Markus 16
16
Yesus ebe iluk agike wene
(Matius 28:1-8; Lukas 24:1-12; Yohanes 20:1-10)
1Esigit diluk kasukasik, ininggi 7 paga Hari Sabat Allah ake werlegat welagukasik nen, it kwe Maria ago Magdalena mende etnogo inom, kwe Maria Yakobus agoya etnogo inom, kwe Salome inom, ambusu obasi pano mende Yesus warek oba wasi luwogoluk onggo mbali laguka. 2Onggo mbalogo ʼbiluk noge yiluk kubulukngge hari Minggu paga kuben siyakogo mulinggi dagi wago nggorlek, oila etoma waguka. 3-4Wago dogolik nggit mondok nggok mende ndetnokogo lat disukama nogo nen, it-it yisi dogolik men yisuka,
“Warek nggit ndetnokogo lat dega etnogo, ta nen dimbilogo su kuwal niyagin,” yiluk yilik waguka. Esigit diluk yilik inut somaksek wago lagukasik nen, inilenggen liyakasuka mende, nggit etnogo dimbilogo laʼbisukama su kuwalek werekma kasuka. 5Kasukasik korokogo wagukasik inebe unggisuka mende, ap elege mende omanggi iyom nggut uwanat mende yugu ininggi ebengge mot-mot korek werekma inilenggen kalok nen, inagut laguka. 6Inagut lagukama, at ap elege mende etnogo nen, men yogisasike,
“Kinagut lagup o. Yesus ago o Nazaret mende o paga mendiluk waka etnogo kweyarigogi mende, ebe yoma dek. Allah nen ilugut dekemo werek o. Warek ʼbegama yoma obaligat yi kinilenggen ʼbikani o. 7ʼBikalok kit nen at agoromi ane waganggo lagaka mende Petrus agoromi inom yomenogo yogisa lani o. At Yesus nen,
An o Galilea dagiluk kinelokoma dogogin o, yiluk yokisasike kagat dagigin etnaga o. Kit dagiluk at ebe kinilenggen kugun o, yiluk yogisa lani o,” yiluk yogisasike. 8Esigit diluk yogisasikemo inobaka mbalagukasik inowak del kilik lo dukisukasik inayuk nen wene akoni amberek yogisigidek mbiyokogo laguka.
WENE PAGANEAT BUKU ILUGUN OBA KOLAL MBALOGO ʼBISUKA WENE
Yesus nen, “Alebagik kwe Maria ago Magdalena mende nen ilenggen niyawak o,” yiluk elokoma winam agike wene
(Matius 28:9-10; Yohanes 20:11-18)
9[At Yesus ebe hari Minggu paga melagike etinem kubulukngge kuben siyakogo melagikesik, at kwe Maria ago o Magdalena mende kugi inobabut weyak mende inebe 7 paga akla unggisukasik werekma paganeat mukogo wula ʼbiyasike mende etnogo nen ndak,
“Alebagik ilenggen niyawak,” yiluk elokoma winam agike. 10Elokoma winam agikemo ilenggen kalok, yonggo it akoni at Yesus inom welaguka mende de akonem inoba lagike. 11Lagikesik men yogisasike,
“At Yesus iluk agasik werek o. Ebe arat nilenggen kigi,” yiluk yogisasikemo, inasuk kolkuka mende, eberogonat yiluk ambasuka dek.
Yesus nen, “It ap nagoromi inebe mbere eti inilenggen niyawak o,” yiluk inelokoma winam agike wene
(Lukas 24:13-35)
12Esigit diluk ambasukasik werekma, yabunggane ap inebe mbere o unggul ʼbugurlagatma omanggi wisuwogoluk wagonem at Yesus ebe ninat kagat latluk,
“An nebe inilenggen niyawak,” yiluk inomborlik wagike. 13Inomborlik wagikemo inilenggen kalok suguluk inagarlagi amberek yomenogo yogisa laguka mende, it inakla nen eberogonat yiluk ambasuka degat.
Yesus nen, “Nebe nagoromi inilenggen niyawak,” yiluk inoba unggisikesik inelokoma winam agike wene
(Matius 28:16-20; Lukas 24:36-49; Yohanes 20:19-23; Laʼbiyasike 1:6-8)
14Esigit diluk kagarik wago lagikesik, ebe yabunggane, it at Yesus agoromi inebe 11 paga yomenogo korek kimbiri nasi werekma,
“Inilenggen niyawak nen,” yiluk inoba unggisikesik inelokoma winam agikesik men yogisasike,
“Kit yoma kinakla nen eberogonat yiluk ambigidek kinakla mbugat yoma! Allah nen an nebe arat nilugut nakemo werekma, it amberek nen inilenggen niyegasik yokisa wagaka mende, kinakla nen eberogonat yiluk ambigidegat yoma!” yiluk mberisasike. 15Esigit diluk mberisasikesik, wene omanggi men yogisasike,
“Kit, akoni inunggulowak endaga dombok o yi ai ndi ai etoma taʼbokogonat wene pano wene yi yogisilik lago dogoni o. 16Yogisilik lagonem it akoni amberek nen wene eti eberogonat yiluk ambagun mende, ima wusa ʼbiyagun mende, Allah nen ndil inabigin o; it amberek wene eti eberogonat yiluk waganugun dek mende Allah nen wene inoba ʼbiluk weyagarinabigin o. 17It akoni amberek nen wene eti eberogonat yiluk ambawagaluk, it wene eberogonat yiluk waganugun mende nen, yigit diluk kagako dogogun. Kugi inobabut weyak mende it amberek inakla unggiluk werekma an nendaga mbalogo mukogo wula ʼbiyigik, inane it akoni ninat mende inane inonggodek mende elalinat yigik, kagako dogogun. 18Esigit diluk kagako dogolik, warlo mbelal akoni inarigogo mende ininggimo waganggik, it inebe watlasuwagaluk akoni watlarigogi mende iyak akla nggolabogo wogisasinem ninggik, kagasugun mende, eti nen weyagarinako dogogin dek o. Nen, akoni omanggi u inakonem, it nen ininggi sebel inabumo pano ago dogogunat o,” yiluk yogisasike.
Allah nen Yesus mbogot oba wolok dagasike wene
(Lukas 24:50-53; Laʼbiyasike 1:9-11)
19Wene esigit diluk arat yogisasikemo, at Allah nen Yesus ebe mbogot oba wolok dagasike. Esigit diluk wolok dagasikemo eragalilu inggi ebengge nggok korek werek. 20Esigit diluk wolok dagasikemo at Yesus agoromi yomenogo o yi ai ndi ai taʼbokogonat wene yogisilik laguka. Wene yogisilik lagonem akoni nen,
“It wene yoknisalik wagaka eti eberogonat,” yiluk wene diduwagaluk, ninewe Endaganggok inom mondok dogolik, it nen elalinat kagakonem, at nen wene eti obatne disike].
Currently Selected:
Markus 16: DNA
Highlight
Share
Copy
Want to have your highlights saved across all your devices? Sign up or sign in
