Markus 14

Yesus wasuwogoluk abok mbalkuka wene

(Matius 26:1-5; Lukas 22:1-2; Yohanes 11:45-53)

1Etinem it Yahudi mende domba pesta Paskah etnogo mende inom, enggen roti pisuwagaluk akla wusaʼbiligogi mende akla wusakidek werago niligogi etnogo mende inom, ininggi mbere dogoluk, omanggi paga nuwogoluk werek nggorlek, it ap Allah indewerek mende yomenogo ineugi nggokndek inom, Allah wene kolal mbalek indewerek mende yomenogo inom, Yesus inilenggen wolok limago paʼbiluk wasuwogoluk abok mbalko laguka. 2Abok mbalko dogolik, men yisuka,

“Pesta nggok iyago nonggonem wene woklatluk ilugun oba weyak asunogo nen pakigidek dogoluk, o we dinggagane kalok pakawok o,” yiluk abok mbalkuka.

Kwe omanggi nen ambusu obasi pano mende Yesus unggulowak oba ndiyalogo wusa ʼbisike wene

(Matius 26:6-13; Yohanes 12:1-8)

3Abok esigit diluk mbalko nggorlek, at Yesus agoromi inom o Betania wagukasik, ap Simon u konanggo negen inayuk mende pagaat ebemangge welagike mende eti aguma unggisikesik dogolik, kimbiri nuwogoluk korek lagike. Korek lagikesik werekma, kwe omanggi nen iyak nggit endaga pualam mende kagarek mende paga ambusu narwastu ambusu obasi pano mende onggo nggogat mbalogo akla kenago wolok Yesus oba unggisike. Oba unggisikesik, iyak etnogo ambe obake senggekogo, ambusu Yesus unggulowak oba ndiyalogo wusa ʼbisike. 4Wusakonem it akoni amberek etoma dogolik, men yisuka,

“Kwe yi ambusu obasi pano mende we yugunat elamarogo wusake yi nenaluk. 5Ambusu yi paga, uang perak akoni yabu ininggi omanggi pasik kagakonem ininggi onggo omanggindek wogisiligogi etnogo mende 300 paga waganiluk nen, akoni inamende dek mende sumburisausak mende,” yiluk, kwe etnogo mberekuka. 6Esigit diluk mberekuka mende, at Yesus nen, men yogisasike,

“Kwe yi mbereko ʼbuk. Togot dini o. At nen pano kagat nake o. 7It akoni inamende dek mende eti kit kinom mondok dogogun o. Esigit diluk dogolik yamagiyagun, yiluk kinakla ambalok nenat yamagiyamo pano. Esigit diluk mende, anat, kit ninom mondok dogogun dek o. 8At nen an kagat nabu kagat, erlok kagat nake o. Akoni warek oba ambusu wat diyiligogi eti kak, an yabunggane nakonem nebe watlasumo warek sal nabuwogoluk noba wat danu kagat, arat wat dani waga o. 9Nane eberogonat yokisak. Kwe yi oba eberek dogowagaluk akoni nen wene pano wene etnogo, o yi ai ndi ai yogisilik noko dogolik,

Kwe eti nen esigit diluk kagakike, yiluk abok pano yisi dogogun o,” yiluk yogisasike.

Yudas nen Yesus wasuwagaluk yonggo lagike wene

(Matius 26:14-16; Lukas 22:3-6)

10At Yesus wene esigit diluk yogisasikemo nen, at agoromi inebe 12 yomenogo mende, omanggi at Yudas Iskariot etnogo, Yesus wasuwagaluk yonggo it ap Allah indewerek ineugi nggokndek yomenogo inoba lagike. 11Yonggo lagikesik yogisasikemo inasuk kolkukasik nen, inakla arlenggen agukasik, men yogokuka,

“Kalok, onggo uang omanggi wokisugun o,” yiluk abok yogokuka. Yogokukama, at Yudas akla nen,

“Yesus ebe o pano ngga paga nen it ininggi paga ʼbigin,” yiluk abok mbalko dogolik wene munini ebeko lagike.

Yesus agoromi inom pesta Paskah nasuka wene

(Matius 26:17-25; Lukas 22:7-14, 21-23; Yohanes 13:21-30)

12Yudas esigit diluk akla ebeko nggorlek, it akoni Yahudi mende enggen roti pisuwagaluk akla wusa ʼbiligogi mende akla wusakidek werago niligogi etnogo mende nuwogoluk dirlu alebagik niligogi mende nuwogoluk kagako dogolik, pesta Paskah pasik domba warogo nausak ndak-ndagat agike. Ndak-ndagat agikemo, at Yesus agoromi ane waganggo laguka mende yomenogo oba wagukasik men yogokuka,

“Newe. Kat domba pesta Paskah pasik nanok nen, nit nen yi mende ndi mende o nggoma ndugurogo ʼbi lausak warlok ambegen?” yiluk oba kinok wagangguka. 13Kinok waganggukama, at nen, agoromi ane waganggo laguka mende yomenogo amberek inebe mbere laʼbiyasike. Laʼbiyasi dogolik men yogisasike,

“O kota etoma lani. Lugun kak, ap omanggi iyak agat mende kagarek i kenatluk wagonem kinom abuk asugun etnaga. Kinom abuk atluk omborligat lano. 14At omborlik lagonem, at ebe uma unggisi kalok, ap ago indewerek mende eti oba kinok men yiluk waganino,

At ninewe wene yanggul nisaligogo mende etnogo nen, men yeke.

An nagoromi nane waganigogi mende ninom pesta Paskah pasik domba warogo nowagaluk, o ngganggok mbalek nggi kak ʼbanggen, yiluk kinok wagani lani, yiluk laʼbinani wagama wago. 15Esigit diluk yogokonem, at nen, o konaimbo kurli nggogat palekma werago nausakma obalik kagarek nggarelek werekma yanggul kisagin etnaga. Yanggul kisasi kalok, etomaat nuwok nen, yi mende ndi mende ndugurogo ʼbiluk dogono o,” yiluk laʼbiyasike. 16At agoromi ane waganggo laguka mende inebe mbere laʼbiyasi dogolik,

“O kota etoma lani,” yiluk yogisasikemo it etomaat lagukasik, at Yesus nen yisike kagat, werekma ʼbika laguka. ʼBika lagukasik, pesta Paskah pasik domba werago ndugurogo ʼbisuka. 17Yi mende ndi mende ndugurogo ʼbisukasik werekma, keyamnggengge at Yesus agoromi inebe 12 amberek yomenogo inom inoba laguka. 18Lagukasik uma unggisukasik korek latluk, pesta nonggo dogolik at Yesus nen men yogisasike,

“Kit mende omanggi kimbiri an nimbisak omanggimo niligogo mende eti nen, an nebe nasuwagaluk yonggo ligin o, yiluk eberogonat yokisigi,” yiluk yogisasike. 19Esigit diluk yogisasikemo it inakla weyak atluk men yogokuka,

“An a? An dek o,” yiluk inebe dombok nen esigit diluk arlek yilik laguka. 20Esigit diluk yilik lagukama, at Yesus nen men yogisasike,

“Kit kinebe 12 werek yoma, kat omanggi an nimbisak nininggi ndak-ndakogo piring akla wusa ʼbiluk ambusu magogo nonggo mende eti nen o. 21An abat endak lasi wagagi etnogo, watlasigin mende kolal mbalek werek ndak-ndagat watlasigin mende, at ap nebe nasuwagaluk yonggo ligin mende etiat, iya! Ebe mondok weyagat asigin o. At ap eti endak latlep dekma, panoat dogolep mende,” yiluk yogisasike.

Yesus agoromi inom nen, kimbiri inom, anggur enggen ambusu inom, ilugun oba nasuka wene

(Matius 26:26-30; Lukas 22:14-20; 1Korintus 11:23-25)

22At Yesus agoromi inom kimbiri esigit diluk nonggo dogolik, at nen kimbiri roti mende inggimo waganggikesik Allah keyagi warogo ebe nggusogo sumburisasi dogolik men yogisasike,

“Nde, waganini. Yi an nebeat o,” yiluk yogisasike. 23Esigit diluk yogisasikesik iyak anggur enggen ambusu kenago mende inggimo waganggikesik, Allah keyagi warogo, sumburisasikemo inebe taʼbokogonat nasuka. 24Nowagaluk sumburisasi dogolik men yogisasike,

“Yi, an namebat o. Allah nen wene warogo wokinabigin yisike etnogo, akoni dogalegat inake namep wulabogo nasugun eti paga, ebeat asigin o. 25An nane eberogonat yokisak. Anggur enggen ambusu yi nalok nen, an yabunggane omanggi ninggidek dogoluk nen, kurli, at Allah nen apma ʼbiyagin eti kurli ambusu ngget mende nigin o,” yiluk yogisasikesik 26endai Allah endai omanggi watluk dukisukasik ndom Zaitun unggul oba dagasuka.

“Kat nen, Yesus nonggodek, yiluk laʼbeligin o,” yiluk Petrus yogokike wene

(Matius 26:31-35; Lukas 22:31-34; Yohanes 13:36-38)

27Esigit diluk ndom Zaitun unggul oba dagasukasik, at Yesus nen, men yogisasike,

“At Allah nen,

At ap domba inanggorlem dogoligogo mende eti ebe an nen wakonem domba yomenogo lo sirlik-mbirlikogo lugun o, (Zak. 13:7)

yiluk yisikemo kolal mbalogo ʼbisukama werek eti paga, kit taʼbokogonat an togot daniluk lo sirlik-mbirlikogo lugun o. 28Lo sirlik-mbirlikogo lugun mende, an natlukmo, yabunggane Allah nen nilugut danumo, an ndak o Galilea dagiluk kinelokoma dogogin o,” yiluk yogisasike. 29Esigit diluk yogisasikemo at Petrus nen men yogokike,

“It pelakngge yoma inebe taʼbokogonat togot dagiluk lo sirlik-mbirlikogo lugun kalok, an esigit diluk lo dukigin dek o,” yiluk yogokikemo, 30At Yesus nen,

“Yogondak kibanggo yiat, sewe ayam ane alebagik yiluk nen, yabunggane yigidek werek nggorlek, kat nen,

Yesus eti an nonggodek o, yiluk kinggi kenagan oba laʼbeligin etnaga, yiluk eberogonat yokigi o,” yiluk yogokikemo, 31at Petrus nen men yogokike,

“Esigit diluk yegenat mende, an nimbisak nasumo pano. Yesus nonggodek, yiluk an nen laʼbeligin dek o,” yiluk ane obatnerogo yisikemo, it agarlagi amberek inebe dombok inane esigit dilugat yilik laguka.

Yesus Getsemani taman o ai yagoma nen Allah ayonggo ʼbisike wene

(Matius 26:36-46; Lukas 22:39-46)

32Wene esigit diluk yilik yilik nen, taman o ai yagoma omanggi endaga Getsemani laguka. Lagukasik, at Yesus nen men yogisasike,

“An korok ya lalok sembayan yisi nggorlek, kit ya korek dogoni,” yiluk agoromi ane waganggo laguka mende yomenogo yogisasike. 33Esigit diluk yogisasikesik Petrus inom, Yakobus inom, Yohanes inom, wogisek lagonem, at Yesus endainggen mondok weyak agike. 34Esigit diluk kagakikemo men yogisasike,

“Nagoromi. An nendainggen mondok weyak agasik watlasusak negen kagat nabigogo. Mende, kit ya dogolik kinobabut kwalogo suwam wako dogoni o,” yiluk yogisasike. 35Esigit diluk yogisasikesik, at sembayan yigiluk korogat eta agat oba eloke sogum pogo wilagikesik sembayan men yisike,

“Nombae. An yogondak yaat weyagat nabugun eti weyagat nakidek togot danusak kalok, togot danuwak o,” yiluk yisikesik, 36yabunggane omanggi men yisike,

“Nombae! Nombae o! Kat yi mende ndi mende kagasumo kagasusak dombok eti paga, an weyagat nabugun eti kat nen ndil nabin o, yiluk yu kak, enggen ambusu kenago nowagaluk woknisugun eti kat nen wokano yigi. Mende, an nakla ambigi eti dek o. Kat kakla ambegen mende etiat kagat nabino o,” yiluk sembayan yisike. 37Sembayan esigit diluk yiluk, agoromi yomenogo inoba wagike mende, it noge yisi werekma, at Petrus men yogokike,

“Simon. Kat nogeat yiligogon? Yogondak ya elalma jam omanggi pasigat kebe kwalogo dogusak erlok dek a?” yiluk yogokikesik 38it pelakngge yomenogo inomat men yogisasike,

“Weyak kagasuwagaluk kinakla nggagali wisunogo, kinobabut kwalogo dogolik, sembayanat yisi dogoni o. Kinakla nen erlok kagasusak yiluk ambaligogi mende, kinebe nen esigit diluk kagasusak erlok dek o,” yiluk yogisasike. 39Esigit diluk yogisalok sembayan alep yisike kagat, yabunggane yi lagike. 40Esigit diluk yi lagikesik yabunggane wagike mende, it yomenogo noge inilumo agikemo noge yisi werekma ʼbiriya wagikemo nogo nen, inane ninggit diluk yogosuʼbugat togot disuka. 41Togot disukama, at inggi mbere paga ilenggen ʼbiriya wagikesik nen yabunggane ʼbiriya wagikesik, men yogisasike,

“Kit set walogo noge yisi mondok dogogun a? Noge arat yegep o. An kagat nabugun etnogo yogondak yiat o. Ap omanggi nen it ap weyak kagarigogi mende nen an abat endak lasi wagagi etnogo nasuwagaluk ininggi paga ʼbanigin eti arat ʼbanigin yi lakani! 42Luwok nen, melatni o. Ap an nasuwagaluk yonggo laga mende etnogo korogat waga eti,” yiluk yogisasike.

Yesus ebe pakasuka wene

(Matius 26:47-56; Lukas 22:47-53; Yohanes 18:3-12)

43“Korok asi waga eti,” yiluk yisi nggorlek eranogoat it ap Allah indewerek mende ineugi nggokndek yomenogo inom, Allah wene kolal mbalek indewerek mende yomenogo inom, inaluwendek yomenogo inom nenat, ap omanggi dogalek laʼbiya wagukama, mbirok wolok, mbayok wolok, Yesus agoromi inebe 12 yomenogo mende omanggi at Yudas etnogo nen omborlik wogisek wagike. 44Wago dogolik, at Yudas yonggo lagike mende etnogo nen wene men yogisasikesik nen wagike,

“An lalok nambe sarluk keyagi wako kalok, kit nen,

I, ebe etiat kigi, yiluk pakalok kininggi kinobatnerogo wolok witno,” yiluk wene dikogo yogisasikesik, at inomat waguka. 45Wagukasik at Yudas etnogo Yesus oba korokogo wagikesik, men yogokike,

“Newe,” yiluk ambe sarluk keyagi wakike. 46Ambe sarluk keyagi wakonem, it ap yomenogo nen Yesus ebe pakasukasik inggi kerle warogo pago welaguka. 47Esigit diluk pakasukama it ap etoma mendek welaguka mende omanggi nen mbirok ogoret akla uwakma nen nggigikogo waganggikesik, ap Allah indewerek mende inewe nggok anduwanengge omanggi wasigiluk pilabe kasike mende, asugat, ʼbogokogo laʼbisike. 48Esigit diluk laʼbisikemo at Yesus nen it ap yomenogo men yogisasike,

“An ninggi abusak omanggi waganggima nen, kit mbirok wolok, mbayok wolok, ninggi kerle wasuwogoluk wagap a? 49Kibitngge-yogonggeat an kinanggerleka Allah ago palekma dogolik wene yanggul isasi werekma paknakidek welagasip nen,

Esigit diluk kagasugun, yiluk Allah wene kolal mbalogo ʼbisuka mende ndak-ndagat, paknabi wagap o,” yiluk yogisasikemo, 50at Yesus agoromi yomenogo inebe taʼbokogonat ebe togot diluk lo sirlik-mbirlikogo laguka.

Elege omanggi lo lagike wene

51Lo lago nggorlek elege omanggi iyom lenan mende sikmangge mendeat yugu dogolik Yesus omborlik lagaluk kagakonem, it ap yomenogo nen pakasuka. 52Esigit diluk paʼbisinem su etnogo nonggorlogo togot diluk, alowak ʼbuguligat lo lagike.

Yesus wasuwogoluk wene oba ʼbisuka wene

(Matius 26:57-68; Lukas 22:54-55, 63-71; Yohanes 18:13-14, 19-24)

53At Yesus ebe pakasukasik ap Allah indewerek mende inewe nggok oba wolok laguka. Etoma it ap Allah indewerek mende ineugi nggokndek inebe taʼbokogonat inom, inarluwendek yomenogo inom, Allah wene kolal mbalek indewerek mende yomenogo inom, nandokuka. 54Yesus esigit diluk wolok lago nggorlek, at Petrus etnogo yabunggane inomborlik yenoʼbok lago lagikesik, ap Allah indewerek mende inewe nggok etnogo ago silimo agoromi Allah ago palek anggorlem dogoligogi mende werekma inoba unggisikesik inom kindu kunikmo korek dogolik sogi werakasi laguka. 55It esigit diluk sogi werakasi nggorlek, it ap Allah indewerek mende ineugi nggokndek yomenogo inom, wene Allah wene pasik erlo mbililigogi mende inebe taʼbokogonat inom, inom dogolik, wene Yesus oba ʼbiluk wasuwogoluk men yisuka,

“Akoni at weyak kagakonem inilenggen kega mende yuwak nen kweyaginabini o,” yiluk yisukama kweyaginakuka mende, dek agike. 56Dek agikemo, it amberek inebe dogalegat nen, men yisuka,

“Weyak esigit diluk kagakonem ninilenggen kogo,” yiluk wene inenggalat yisuka mende, inane omanggiat motogo yisuka dek. 57Esigit diluk yisukama, yabunggane it ap amberek melatluk, inenggalat men yogisasuka,

58“At yi nen,

Allah ago akoni ininggi nen palkuka mende yi, an nen miyalogo laʼbigin o. Miyalogo laʼbiluk obalikmo akoni ininggi nen palusak dek. Ninat mende ninggi mbere paga palko dogoluk, ninggi omanggi yi paga, arat paligin o, yiluk ninilka paga yisinem ninasuk kolkugu o,” yiluk yisuka mende, 59inane eti omanggiat motogo yigidegat. 60Esigit diluk yisukama nen, it ap Allah indewerek mende inewe nggok etnogo melagikesik nen ndurlem inakla unggisikesik, Yesus men yogokike,

“Yesus. It ap yoma wene kat koba ʼbiligogi yoma, kat onggo omanggi yogisagin dek a? Onggo yogisamo,” yiluk yogokike mende, 61ane yigidegat puk agike. Puk agikemo yabunggane it ap Allah indewerek mende inewe nggok etnogo nen, wene omanggi men yogokike,

“Allah pogorako lago mende nen aʼbut Kristus laʼbi wisigin yisuka etnogo ebe karat a?” yiluk kinok waganggikeat. 62Kinok esigit diluk waganggikemo, at Yesus nen men yogokike,

“Eti, an nebe yiat o. An abat endak lasi wagagi etnogo, at Allah obatneyak yi mende ndi mende kagasusak dombok etnogo eragalilu inggi ebengge nggogat korek dogoluk, mbogot oba etoma nen oisa akla wusa wagonem kinilenggen niyagun o,” (Mzm. 110:1; Dan. 7:13)

yiluk yogokike. 63Esigit diluk yogokikemo, it ap Allah indewerek mende inewe nggok etnogo enggaerek iyom yugu mende liʼbilogo laʼbisikesik nen, men yogisasike,

“Akoni nen at weyak kagakonem inilenggen kega mende wene ʼbukakogo yuwagaluk nenaluk anggorlem dogogun. 64Allah akla kai diluk endaga weyagat disinem arat kinasuk kolkep eti kinakla nen ninggit diluk ambaligogi o,” yiluk yogisasikemo, it yomenogo taʼbokogonat nen,

“Wene oba ʼbiluk ebe mondok wasuwok o!” yiluk yogokuka. 65Esigit diluk yogokukasik it ap yomenogo amberek nen wosi supogo Yesus oba ʼbiluk ininggi nen ilenggen labet diluk, ininggi dinggilik wako dogolik,

“Ta nen kake nogo. Yoknisan nda,” yiluk yogoko lagukama, it ap nggokndek yomenogo inagoromi Allah ago palek anggorlem dogoligogi mende nen ebe pakasukasik ndugi ininggi agut paga ndamuk-pamukogo wakukaat o.

Petrus nen, “Yesus nonggodek,” yiluk laʼbelkike wene

(Matius 26:69-75; Lukas 22:56-62; Yohanes 18:15-18, 25-27)

66Esigit diluk kagako nggorlek, at Petrus silimo werekma, ap Allah indewerek mende inewe nggok etnogo anduwanengge korlak mende omanggi wagike, 67wagikesik, Petrus etnogo kindumo sogi werakasinem lakasikesik, ilenggen oba durlu ʼbisikesik men yogokike,

“Kat kebe Yesus ago o Nazaret mende etnogo kinom noko lagap mende ambigi,” yiluk yogokike. 68Yogokikemo, at nen men yogokike,

“An nonggodek o. Kat yegen eti an didigidek o,” yiluk laʼbelkike. Laʼbelkikesik, kolagambe nggok mbalekma dukiligogoma duki lagikesik werek nggorlek, sewe ayam ane yisike. 69Esigit diluk ane yisikemo, at Petrus kolagambe mbalekma eranogo werekma, at korlak etnogo yabunggane ilenggen kasikeat. Kasikesik men yogisasike,

“At yi it inom noko lagaka mendeat o,” yiluk it akoni etoma welaguka mende yomenogo yogisasike. 70Esigit diluk yogisasikemo at nen yabunggane laʼbelkikeat. Laʼbelkikesik wenegenat eranogo werekma, it akoni etoma welaguka mende yomenogo nen men yogokuka,

“Kat kebe o Galilea mende kiyogo yi kebe eberogonat it mendeat o,” yiluk yogokukama, 71at nen, laʼbelko dogolik men yisike,

“Kit nen ap abok yiligogi eti ebe an nonggodek o. Nombae Allah owak! Nenggalat yigi kalok, at nen nasuwak o,” yiluk endaga kumbuk mbalkike. 72Endaga kumbuk mbalko nggorlek eranogoat, sewe ayam etnogo ane yabunggane yisike. Ane yabunggane yisinem, at Petrus nen,

“I. At Yesus nen an yoknoko dogolik,

Sewe ayam ane alebagik yiluk nen, yabunggane yigidek werek nggorlek, kat nen,

Yesus nonggodek o, yiluk kinggi kenagan oba laʼbeligin, yiluk yokneke etnogo, arat laʼbelki yi o,” yiluk akla ebekikesik, de endainggen pisogo de akike.

Currently Selected:

Markus 14: DNA

Highlight

Copy