La’biyaske 28
28
At Paulus i enggen mbalekma Malta dogolik kagako lagike wene
1Ninebe ndilogo i aik obangge dukisugusik werekma, it akoni etoma mende nen,
“O i enggen mbalekma yi endaga Malta,” yiluk yoknisasuka. 2Yoknisasukasik, inakla arlenggentogo wokninakukasik o miyo wagikemo, sogi nen sogi werakawagaluk kindu kunogo ʼbinangguka. 3Kindu kunogo ʼbinanggukama dogolik, at Paulus nen kali asok nggokogo nandorlogo, kindumo kun disikemo, warlo mbelal omanggi kindu aik nen duki wagikesik nen, Paulus inggi aik kun disikesik kunik mondok welagike. 4Inggi paga kunik werekma, akoni inaiwerek mende yomenogo inilenggen kalok, it-it yisi dogolik,
“Ap yi akoni inarigogo mende kigi o. Ima nen ndilogo duki waga mende, ngganengge, akoni weyak kagakonem inarigogo mende etnogo nen,
At ebe iluk dogusak dek, yiluk, wake yi,” yiluk yisuka. 5Esigit diluk yisi nggorlek Paulus ebe weyak agik, watlagik, kagakidek dogolik, warlo mbelal etnogo inggi nen piyakogo kindumo nggola ʼbisike. 6Esigit diluk kagakikemo, it akoni yomenogo nen,
“Ebe pisigin a? Omanggi pasigat nduntogo watlasigin a,” yiluk ambasukasik, inilenggen welaguka. Werekma, ebe esigit diluk kagat lagidek nen,
“Ebe walsenagat o,” yiluk yisuka.
7Esigit diluk kagakugu paga nen, o korogat etoma, ap nggok endaga Publius agat indewerek mende, nit ap kuso oba lagagumo, at nen ninebe panorogo wokninakikemo, nininggi kenagan at ninom welagagu. 8O at werekma etoma, at ombae oba u aganggen agikesik, al mbirlak uko dogolik, windik mondok welagike. Windigat werekma, at Paulus oba unggisikesik inggi paʼbiluk, Allah ayonggo ʼbisikemo, oba pano agike. 9Esigit diluk pano agikemo, it akoni o i enggen mbalekma etoma mende u warek mende amberek Paulus oba wagukama, kabarinakonem inoba pano agukaat. 10Esigit diluk pano kagarinako lagikemo, it akoni yomenogo nen, keyagi warogo yi mende ndi mende dogalegat woknisasukasik nen, yabunggane nit o etoma togot diluk imangge wisuwogoluk kagakonem, yi mende ndi mende kolagarlem amene woknisasuka.
At Paulus o Malta nen o Roma wagike wene
11O etoma dogolik, sut kenagan welagagusik nen, nggu omanggi unggulmongge Walsenak Kulup Mbere Mende inalino kagarogo ʼbisuka mende, o Aleksandria nen paganeat wolok wagukasik, o weyak werekma nen i enggen mbalekma etoma welagukasik, yoma wisuwogoluk kagakonem akla unggisugu. 12Unggisugusik o etoma nen o Sirakusa wagagusik nen, nininggi kenagan welagagu. 13Welagagusik, o etoma nen, nggu paga i eragalilungge o kota endaga Regium wagagu. Wagagusik werekma, kubengge kwiyakne i laut mot-mot nen wagikemo, nininggi mbere paga wago lagagusik o kota endaga Putioli wagagusik agat oba dukisugu. 14O Putioli etoma Allah aʼburi mende amberek werekma ninom abuk agagusik, it nen,
“Ninom doguwok o,” yiluk ninayonggo ʼbisukama, nininggi 7 paga ninom welagagu. Welagagusik o etoma nen o kota Roma wisuwogoluk wagagu. 15Wagonem, it akoni amberek nen,
“It wirigogi,” yiluk yisukama, Allah aʼburi o Roma mende nen inasuk kolkukasik, ninanggorlem it amberek Pasar Apius, lago nggorlek, amberek o hotel ap kuso witluk, noge yiligogoma, o ebe kenagan palekma etoma lagukama, at Paulus ilenggen iyalok nen, Allah keyagi wakikesik nen akla pano agike.
At Paulus o Roma wagikesik dogolik kagakike wene
16Etoma nen o kota Roma arat wagagumo, it ap nggokndek nen,
“Paulus asokneat dogowak. Werek nggorlek, ap tentara mende omanggiat nen anggorlem dogowak,” yiluk yisuka.
17Esigit diluk yisukama, nininggi kenagan welagagusik, at Paulus nen, it akoni Yahudi mende ineugi nggokndek nandorli wisuwagaluk inayonggo ʼbisike. Inayonggo ʼbisikemo, inebe arat nandorli wagukama, at nen, men yogisasike,
“Nagarlagi o. An nen, akoni nit mende weyak omanggi kagarinakidek. Nen, nit ninakombalak kagako laguka eti kak kagarigogi eti mende togot diluk weyak kagakidegat. Esigit diluk mende, o Yerusalem etoma nen nebe pak nakukasik, ninggi kerle warogo, akoni Roma mende ininggi paga ʼbangguka. 18Esigit diluk ʼbanggukama, it ap nggokndek nen wene erlo kweyako dogolik,
Ap yi ebe wasusak weyak omanggi kagakidek kigi,” yiluk kerle piyal nabuwogoluk kagakuka. 19Esigit diluk kagakuka mende, it ap Yahudi mende nen,
“Dek o, yiluk inane obatnerogo yisuka mende, an nen,
Wene noba ʼbega mende yi, Kaisar nen erlo kweyago ilonggon wasuwak o,” yiluk yogisasigi o. Esigit diluk yisigi eti an nen wene omanggi it nagarlagi inom inoba ʼbigiluk yisigi dek o. 20Nit akoni Israel mende nen,
Ap omanggi wisigin o, yiluk ninendainggen at oba werek etnogo pasigat, ninggi kerle warogo ʼbanggukama werek o. Eti paga, kit kinebe noba wagonem wene yokisagaluk kinayonggo ʼbigi o,” yiluk yogisasike. 21Esigit diluk yogisasikemo, it nen,
Akoni o Yudea mende nen wene kat pasik surat mbalogo ninoba laʼbi wagidek o. Nit ninagarlagi amberek o etoma nen wagakasik, wene kat pasik yoknisigik, kabok weyak yigik, yi wagi degat o. 22Mende, wena kat waganggendik kagako lagan eti ake, akoni o yi ai ndi ai mende nen,
Wene eti weyak, yisinemat, ninasuk kolko lago mende, wene kat nen eberogonat ambasi lagan mende eti kenggaerek nen nit yoknisasinem ninasuk kolusak warlok o,” yiluk yogokuka. 23Esigit diluk yogokukasik,
“Nit nininggi eti paga nen yabunggane koba wisugun o,” yiluk wene yogokuka. Wene yogokukasik nen, ininggi eti paga inebe dogalekma, o Paulus werekma oba waguka. Wagukama, o kuben nen logat kibanggo wene Allah apma ʼbiyiligogo wene etnogo yogisasi welagike. Yogisasi dogolik, it nen Yesus kagakike wene eti eberogonat yiluk diduwagaluk, wene Allah nen ninasuk wakike wene Musa nen kolal mbalogo ʼbisike etnogo paga inom, ap amberek Allah wene yogisasi laguka mende nen kolal mbalogo ʼbisuka etnogo paga inom, inasuk wako lagike. 24Esigit diluk yogisasinem, it pelakngge wene eti eberogonat yiluk wagangguka. Mende, it pelakngge nen waganggidek. 25Esigit diluk kagakukasik, it-it inane inasokondek dombok sagalik ngginggil wasuwogoluk kagakonem, at Paulus nen wene omanggi yi yogisasike,
“Wene Allah Agurengge nen Yesaya nen ninakombalak yogisawagaluk yogokikemo, yogisasi lagike eti, mot-mot yogisasikemo kigi. 26Allah nen,
Akoni etoma inoba lalok nen, wene yi yogisano. Kinasuk kolek dogogun mendeat, kundukogo didisi dogogun dek o. Kinilenggen ʼbirogo dogogun mende, kundukogo kasi dogogun degat o.
27It akoni yi, inilenggen kigik, inasuk kolkik, inakla ebekik, kagatluk nen, yabunggane inobabut kwalumo an nen panorinabunogo yiluk, it nen inakla mbuk agik, inasuk dogu-dogu kagakik, inilenggen mbuk yuwagaluk ineramenat mbuk-mbuk kagakik, kagakuka o, (Yes. 6:9-10)
yiluk Allah Agurengge nen yisikemo, Yesaya nen kolal mbalkike,” yiluk yogisasike. 28Esigit diluk yogisasikesik, wene yi ilugun oba men yogisasike,
“Esigit diluk yisike eti paga, wene yi kinilu asubagik nen yiluk yokisak o. Allah nen akoni amberek, at nen ndil inabigogo wene eti, it akoni sikmangge mende yogisa lowagaluk inayonggo ʼbisikemo yogisiligogi. It esigit diluk yogisasinem, inasuk kologo kagasugun o, yiluk kinilu asubagik nen yiluk yokisigi o,” yiluk Paulus nen yogisasike. 29[Esigit diluk yogisasikemo, it ap Yahudi mende yomenogo ngginggil wako dogolik, it-it inane nggogat sagalik sagalik ngginggil wakuka.]
30At Paulus o Roma etoma dogolik, o palek omanggi elalma ake dogigiluk onggo ʼbisikesik, 2 tahun etoma werekma, akoni dogalegat at ʼbikawogoluk oba wago laguka. Wagonem, at nen inebe taʼbokogonat pano woginako lagike. 31Esigit diluk woginakonem, it amberek nen mberikidek werek nggorlek, at ayuk dek ʼbukakogonat wene Allah nen apma ʼbiyiligogo wene etnogo yogisigik, ninewe Endaganggok Yesus Kristus kagako lagike wene etnogo yanggul isigik, yisi lagike.
Currently Selected:
La’biyaske 28: DNA
Highlight
Share
Compare
Copy
Want to have your highlights saved across all your devices? Sign up or sign in
