Wahyu 2
2
Wene it Allah aʼburi o Efesus mende pasik yogokike wene
1Esigit diluk yoknekesik nen yabunggane men yokneke,
“An ninggi ebengge kusagal ebe 7 paga pago dogolik, isagal yibarligogo mende ebe 7 paga iyok ndilik emas mende kagarek etnogo aklangge noko dogoligogo mende etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Efesus nandorligogi mende inayonggo ʼbiluk ʼbiyasikemo werek etnogo, wene yigit diluk kat nen kolal mbalogo inoba laʼbino o.
2Kit nen an nake kinobakanini kambuk yiluk kinobatnerogonat kagako dogolik, it amberek weyak kagakonem,
Inoba dombok, yiluk, inasuk wakidek togot diyegep dek. Nen, it amberek Yesus nen laʼbiya wagama negen kagarogo witluk yisinem, kit nen,
Inenggalat yiligogi, yiluk inaren enggagat mbaligogi. Kinobabut esigit diluk kagarigogi eti an nilu o. 3Nen, akoni nen an nake yi aik ndi aik kagat kinako nggorlegat, kit nen,
At ninaʼit, yiluk, togot danggidek kinobakanini kambuk yiluk dogoligogiat. 4Esigit diluk mende, ebe-alep kinendainggen an noba kunik welagagip ndak-ndagat, yogondak esigit diluk werek dek etiat,
Weyak kagarigogi, yiluk kinaren mbaligogo o. 5Eti paga, kit ʼbogokogo mondogat wusa wagasip werek eti kinakla ebet diluk, kinobabut kwalatluk nen, alebagik kagako lagagip eti kagat, kagako dogono o. Esigit diluk kagakidek kalok, an nebe witluk nen, kinagisagal yibarligogo mende eti obalikmo nen nggigilogo wokagin o. 6Esigit diluk mende, it amberek ap Nikolaus obabut waganogo kagakonem, an naʼit mondok iyiligogo kak, kit kinaʼit mondok kiligogi etiat, pano o.
7Nen, wene yigi mende eti at Allah Agurengge nen Allah aʼburi o yi ai ndi ai nandorligogi mende yogisiligogo eti kinasuk kolusak kalok, panorogo kolino o.
At ta nen obatne asigin kalok, Allah eyabumo o enggen inilugurinabigogo mende eti nowagaluk melagasigin o, yiluk wene taʼbokogonat yogisigi mende eti kolal mbalogo inoba laʼbino,” yiluk yokneke.
Wene Allah aʼburi o Smirna mende pasik yogokike wene
8Esigit diluk yoknekesik nen, yabunggane yoknoko dogolik,
“An, erloma nen logat enggaʼbu paga mondogat dogogin mende etnogo arat watlagagisik nen yabunggane niluk agagisik dogoligogo mende etnogo nen, wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Smirna nandorligogi mende inayonggo ʼbiluk ʼbiyasikemo werek etnogo, wene yigit diluk kat nen kolal mbalogo inoba laʼbino o.
9Kit ebe mende pasik kinebe nggok kininggi werek mende, it akoni Iblis aʼburi mendeat, inenggalat,
Nit ninebe Yahudi mende, yiluk yisi dogolik, kit kinendaga weyak kagarogo weyak kagat kinakonem, kinebe kininggi dek weyak werek eti an niluat o. 10At Iblis nen kit kinakla nggagaluwagaluk, akoni kit mende pelakngge ininggi kerle warogo ʼbiyamo, ininggi 10 paga yi aik ndi aik kasi dogogun eti, kinayuk agup o. Yi aik ndi aik esigit diluk kagat kinako nggorlek, kinendainggen an noba panggot diluk, an ninom kunik werekma watlasugun kalok, ta ae aʼbusuk ta ae aʼbusuk lagonem, it inobatne arigogi mende onggo nggare-nggare mendago wogisiligogi eti kak, onggo naberlal-kaberlal kagat kinabigin o.
11Nen, wene yokisigi eti Allah Agurengge nen, Allah aʼburi o yi ai ndi ai nandorligogi mende yanggul isiligogo eti kinasuk werek kalok, panorogo kolino o.
Ta nen obatne asigin mende kalok, it amberek watlatluk yabunggane mondok-mondok watlasugun eti inom weyagarinabigin dek o, yiluk wene taʼbokogonat yogisigi mende eti kolal mbalogo inoba laʼbino o,” yiluk yokneke.
Wene Allah aʼburi o Pergamus mende inake yogokike wene
12Wene esigit diluk yoknekesik nen, yabunggane yoknoko dogolik,
“An mbirok enggat pelak-pelak mago mende ninggimo pago werek mende etnogo nen wene yi yokisik,
At malaikat Allah aʼburi o Pergamus nandorligogi mende yomenogo inanggorlem werek mende etnogo yigit diluk kolal mbalogo oba laʼbin o.
13Kit, Iblis ebe nggok dogolik, akoni amberek apma pagisek dogoligogoma dogoligogi mende eti an nilu o. Esigit dilugat Iblis agumaat dogolik, an naʼbut Antipas nen nabok aʼit agidek, obabut kumbukogo dogolik yogisilik nokonem, it amberek nen ebe kinakla nen wakonem, kit nen,
Nit ninendainggen Yesus oba panggot diluk werek eti dek, ninaʼit, yiluk nggolelogo togot danggidek, ninom kunik mondok welagagip eti kinobabut an nilu o. 14Esigit diluk mende, wene ʼbugurlagat omanggi an naʼit mende kagarigogi mende eti yokisak o. Paganeat akoni Israel mende inebe weyak asuwagaluk, wam ngaganengge anggo warek mende mbalek ninggik, yogot kagakik, kagasuwagaluk, ap Bileam nen ap Balak yanggul ikikemo, at nen inakla nggagalko lagike mende eti kit amberek nen at awene eti pago werek kiyigi o. 15Nen, kit amberek nen, wene ap Nikolaus nen yanggul isasike mende awene eti waganogo pago welagigibat o. Esigit diluk kagakigip eti an naʼit mondok ambaligogo o. 16Naʼit ambaligogo eti paga, kit weyak kagarigogi mende eti togot diyalok kinobabut kwalatni o. Esigit diluk kinobabut kwalagidek kalok, kit an mbirok nambema mende paga kinasigiluk ibat-ibat wisigin o.
17Nen, wene yokisigi eti Allah Agurengge nen it Allah aʼburi o yi ai ndi ai nandorligogi mende yogisiligogo eti kinasuk kolusak kalok, panorogo kolino o.
Ta nen obatne asigin mende kalok, kimbiri endaga manna aberama mende melagisigik, endaga ngget mende salogo nggit nggut mende paga kolal mbalogo wogokik, kagasigin o. Endaga mbalek eti it amberek inonggodek. At endaga kolal mbalek korlagin mende etiat ilu asigin mende wogosigin, yiluk taʼbokogonat yogisigi mende eti kolal mbalogo inoba laʼbino,” yiluk yokneke.
Wene Allah aʼburi o Tiatira mende inake yogokike wene
18Esigit diluk yoknekesik nen, yabunggane men yokneke,
“An Allah aʼbut nilenggen kindu amulok negen, nen, niyok tembaga kindu weraklatluk aʼbigil ket-ket kagarigogo eti kak etnogo nen wene yi yokisik,
At malaikat Allah aʼburi o Tiatira nandorligogi mende inanggorlem werek etnogo, wene an nen yogisagin mende yi, kat kolal mbalogo oba laʼbin o,
19Kit kinobabut kagarigogi mende eti an nilu o. It akoni amberek inaʼbuwarogo welagigip eti inom, kinaʼit agidek kinobabut kumbulik welagigip eti inom, it amberek yamagiyasi lagagip eti inom, it amberek nen yi aik ndi aik kinoba ʼbisi nggorlegat kinobakanini kambuk yiluk welagigip eti inom, taʼbokogonat an nilu o. Nen, alebagik mbererlagat negen kagako lagagip mende, yogondak mondok dogalegat kagarigogi eti an niluat o. 20Esigit diluk mende, at kwe Izebel etnogo nen enggalat,
An nebe Allah wene yogisiligogo mendeat o, yiluk akoni an nanduwanengge mende inebe dogalegat kumi yogot kagako dogowagaluk yanggul isigik, wam ngganengge anggo warigogi mende mbalek nonggo dogowagaluk yanggul isigik, yanggul isasi nggorlek, kit nen mberikidek,
At oba dombok, yiluk, togot diyiligogi eti,
Kit weyak kagarigogi, yiluk kinaren mbaligogo o. 21At kwe eti yogot paʼbuwagaluk kagarigogo mende eti togot diyalok obabut kwalasuwagaluk anggorlem welagi mende, at yogot kagarigogo mende eti togot diyalok obabut kwalasusak aʼit o. 22Wene yi kinakla eberek dogono o,
It ap kwe eti inom yogot kagarigogi mende togot diyalok, inobabut kwalagidek kalok, it kenet wasuwagaluk, kwe eti noge yiligogoma mbo pilogo laʼbigin o. 23Esigit diluk kagakonem, it Allah aʼburi o yi ai ndi ai nandorligogi mende taʼbokogonat inilenggen kalok nen,
At Allah akoni inakla eberigogi mende eti inom, inendainggen nen nggagaligogi mende eti inom, ilumo, akoni ninebe dombok ninobabut kagarigogi mende ndak-ndagat wene ninoba ʼbigik, onggo woknisigik kagasigin o, yiluk, an didanuwagaluk, it akoni at kwe eti ane waganigogo mende inebe inasiginat o. 24Esigit diluk mende, akoni amberek nen,
Kwe eti awene, Iblis awene akla mende yanggul isaligogo, yiluk yiligogi mende eti kit akoni o Tiatira mende pelakngge nen, wene eti yanggulkik, kinilu agik, waganggidek eti paga, kit nen wene anggin mende omanggi kagasubagik nen yiluk yokisagin dek o. 25Mende, an wisigin eti awan wagidek werek nggorlek, wene waganggigip mende etiat kininggi aʼbetogo pago dogono o, yiluk yokisigi o.
26-27Ta nen an warlok mende kagako mondogat kurli o ilugun oba obatne asi ligin kalok, an nombae nen akoni inunggulowak endaga dombok, an nen pagisek dogowagaluk mendaniluk inde danggike eti kak,
at obatne asi ligin mende eti esigit dilugat pagisek dogowagaluk mendiluk indewerek ʼbumo, akoni nen segerluk andugun omanggen mende paga iyak agat aʼbet weyak mende ndamuk-ndamakogo kagarigogi eti kak, at ane obatne paga yogisasi dogolik, pagisek dogogin o. (Mzm. 2:9)
28Nen, kusagal kuben mulinggi dagi wirigogoma mot-mot liyaʼbi wirigogo mende etnogo wogisiginat o. 29Wene eti Allah Agurengge nen it Allah aʼburi o yi ai ndi ai nandorligogi mende yogisiligogo mende eti kinasuk werek kalok, panorogo kolino o, yiluk yogisigi mende eti kolal mbalogo inoba laʼbino,” yiluk yokneke.
Currently Selected:
Wahyu 2: DNA
Highlight
Copy
Compare
Share
Want to have your highlights saved across all your devices? Sign up or sign in
