La’biyaske 27
27
At Paulus wolok imangge nggu paga o Roma wisuwogoluk waguka wene
1It nen nit imangge nggu paga o Italia laʼbinani wisuwogoluk, wene arat mbalkukasik nen, ap tentara dogalegat Kaisar agoromi omanggi dogalko laguka mende inewe nggok endaga Yulius nen Paulus inom, akoni ininggi kerle warek mende amberek inom, wogisek wisuwagaluk inggi paga ʼbisuka. 2Esigit diluk inebe at inggi paga ʼbisukama, nggu ebe o Adramitium nen wolok wagukasik werekma, akoni o propinsi Asia nggu unggiligogomangge dombok wusa ʼbiyilik wisuwogoluk kagakonem, ap Aristarkus, ago o propinsi Makedonia o kota endaga Tesalonika mende ninom, nggu eti akla unggisugusik wagagu. 3Unggisugusik wago dogolik, kubengge o Sidon wagagu. Wagagusik, at Yulius etnogo nen, Paulus ebe aʼbuwa agikemo men yogokike,
“Kat yi mende ndi mende amberek dek kalok, kagarlagi nen wokisuwagaluk inoba unggilik lan o,” yiluk yogokikemo lagike. 4Lagikesik nen wagikesik, o etoma nen, imangge nggu paga wago dogolik, kwiyakne ninelokomangge nen lago lagikemo, i enggen mbalekma endaga Siprus eti abel pelak nen, kwiyakne laberogo yiluk etingge wagagu. 5Etoma nen wagagusik nen, o propinsi Kilikia nen mbiyokogo propinsi Pamfilia mot etoma i uwan eti aik yomangge wundali witluk nen, o propinsi Likia kota endaga Mira eti wagagu. 6Etoma nen ap tentara inewe nggok etnogo nen nggu omanggi o Aleksandria mende o Italia wisuwogoluk kagakonem, kweyakikesik nen, nggu nit wagagu etnogo paga nen, nggu eti paga woknisek unggisike. 7Woknisek unggisikesik, nininggi omanggi noge yigik, omanggi noge yigik, erogat wago lagagusik, wisusak erlok dek kagat lagike mendeat, o endaga Knidus mot-mot wagagu. Wagagusik, kwiyakne nen mot-mot wisusak dek agikemo nen, nomokogo, i enggen mbalekma endaga Kreta eti ebel pelak kwiyakne laberogo yiluk, Salmone agubakma eti togot diluk mbiyokogo wagagu. 8Ninoba wiyik-weyakogo wago lagagusik, o kota Lasea nen korogat etoma o omanggi endaga,
“Nggu pano kol yirlelogo ʼbiligogoma,” yiluk yiligogima etoma wagagu.
9Etoma wagagusik, nininggi dogalegat welagagu. Dogolik, akoni Yahudi mende nen,
“Nit weyak kagarigogo mende Allah nen sagalogo deget diyalok yabunggane ninom pano ago,” yiluk inakla eberogo kimbiri ninggidek werlegat dogoligogi paga ndak-ndak welagagusik nenat, imangge nggu paga panorogo wisusak degat, i lausak negen kagat lagikemo, at Paulus nen,
10“Nagarlagi o. An nakla nen,
Nit nggu paga mbiyokogo lugun kalok, mondogat nugasugun o. Eti paga, yi mende ndi mende nggu akla yukarlek mende arlek weyak agik, nggu ebe weyak agik, kagasigin ʼbuk. At te, akoni ninebe inomat i lagik, kagasugun ambigi o,” yiluk yogisasike. 11Esigit diluk yogisasike mende, ap tentara inewe nggok etnogo nen Paulus ane sagalogo togot diyalok, it ap yabu nggu paga kagako laguka mende inewe nggok eti inom, nggu ilu mende wolok liligogo mende eti inom, imbisak inane kolkike. 12O weyak oba nggu kol etoma yirlelogo ʼbiluk mondok dogusak erlok dek eti paga, it ap yabu nggu paga kagako laguka mende inebe dogalegat nen,
“O kota endaga Feniks lausak kalok, lalok, o weyak oba o etoma pano dogusak,” yiluk wene mbalkuka. Wene esigit diluk mbalkuka eti, i enggen mbalekma endaga Kreta etoma, o Feniks i alunggutla etoma o mo liyokogo unggiligogoma mot-mot abel ombongge ambe mbalegat, wemangge ambe mbalegat werekma, nggu kol yirlelogo ʼbiluk pano dogoligogo eti paga yisuka.
Kwiyakne aninirogo i laut oba pulka wagike wene
13Nit etoma werekma, kwiyakne i laut mot-mot nen erogat pulka wagikemo, it ap yabu nggu paga kagako laguka mende nen,
“Nit luwogoluk yogo etnogo arat lausak kagat laga,” yiluk nggu kol yirlelek mende piyalogo wolok, i enggen mbalekma endaga Kreta eragalilungge korokogo wagagu. 14Mende, korogat wagagu kak, kwiyakne endaga werek mende o mo dagi wirigogo mot-mot abel ombongge i aik oba mot-mot nen aninirogo mondok pulka wagike. 15Pulka wisigin ambasike, nggu unggul kwiyakne aninirogo wagikemongge mot-mot wolok wisusak erlok dek agikemo nen, etingge mot-mot wolok wagidek togot diyalok werekma, kwiyakne nen nomokogo woknisek wagike. 16Woknisek wagikemo nen, nggu eyagarlak mende nggu nggok mende nen likalok wolok liligogo mende eti aʼbetogo ninggit diluk kerle komasuʼbuk kagat lagikemo nen, i enggen mbalekma ʼbugurlagat mende endaga Kauda eti kwiyakne laberogo negen abel wemangge nomokogo wago dogolik, nggu eyagarlak mende etnogo kerle yirlelogo pano komakuka. 17Esigit diluk komakukasik, nggu nggok mende oba ʼbisuka. Oba ʼbiluk nen, nggu nggok mende etnogo ebe aʼbetogo yiluk nggombi nggu abel akmangge legerogo kerle komakuka. Komakukasik, o Libia mot-mot etoma i agup dekma kwiyakne nen i wol endaga Sirtis oba ngget-nggetogo ʼbinani launogo yiluk, inayuk nen, su kwiyakne nen wogisek lowagaluk liya ʼbiligogo mende eti wusa ʼbi wagukama, kwiyakne nen yugunat woknisek wagike. 18Esigit diluk wagonem, kwiyakne nen mondok mirlak-marlak woknisek wagonem, kubengge nggu ebe alte asuwagaluk yi mende ndi mende akla yukarlek welagike mende amberek kirlelogo ima wula ʼbiyasi laguka. 19Wula ʼbiyasi lagukasik, kubengge, it ap yabu nggu paga kagako laguka mende nen, nggu kol inom, yi mende ndi mende amberek inom, inenggaerek ininggi nen piyalogo wula ʼbiyasukaat. 20Esigit diluk wula ʼbiyasukasik, nininggi dogalegat kwiyakne aninirogo pulkasi-delkasi kagako dogolik pulka wago mondok kagakonem, mo inom, kusagal inom, ninilenggen liya kigidegat dogolik, nit ninakla nen,
“Nit alebat pano woknisek lugun ambasi lago etnogo, yogondak i lugun kigi,” yiluk ninakla weyak atluk puk agagu.
21Esigit diluk ninakla weyak atluk kimbiri paganeat nen ninggidek werlegat werekma, at Paulus ebe inanggerleka melagikesik nen, men yogisasike,
“Nagarlagi o. O i enggen mbalekma Kreta nen,
Puk atni, yiluk kinasuk waki etnogo, an nane kolilepma, yi mende ndi mende weyak agik, nuk agik, kagako eti, kagatlep dek o. 22-24Mende, nagarlagi o. An nebe indewerek Allah atma, an nen at pogorarigogo mende nen, malaikat omanggi yogondak kibanggo noba laʼbi wagama nen, neragalilu melasi waga. Melasi wagasik, men yokneke,
Paulus. Kayuk dekogo dogono o. Kat yabunggane Kaisar elokoma melasi lausak eti paga, akoni etoma taʼbokogonat kinom nggu paga lago lagap mende, at Allah obabut pano nen kat kaʼbuwa nen kinomat ndil kinabigin o, yiluk yokneke, nagarlagi o. Kinendainggen dirlukogo dogobagik nen yiluk, wene yi yokisak. Ninebe omanggi i lugun mondok dek o. Mende, nggu ebe elamat lasigin o. 25Eti paga, nagarlagi. Allah nen yokneke eti kagat, eberogonat kagat lasigin yiluk, nendainggen at oba panggot diluk werek eti, kit kinendainggen dirlukogo dogoni o. 26Mende, i enggen mbalekma omanggi aik oba ngget-nggetogo ʼbinani ligin o,” yiluk yoknisasike.
27I Andria yenggelek agum pagangge kwiyakne nen woknisek wago nggorlek, nininggi 13 paga noge yisugusik, nininggi omanggi paga o kibanggo enggendurlem it ap yabu nggu paga kagako laguka mende yomenogo inakla nen,
“I aik oba korogat asi wago kigi,” yiluk ambasuka.
28Esigit diluk ambasukasik nen,
“I Agup werek a? Dek a,” yiluk yalengge nggit kerle yirlelogo wusa ʼbisuka mende, 40 meter uwanat welagike. Esigit diluk wusa ʼbisukama, korok etoma wagagusik nen, yalengge yabunggane wusa ʼbisuka mende, 30 meter agup degat welagike. 29Esigit diluk welagike eti paga,
“Nggu nggit oba dikogo kagat lasunogo,” yiluk, kol yirlelogo dogowagaluk, nggu pago anggin mende 4 paga nggu agamangge nen kerle yirlelogo i akla agat oba nduntogo wusa ʼbisuka. Wusa ʼbiluk nen,
“O ibat witnek a,” yiluk yisi laguka. 30Esigit diluk yisi dogolik, it ap yabu nggu paga kagako laguka mende yomenogo nggu togot diyalok lo dukuwogoluk, it akoni amberek yogisasuka,
“Nit nen nggu anggin mende nggu unggulmongge nen kerle yirlelogo wusa ʼbi lugun,” yiluk inenggalat yisukasik, nggu eyagarlak mende etnogo kerle yirlelogo ima wusa ʼbisuka. 31Ima wusa ʼbisukama, at Paulus nen, ap tentara inewe nggok etnogo inom, agoromi yomenogo inom, yogisasi dogolik,
“It ap yoma nggu nggok yi paga dogogun dek kalok, kit kinebe taʼbokogonat ndilagun dek kigi,” yiluk yogisasike. 32Esigit diluk yogisasikemo, it nen, nggu eyagarlak etnogo kol yirlelek welagike mende ʼbogokogo laʼbisukama i lagike.
33O wisigiluk kagako nggorlek, Paulus nen it taʼbokogonat kimbiri nowagaluk men yogisasike,
“Kit kinakla nen,
Nit ninggit diluk kagat lasugun, yiluk kinakla munini ebeko dogolik kininggi 14 hari kimbiri ninggidek welagap. 34Mende, kit kinebe omanggiat i lagik, kinoba ʼbugurlagat omanggi weyak agik, kagat lasigin mondok dek o. Eti paga, pano ndilabagik nen, kimbiri omanggi nobagik nen, yiluk yokisigi,” yiluk yogisasike. 35Esigit diluk yogisasikesik, roti omanggi inggimo waganggikesik nen, it taʼbokogonat inil oba Allah keyagi warogo, at ndak nggusogo nasike. 36At ndak nasikemo, it inendainggen tiyok yiluk nen, inebe taʼbokogonat kimbiri nilik laguka. 37Nggu eti paga, ninebe dogalegat 276 wagagu. 38Ninelabut togo nasugusik, nggu ebe alte asuwagaluk gandum enggen nggu akla yukarlek welagike mende kirlelogo ima wula ʼbisuka.
Nggu i aik oba ngget-nggetogo kolan yi lagikesik nen weyak agike wene
39O wi disikemo nen, it ap yabu nggu paga kagako laguka mende yomenogo nen, i aik oba inilenggen lakasuka mendeat, o nggoma salek inobaka mbalagike. Inobaka mbalagikesik inilenggen lakasuka mende, i alunggutla wol ndalek werekma lakasukasik, men yisuka,
“Nggu ebe etoma dikogo warik lausak erlok a? Erlok dek a. Walkuwok,” yiluk yisuka. 40Esigit diluk yisukasik, nggu ebe enda puk dogowagaluk kol ilugun paga besi anggin mende yirlelogo wusakuka mende etnogo, nggombi ʼbogokogo ima wusa ʼbisuka. Wusa ʼbisukasik nggu sowat omanggi nggu unggul kwaligogo mende eti nggombi piyalogo nen, kwiyakne nen nggu unggulmongge mot-mot i aik obangge wolok lowagaluk, su nggu unggulmongge mende liya ʼbisuka. 41Liya ʼbisukama, kwiyakne nen wolok i ʼberelekma lelagama etoma nggu dikogo kagat lagike. Dikogo kagat lagikemo, nggu unggulmongge obatnerogo wako lagikemo nen, agamangge, i kokdabu wako dogolik ʼbugurlagat weyagat digik, ʼbugurlagat weyagat digik, mondok weyagat disike. 42Esigit diluk kagat lagikemo nen, it ap tentara yomenogo nen, it ininggi kerle warek mende yomenogo lo nggume dukunogo yiluk nen, inebe inasuwogoluk kagakuka. 43Esigit diluk inasuwogoluk kagakuka mende, it inewe nggok etnogo nen Paulus ndiligiluk nen,
“Esigit diluk kagasusak dek o,” yiluk wene mbalkike. Wene mbalkikesik nen,
“Nggume kinilu mende ndak mbok kayokogo ima wusalok i aik oba duki lani o. 44Nen, kit amberek o nggagalek yoma inom, nggu miyalek mende yoma inom, kininggi pagogo, wolok, inomborlik duki lani o,” yiluk yoknisasike. Yoknisasikemo, esigit dilugat ninebe taʼbokogonat ndilogo i aik obangge pano dukisugu.
Currently Selected:
La’biyaske 27: DNA
Highlight
Share
Compare
Copy
Want to have your highlights saved across all your devices? Sign up or sign in
