Kolose 3
3
1At Allah nen, Kristus ilugut disi dogolik, kit kinomat kinilugut dinagasikemo werek eti paga, yi mende ndi mende Kristus ebe mbogot oba Allah eragalilu inggi ebengge nggogat dogoligogoma etoma mende korla luwok nen, kinobatnerogo kagako dogono o. 2-3Kinebe watlagagisip nen, yabunggane Kristus kinomat kiniluk dogogun mende Allah nen awan selekmat digidek aberarek werek eti paga, kinakla nen, yi mende ndi mende agat oba mende oba ebekidek dogolik, mbogot oba mende oba ebeko dogono o. 4Ebeko werekma, at Kristus ninebe yabunggane niniluk mondok dogowagaluk kagat ninabigogo mende etnogo selekmaat wagonem, kit at kinomat selekma atlukmo pogot kinabugun o.
“Kinobabut alep mende togot diyalok nen, ngget mende waganino o,” yiluk yogisasike wene
5Eti paga, kinobabut kinikogat dogolik, kinakla nen yi warlok ndi warlok ambiligogi mende eti warogo togot diyasi dogono o. Kinobabut kumi inil arurlu paʼbiyiligogi eti inom, kinakla nen warlok yiluk wosi niligogi eti inom, inendainggen nen nalok inoba aganggen dagaligogo eti inom, inilenggen lagiyalok inakla nen warlok ambiligogi eti inom, ngganengge oba panggot diluk dogu kak, inakla nen,
“Yi mende ndi mende, an mende arlek dogolep,” yiluk ambaligogi eti inom, kinobabut eti mende taʼbokogonat warogo togot diyasi dogono o. 6It akoni Allah wene inasuk koluʼbuk mende nen inobabut esigit dilugat kagakonem, Allah akla agaga dagaluk, weyagarinabigin werek o. 7Kit alebagik, eti mende pasigat kagako dogolik, kinobabut esigit dilugat kagako welagigip. 8Esigit diluk mende, yogondak kit kinobabut yi mende taʼbokogonat togot diyausak. Inakla agaga dagiligogo eti inom, inakla ketmbet yiligogo eti inom, it amberek weyagarinabigogi eti inom, inambe paga, inabok weyak mbalkik, weyak kagarigogi mende inane aik dagok yigik, yiligogi eti inom, togot diyasi dogono o. 9-10Su alep mende nonggorlogo laʼbiyalok nen, yabunggane ngget mende yirigogi kak, kit kinobabut alep kagako lagagip mende togot diyalok, yabunggane kinobabut ngget mende waganggigip eti paga, kinenggalat yisi dogogup o. Kinobabut ngget mende eti, Allah nenat winamet dinagasikesikmo nogo nen, at enggaerek obabut ndak-ndak kagat latluk nen, ebe mondok dikogo kinilu asuwagaluk, alep-yabunggaat kagat kinabigogo o. 11Esigit diluk kagat kinakonem, ninebe taʼbokogonat at ninewe Endaganggok Kristus arligatma, ninebe taʼbokogonat ninom kunik werek eti paga, inunggulowak endaga Yunani mende yigik, Yahudi mende yigik, yiligogi eti inom, inowado inenggarlimo mende mbalek mende yigik, mbalek dek mende yigik, yiligogi eti inom, inane unggut mbalek mende yigik, walegat onggamangge mende yigik, yiligogi eti inom, inanduwanengge mende yigik, inasokne mende yigik, yiligogi eti inom, yisi dogusak dek werek o.
12Kit kinebe, Allah nen mikogo enggaerek ake ʼbakasikesik nen,
“An nenggaerek naʼburi o,” yiluk, endainggen kunik werek o. Eti paga, su ngget mende yirigogi kak, kinobabut men mende waganino o. Inebe inaʼbuwa kiligogi mende eti inom, inobabut enago werek mende eti inom, inenggaerek nen pogorakigidek inendainggen sebekogo dogoligogi mende eti inom, inobabut laʼbukogo kagarigogi mende eti inom, inobakanini kambuk yiluk dogoligogi mende eti inom, kinobabut eti mende waganino o. 13Kit-kit amberek nen amberek weyak kagat kinakonem, uwa ʼbigidek kinobakanini kambuk yiluk kagako dogolik, sagalogo togot diyasi dogono o. Kit weyak kagako lagagip mende, ninewe Endaganggok nen sagalogo togot diyasike kak, kit-kit esigit dilugat sagalogo togot diyasi dogono o. 14Esigit diluk kagako dogolik, ebe nggok negen, akoni inebe inaʼbuwarogo dogono o. Inaʼbuwarogo dogoligogo mende eti paga, kinebe omanggiat mondok dambukogo dogu kagat dogogun o. 15At Allah nen Kristus ebe omanggiat mende kinom dambukogo kunik dogobagik nen yiluk kinayonggo ʼbisike eti paga, yi mende ndi mende kagasuwogoluk, kinakla nen,
“Kristus nen ninom dambukogo ʼbinanggikemo werek,” yiluk, wene etiat nggogot disi dogolik, motogo kagako dogono o. Esigit diluk kagako dogolik, Allah ebe keyagi wako dogono o. 16Akoni inamende dogalegat mende ininggiwerek werek kak, kit nen, Kristus ane etiat kinendainggenma obatnerogo ʼbiluk dogolik, kinakla nggagalogo, kit-kit wene kinasuk wat-wat kagako dogolik, wene kit nen yanggul isigik, it nen yanggul kisigik, kagako dogono o. Yanggul isasi dogolik, Allah pasik endai Mazmur mende wakik, endai Allah pogorarigogi mende wakik, Allah Agurengge nen kinakla nggagalkonem, endai ngget nggagalogo wakik, kagako dogolik, kinendainggen oba nen Allah keyagi wako dogono o.
17“Ninombae Allah nen woknisiligogo eti ebe Yesus nenat woknisiligogo o,” yiluk, Allah keyagi wako dogolik,
“Ninewe Endaganggok Yesus apma dogolik kagarigogi,” yiluk, yi mende ndi mende taʼbokogonat kagasuwogoluk, kinane yi mende ndi mende ake yuwogoluk, at Yesus endaga mbalogo kagako dogono o.
Kumi ap elege inago omanggimo mende, “Yigit diluk kagako dogusak,” yiluk inasuk wakike wene
18Kit kumi nirugi. Ninewe Endaganggok kinom kunik dogolik kinobabut kagasusak ndak-ndagat, kinagoni inapma dogolik inane kologo kagako dogono o. 19Nen, kit ap nagarlagi. Kinagugi mep dagik-dagokogo kagarinakidegat, inaʼbuwarogo dogono o.
20Nen, kit elege nagoromi. Kinagoya, kinombae nen, yi mende ndi mende pasik yokisasinem, inane kologo kagako dogumo, ninewe Endaganggok akla pano asigin eti paga, esigit dilugat kagako dogono o. 21Nen kit inombaelak, nagarlagi o. Kinaʼburi inakla nggorlo asunogo yiluk inakla agaga liyako dogogup o.
22Kit inanduwanengge mende nagarlagi nirugi o. Kineugi agat oba mende nen, yi mende ndi mende kagasuwagaluk yisinem, inebe inil oba kalok inakla panorogo kagakik, dekma kalok puk agik, kagako dogogup o. At te, ninewe Endaganggok kinayukogo kinendainggen omanggiat dogolik, kineugi eti inane kologo kagat diyasi dogono o. 23Yi mende ndi mende kagako dogolik, kinakla nen,
“Akoni inake kagarigogi dek o. Ninewe Endaganggok ake o,” yiluk, kinendainggen oba nenat kagako dogono o. 24Kinebe ninewe Endaganggok Kristus at apma dogolik, at ake kagarigogi eti paga, kinakla nen,
“Nit kagarigogi yi paga, onggo at ninewe Endaganggok Kristus nen indet dinanigin werek o,” yiluk, kinakla didiluk dogono o. 25Mende, at ninewe Endaganggok nen, akoni inelokonggen oba iyalok, amberek elokoma ʼbiyigik, amberek omborlikngge ʼbiyigik, kagarigogo dek eti paga, ta nen weyak kagake mende pasik, onggo wogosu kak, weyak kagake eti ndak-ndagat wene oba ʼbigin werek o.
Currently Selected:
Kolose 3: DNA
Highlight
Copy
Compare
Share
Want to have your highlights saved across all your devices? Sign up or sign in
