Roma 12
12
Akoni nen Allah apma dogolik kagako dogusak wene
1Nagarlagi nirugi o. At Allah ninebe ninaʼbuwa yiluk wene omanggi kinakla nggagalik. Allah anggo wako laguka kak, kinebe kiniluk dogolik, at enggaerek ake ʼbiyalok, at akla warlok mende etiat wogoko dogono o. At apma dogolik, at ake kagasusak mende esigit dilugat kagako dogono o. 2Akoni yoma kagarigogi mende eti inobabut waganggup o. Kinobabut ngget ninat kagat lasuwagaluk, at Allah nenat kinakla ngget mende kagat kinako dogowak o. Esigit diluk kagat kinako dogumo, at akla nen,
“Yigit diluk kagasuwak, ndigit diluk kagasuwak,” yiluk ambiligogo eti ebe kinilu asigin o. Pano mende ebe etiat o. At Allah akla warlok mende kagakik, inendainggen korle agik, kagarigogo ebe eti nenat o. 3At Allah obabut pano nen, yigit diluk kagako dogowagaluk nayonggo ʼbisike eti paga, wene omanggi yi kinebe dombok kinasuk wasik. Kit, it amberek inapma dogusak nggorlek, kinakla nen,
An nebe nggok, yiluk kinendainggen siyat dakausak dek. At te, Allah nen kinebe dombok kinendainggen at oba panggot disi dogowagaluk kinobabut dombok wokisasike ndak-ndagat, kinendainggen sebekogo dogolik kinaren mbalasi dogono o. 4Ninebe yi, nininggi, niniyok, ninebe paga kunik mende dogalegat werek o. Esigit diluk werek mende, ninebe paga kunik mende eti, ineyabu dombok kagako dogowagaluk kunogo ʼbinanggike. 5Eti kak, ninebe dogalegat werek mende, Kristus ninom omanggiat kunogo ʼbinanggikemo werek o. Ninebe omanggiat mende, nininggi niniyok ninebe paga kunik dogoligogo eti kak, ninagarlagi ninirugi ninom esigit diluk werek. 6At Allah obabut pano nen, nit taʼbokogonat ninobabut dombok woknisasike eti paga, at nen woknisasike ndak-ndagat kagako dogusak o. It amberek nen Allah wene yogisasi dogowagaluk inobabut wogisasike mende, inendainggen at oba panggot diluk dogoligogi ndak-ndagat yogisasi dogusak. 7Nen, it amberek nen, akoni yamagiyasi dogowagaluk inobabut wogisasike mende eti, panorogo yamagiyasi dogusak. Nen, it amberek nen, wene yanggul isasi dogowagaluk inobabut wogisasike mende eti, panorogo yanggul isasi dogusak. 8Nen, it amberek nen, akoni inendainggen aik wako dogowagaluk inobabut wogisasike mende eti, esigit diluk panorogo kagako dogusak o. Nen, it amberek nen, inamende it akoni inamende dek mende sumburisasi dogowagaluk inobabut wogisasike mende eti, inaʼit agidek debekogo wogisasi dogusak. Nen, it amberek inewe nggok dogowagaluk inobabut wogisasike mende eti, inobatnerogo kagako dogusak. Nen, it amberek nen akoni inaʼbuwarogo kagarinako dogowagaluk inobabut wogisasike mende eti, inakla arlenggen kasi dogolik inaʼbuwarogo kagarinako dogusak o.
Allah aʼburi nen inobabut kagako dogusak wene
9Kit kinendainggen oba nenat akoni amberek inaʼbuwarogo dogono o. Weyak mende kinaʼit mondok dogolik, pano mende kinobatnerogo pago dogono o. 10Kinagarlagi kinirugi Allah aʼburi mende eti kinebe ap omanggiat nen endago mende negen, kinendainggen kunik inaʼbuwarogo dogolik, kit-kit kinagarlagi kinirugi kinom kinalon pal-pal dogono o. 11Allah Agurengge nen kinakla nggagalko nggorlek, ninewe Endaganggok ake kinaʼit agidek, kinobatnerogonat kagako dogono o. 12Kit nen,
“Yabunggane at Allah nen pano kagasigin werek o,” yiluk, kinakla arlenggen kalok, yi aik ndi aik kasi dogolik, kinobakanini kambuk yiluk sembayan togot digidek yisi mondok dogono o. 13Allah aʼburi mende yi mende ndi mende dek kalok sumburisigik, ap kuso inebe kinonggodek mende wagonem kinaguma panorogo woginakik, kagako dogono o. 14It akoni amberek nen weyagat kinakonem, Allah nen it panorinabuwagaluk ayonggo ʼbisi dogono. Weyagarinabuwagaluk inalem ʼbiyigidek, panorinabuwagaluk ayonggo ʼbisi dogono o. 15It akoni amberek inakla arlenggen kasi kalok, kit kinomat kinakla arlenggen kigik, it amberek de ako kalok, kit kinomat de akik, kagako dogono o. 16Akoni amberek kinelokoma ʼbiyigik, amberek kinomborlikngge ʼbiyigik, kagakidek, inaʼbuwarogo imbisak ndak-ndak arlek kagarinako dogono o. Ap nggokndek inobabut kagarigogi mende eti, kagakidek, inapma dogolik kagarigogi mende etiat kagako dogono o. Kinakla nen,
“An wene mondok nilu o,” yiluk kinenggaerek nen pogorakagup o.
17It akoni amberek nen weyak kagat kinakonem, kit nen onggo dagakogo weyak kagarinako dogogup o. Akoni taʼbokogonat inilenggen kiyalok nen,
“It pano kagarigogi o,” yiluk kinabok pano yisi dogowagaluk, kinakla ambalok nen panorogo kagako dogono o. 18Akoni taʼbokogonat kinom pano dambukogo doguwogoluk, kit kinobabut pano kagasusak mende mot-morat kagako dogono o.
19Nagarlagi nirugi o. Kinebe kinaʼbuwa o. Akoni nen kit weyagat kinako kalok, kinenggaerek nen onggo ʼbugup o. At te, Allah akla agaga dagaluk, at nen kagasuwak nen, at inggi paga ʼbisi dogono. Wene esigit diluk kagako dogusak, yiluk kolal yigit diluk mbalek werek,
“Wene an nen moret digik, onggo an nen inakik, kagasigin o, yiluk ninombae Endaganggok nen yiligogo,” (Ul. 32:35)
yiluk kolal mbalogo ʼbisuka. 20Eti paga, kit nen, men kagasusak.
“Akoni kinom weyak mende eti kimbiri abu werek kalok, melagisigik, i abu werek kalok, wogisigik, kagako dogono o. Esigit diluk kagasugun eti paga, kindu enggen inunggulowak oba ʼbisinem kenet wasu kak, inenggarli asugun o.” (Ams. 25:21-22)
21Weyak kagarigogi mende eti obatne atluk kit kai dinagunogo yiluk, kit pano kagako dogolik, kinobatne atluk nen, weyak kagarigogi mende eti kai diyasi dogono o.
Currently Selected:
Roma 12: DNA
Highlight
Share
Compare
Copy
Want to have your highlights saved across all your devices? Sign up or sign in
