi wone ndi wone alom keenu ariyak kiniki liippit nage,
3Wone alom kin kaakit nduk, “Yo'ninip o,” agan nage,
Neenu arikit nen, “Yo'ninip o,” yinuk, kin wonet nege,
4Mbuti perak kwaarit nogo mengga kwak keenu ariyak mendek kwaakkolage,
Inamendek iniki kundugu wanggetak kwaarit-mberaarit nogo mengga kwak, kwaarit nage,
Eeke keenok,
5-8Aliku ALA nen aret iniki warak lombok eerogo piige,
At oone paga nen yi wone ndi wone ineenu eeppiige,
Wone alom ineenu eerogo piige,
Aap iniki abe koonak nen wone kobak ogwe iyo, wone koleewak wone yorage,
Aap inoba maluk lenggengga'lek logonet, eerit nugwi nogo inanggeemu kwak age,
It aap a'me nggelok eerit nugwi nogo inarum wake,
At wone liippunuk eerit nugwi nogo, inili eerogo piige,
Eeke menggerak me,
Nonggoti eerogo Aliku ALA inagabiti mbako logorak nogo liippege,
Ndi, at Ala ineenu ariyak nogo mamunggolage,
Eerumunggun o.
9Togop eeke keenok,
Abe koonak eeko logorak mendek inom,
A'me nggelok eeko logorak wone inom,
Wi-wi aganaka'lek ndak-ndak mban ko'net nogo logorak inom,
Eerit nogo logorak wone ti abok aret liippumunggun o.
10Kiniki warak lombok eekkake,
Yi wone ndi wone keenu age keenok, wone ti nen kinikilom eerogo pagage,
11Yi wone ndi wone kin kage keenok, wone ti nen kili eerogo pagage,
Wone alom keenu age keenok, at nen unde wakkake,
Eeke logogin o.
12-15Aap aakumi inambokan laganiyak nduk, agan nugwi nen
Tu o apit aago paga nogo logowok nduk tu koonak mbo punuk, tu alik paga nogwe,
Maluk eerit noorak inikilom mbakwi,
Eeriyak lek mendek kagak maluk aret eerit nogo logorak inale'nggen mban mbarit nogwe,
Tu yelok-nggolok nogwe,
Inobaabut nggolawe me, ugun-ugun eerit nugwi,
Eerit nugu menggaarak ti,
Abok aret it wonogwe me nen wone alom keenu logonet, kiniki warak paga kagap ndarogo pagage logogin o.
16-17Kwe ambi lambumbugwi me, “Kat nore lombok aret o,” yinuk, Ala enggaanom paga ore yoremenggerak nogo mbo pege,
Tawe paga ogonggelo imbirak lambunik iniki kunik nogo tayoppege,
Eeppunuk,
Mbabi eerit nege logonet, oone amburu ndik-ndik yokkege kenok, kiniki warak nogo nen,
Kwe ti, ogole nen mbaganenok nduk, eeppagage logogin o.
18Kwe ti ame nage keenok, kambunuk nogo menggam aret nage,
Kambeegwaarak inogoma wonogwe me iya nage,
Eeriyak me,
19It abok aret at ka nogo nagaatik, iniyokan wogwe,
Tu ineenik ogo menggam nogome nogwe,
Eekulik aret menggaarak o.
20Togop aret me, naput yi wae.
It aap abe eerit nogo mengga kwak eerit nage,
Aap iniki abe tu nogo menggaarak paga mban nage,
Eeke logot o.
21Aap iniki koonak nen o nggween yi paga wonogwe,
Ndi, aap maluk inoba lenggenggulik nogo
O yime ye mbambatinuk wonogwe,
Eeko logogun kwe,
22Aap maluk mendek perak,
O nggween yi paga nen ineebe lek eerogo wumbiige,
It aap Ala liirogon mugurok nogolik nogo iri'ngga kinogo wumbogo mengga kwak, eerogo nappiige,
Eerigin o.
