Wahyu 1
1
Yesus nen wene limago mende Yohanes aʼbingganggo yogoko nggorlek, kolal mbalkike wene
1Wene ebe yigit diluk. Yi wene ndi wene limago welagike mende yabunggane ibat-ibat kagat lasigin mende eti, Allah anduwanengge mende dikogo yogisawagaluk Allah nen at Yesus Kristus ʼbukakogo yogokikemo, at Kristus nen malaikat laʼbi wagikemo, wene eti at Allah anduwanengge mende an Yohanes yokneke. 2Esigit diluk yoknekemo, at Allah wene eti Yesus Kristus nen abok yoknokonem wene taʼbokogonat an nilenggen kigi mende eti abok ʼbukakogo kolal mbalogo ʼbigi endi o. 3Wene eti taʼbokogonat, ibat-ibat kagat lasigin eti paga, it akoni amberek wene kolal mbalek mende yi endaga wenasugun mende inom, it amberek inasuk kol diluk, wene eti kologo motogo kagako dogogun mende inom, Allah nen panorinakonem inakla arlenggen kugun o.
It Allah aʼburi gereja 7 paga nandoko laguka mende keyagi warinakike wene
4-5An Yohanes nen kit o propinsi Asia gereja 7 paga nen nandorligogi mende, nagarlagi nirugi o. Ninombae Allah ebe ikok mondok dogolik, paganeat welagike, yogondak weregat, yabunggane mondok dogogin mende wisigin etnogo inom, Allah ebe nggok dogoligogo mende obalikmo werek nggorlek, Agurengge inebe 7 paga elokoma dogoligogi eti inom, at Yesus Kristus obabut kumbulik dogolik, Allah abok ʼbukakogo yoknisaligogo mende etnogo inom, inobabut pano etnogo nen kinanggorlem dogolik pano mende wokisigik, kinendainggen kambugut dinagagik, kagako dogowak, yiluk keyagi watkinaki o. At Yesus ebe watlagikesikmo nen ombae Allah nen elege mangguya endaginabigogi eti kak, at ndak ilugut disikemo, akoni nggokndek inendaganggok agat oba mende yoma inebe erlok dek mende, at arligat, nggok werek. Esigit diluk dogigiluk, nit nen weyak kagako lagagu eti paga, ninebe kerle warek negen paknisek werekma, at nen nit ninaʼbuwa niyasikesik, amep wulabogo watlagike eti paga kerle piyal ninakike o. 6Esigit diluk piyal ninakikesik nen, nit at ombae ake kagako dogowagaluk, ninebe nggokndek Allah indewerek mendinanggikemo werek. Esigit diluk mendinanggikemo dogolik, ninakla nen,
“At Yesus Kristus eti obatne mondok werek,” yiluk nit at ebe pogorako mondok doguwok o, yiluk, yu kak,
“Amin,” yigi o.
7Lakani! At ebe oisa paga wagonem akoni taʼbokogonat inebe dombok inom, it at sege paga ndaukogo wakuka mende inom, inomat nen inilenggen lakasi dogolik, inunggulowak endaga dombok taʼbokogonat de asugun o, yiluk yokisigi endi,
“Ebeat asuwak o,” yu kak,
“Amin,” yigi o.
8Ninombae Allah Endaganggok obatneyak dogolik yi mende ndi mende kagasusak arlek eti, ikok mondok dogolik, paganeat welagike, yogondak weregat, yabunggane mondok dogogin mende wisigin etnogo nen yisi dogolik,
“Erlo inom, enggaʼbu inom, anat o,” yiluk yiligogo o.
Yohanes nen aʼbingganggo paga Kristus ebe ilenggen kasike wene
9An kinagarlak kiniru Yohanes ninom ninebe Yesus aʼburi omanggiat mende, yi aik ndi aik kagat ninako nggorlek, ninakla nen,
“Yabunggane at Allah nen apma ʼbinanigin,” yiluk ninobakanini kambuk yiluk werek o. Werekma, Allah wene Yesus nen ʼbukakogo yoknisasike wene etnogo an nen yogisilik liligogo eti paga, ninggi kerle warogo i enggen mbalekma o endaga Patmos ʼbani wagakama werek o. 10Esigit diluk ʼbani wagakama werekma, o ninewe Endaganggok ago wi dekemo nen, Allah Agurengge noba ʼbekemo, nomborlikngge nen at omanggi ane pinggon windabo nggok mende ane negen paga men yoknokonem nasuk kolki,
11“Kat kilenggen kegen mende eti kolal mbalin o. Kolal mbalogo nen, it Allah aʼburi gereja 7 paga nen nandorligogi mende, o endaga Efesus inom, Smirna inom, Pergamus inom, Tiatira inom, Sardis inom, Filadelfia inom, Laodikia inom, inoba laʼbin o,” yiluk yokneke.
12Esigit diluk yoknekemo,
“Ane eti ta nen yoknirigogo,” yiluk nomborlikngge nilenggen lakigi mende, isagal yibarligogo mende ebe 7 paga nen iyok ndilik emas mende kagarek werekma nilenggen kigi o. 13Nen, isagal eti akla ndurlem abat endak lagike mende etnogo, elokonggen negen mende, iyom, uwanat sikmangge mende kurli iyok oba salek yugu, nen amik owak oba serlok inobake paga yiligogi kak emas mende yugu. 14Nen, isi domba isi nggut mondok ʼbisinggarlum negen. Nen, ilenggen kindu amulok negen. 15Nen, iyok tembaga kindu paga kunggonem aʼbigil ket-ket yiligogo negen. Nen, ane, i ndundunmo ane nggok yiligogo negen. 16Nen, inggi ebengge, kusagal inebe 7 paga mende pago welaga. Nen, ambema nen mbirok enggat pelak-pelak mago mende duki wago laga. Elokonggen aʼbigil, o dinggagane enggendurlem mo nderlelek-werlelekogo yarigogo eti negen werek nilenggen kigi o. 17Esigit diluk werekma kigirik, nayuk nen warek ineloke sogum agat oba ndun yiligogi kak, neloke sogumpogo agat oba elokoma iyokma mot-mot ndun yi wagonem, at inggi ebengge nen paknakesik nen men yokneke,
“Kayuk dek. An nebe erloma nen logat enggaʼbu paga nikok mondok dogolik, 18niluk mondok dogoligogo, anat o. An nebe arat watlagagi mende, lakan! Niluk agagisik, niluk mondogat dogogin o. Watlarigogi eti inom, watlatluk liligogoma etoma inom, su kunci an ninggimo werek o. 19An esigit diluk mondok werek yi paga, yi wene ndi wene yogondak ya kagat larigogo mende inom, yabunggane kagat lasigin mende inom, kilenggen kegen mende eti taʼbokogonat kolal mbalino o. 20Nen, kusagal inebe 7 paga ninggi ebengge pago werekma kegen etnogo inom, isagal yibarligogo mende ebe 7 paga iyok ndilik emas mende kagarek inom, kilenggen kegen etnogo, wene limago wene mende eti ʼbukakogo yokisik o. Kusagal inebe 7 paga kegen eti ebe, Allah aʼburi gereja 7 paga nandorligogi mende eti, Allah nen malaikat inayonggo ʼbiluk laʼbiya wirigogo eti kak, inayonggo ʼbiluk ʼbiyasike mende iyegen o. Nen, isagal yibarligogo mende 7 paga eti ebe, it Allah aʼburi gereja 7 paga nandorligogi mende etiat iyegen o,” yiluk yokneke.
Currently Selected:
Wahyu 1: DNA
Highlight
Copy
Compare
Share
Want to have your highlights saved across all your devices? Sign up or sign in
