Kolose 4
4
1Nen, kit it eti ineugi nggokndek mende, kinakla nen, “Ninewe Endaganggok mbogot oba werek o,” yiluk didiluk kinagoromi kinanduwanengge mende eti, yi mende ndi mende wogisausak ndak-ndagat wogisasi dogono o.
“Sembayan yigit diluk yisi dogolik, kinobabut yigit diluk kagako dogusak,” yiluk yogisasike wene
2Sembayan Allah keyagi wako dogolik, kinaʼit agidek kunik-kunigat yisi dogolik, kinobabut kwalogo dogono o. 3Sembayan yisi dogolik, nit ninake, men yisi dogono o,
“Allah ninombae. Wene Kristus nen kagakike wene, alep kakla limago welagike mende etnogo, it Paulus agarlagi inom nen yogisilik noko dogowagaluk, su kuwaliyano o,” yiluk, sembayan nit ninake yisi dogono. Wene eti pasigat ninggi kerle warogo ʼbanggama yoma werek o. 4Wene eti an nen yogisausak ndak-ndagat, dikogo yogisasi dogik nen, sembayan yisi dogono o.
5It akoni Allah wene inonggodek mende inake, kit kinakla mondok nggagalek dogolik,
“Nit Allah aʼburi kagasusak mende pano nanonggal ya pagaat kagako doguwok nen,” yiluk eti mendeat kagako dogono o. 6Kinane yi mende ndi mende pasik it amberek yogisasi dogolik, yi mende ndi mende iluge pilkonem, akoni nen,
“Induk pano,” yiluk yiligogi kak,
“Wene eti pano,” yiluk, waganuwagaluk, kinane enagogo yogisasi dogono o. Esigit diluk yogisasinem, it kinoba kinok waganggonem, wene onggo inebe dombok yogisabagik nen, kinilurogo dogono o.
Wene ilugun oba arat keyagi warinakike wene
7At Tikikus ninagot ninendainggen kunik mende, nit ninomat ninewe Endaganggok anduwanengge dogolik, at pasik obabut dombokogo kagarigogo mende nen wene an nabok yabunggane yokisa wisigin etnaga o. 8Kit nen,
“It inebe esigit diluk werek kigi,” yiluk, wene kinilu atluk nen, kinendainggen dirluk yuwagaluk, eti pasik kinoba laʼbi wisigin o.
9At imbisak wisuwagaluk, ninagot Onesimus, ebe ap kit mende obabut domboksek ninendainggen kunik mende etnogo, imbisagat laʼbiya wisigin o. It witluk nen, wene nit yoma kagarigogi mende taʼbokogonat yokisa wisugun o.
10Aristarkus an nimbisak nininggi kerle warek werek mende nen keyagi watkinakik, Barnabas agarlak Markus etnogo nen keyagi watkinakik, yega o. At Markus pasik wene alep yokisasigi etnogo kagat, at ebe kinoba wago kalok, panorogo waganino o. 11At Yustus, endaga omanggi Yesus etnogo nen, keyagi watkinakeat o. Inowado inenggarlimo mende mbalek mende, inebe kenagan etaat nen Allah apma dogogun wene etnogo ninom nen yogisasi dogolik yamak niyasinem nakla pano arigogo o. 12At Epafras, Kristus Yesus anduwanengge, ebe kit mendeat etnogo nen, keyagi watkinakeat o. At nen, kit kinakla nen,
“Allah wene eti eberogonat,” yiluk didiluk nen, kinendainggen korle atluk kinebe mendegat dogolik, yi mende ndi mende Allah akla ambaligogo kak kagako dogobagik nen yiluk sembayan kit kinake obatnerogonat yisi mondogat werek o. 13Esigit diluk yisi dogolik, kit kinake inom, akoni o Laodikia mende inake inom, Hierapolis mende inake inom, obatnerogo kagarigogo yiluk, an nen aren mbalkirik nen yokisigi o. 14At Lukas, ebe dokter dogolik u kagarinabigogo mende nit ninendainggen kunik mende etnogo nen keyagi watkinakik, at Demas nen keyagi watkinakik, yegaat o.
15It ninagarlagi ninirugi. Allah aʼburi o Laodikia werek mende etoma inom, kwe Nimfa etnogo inom, Allah aʼburi amberek, at aguma nandorlogo Allah wene yiligogi mende inom,
“Paulus agarlagi inom nen keyagi watkinaka,” yiluk yogisano o. 16Wene kolal mbalogo kinoba laʼbi wago mende eti arat endaga wenakep kalok, it Allah aʼburi o Laodikia nandorligogi mende inasuk koluwak nen endaga wenasuwagaluk laʼbino. Nen, it Laodikia mende inoba laʼbigi etnaga, kit kinoba laʼbi wisumo, endaga wenatnoat o. 17At Arkipus etnogo wene men yiluk yogotno,
“Ninewe Endaganggok nen kayonggo ʼbisi dogolik,
Yabu an nake esigit diluk kagatno, yiluk yokikike mende eti ilugun oba arat nggobokogo kagatno,” yiluk yogotno o.
18Kolal omanggi yiat, an Paulus nenggaerek ninggi nen mbalogo keyagi watkinaki.
Kit nen,
“Paulus inggi kerle warek werek,” yiluk noba eberek dogono o. Allah obabut pano etnogo nen pakisek dogowak o.
Currently Selected:
Kolose 4: DNA
Highlight
Copy
Compare
Share
Want to have your highlights saved across all your devices? Sign up or sign in
