La’biyaske 10
10
Kornelius nen Petrus ayonggo ʼbisikemo, oba wagikesik kagakike wene
1O Kaisarea etoma ap omanggi dogalek tentara endaga ap Italia omanggi dogalek yiluk yisi laguka mende at omanggi inewe nggok mende endaga Kornelius welagike. 2At ebe inom, aʼburi inom, Allah inayukogo dogolik pogorako laguka. Pogorako dogolik it akoni Yahudi mende yomenogo amberek inamende dek mende nggokogo yamagiyasi dogolik, sembayan togot digidek yisi mondok welagike. 3Esigit diluk yisi mondok dogolik, inggi omanggi paga, o mo iliyok yi lago nggorlek jam 3 negen, aʼbingganggo men kasike. Malaikat Allah nen yonggo wusa ʼbiya wirigogo mende yomenogo omanggi wusa wagikesik Kornelius oba unggisikesik nen,
“Kornelius,” yiluk ane pakasike. 4Ane pakasinem, at Kornelius ilenggen at oba ʼbirogo dogolik, ayuk agikesik nen,
“I, newe. Nenaluk,” yiluk yisikemo, at nen,
“Dek o. Kat sembayan yigik, akoni inamende dek mende yamagiyigik, kagarigogon eti paga, Allah ilu agasik koba eberek werek o. 5O yogondak o Yope etoma ap omanggi endaga mbere. Omanggi Simon yigik, omanggi Petrus yigik, yiligogi mende etnaga wisuwagaluk, ap amberek at ayonggo laʼbiyano o. 6At ebe ap kuso wagasik nen, ap Simon ʼbagi owado inom, sapi owado inom nggarogo mbugut diligogo mende etnaga aguma i laut nggok yenggelekma aik oba etoma werek o,” yiluk yogokike. 7Arat yogotluk nen, malaikat Allah nen yonggo wusa ʼbiya wirigogo mende etnogo dukisikesik dagasikemo, at Kornelius nen, anduwanengge uma dogoligogo mende inebe mbere inom, ap omanggi ebe tentara mende obabut Allah ebe pogorako dogolik Kornelius anggorlem dogolik inom mondok noko lagike mende eti inom, waisasike. 8Waisasikesik laʼbiyagaluk kagako dogolik, wene aʼbingganggo kasike wene etnogo yogisalok nen, o Yope laʼbiyasike.
9Laʼbiyasikemo, it etnogo kubengge kolagarlem lagukasik o Yope korogat ungguwogoluk lago nggorlek, at Petrus etnogo dinggagane jam 12 sembayan yigiluk o warlengge sabak ndalekma dagaligogoma dagasike. 10Dagasikesik sembayan yisi dogolik, kimbiri abu agikemo, akoni amberek nen kimbiri nowagaluk uma awan werako nggorlek, aʼbingganggo men kasike. 11Mbogot nggagukogo, su kain nggok mende unggut mbere o mbere o yugu mende kerle yirlelogo agat oba wusa ʼbi wagonem ilenggen kasike. 12Su kain eti akla, agat oba liligogo mende, yi wam ndi wam, yi warlo ndi warlo inom, mbogot oba putluk liligogo mende, yi sewe ndi sewe inom, taʼbokogonat yukarlek welagike. 13Werekma Allah ane ta nen salek yogoko dogolik,
“Petrus. Kebe melatluk nen etoma warogo nan o,” yiluk yogokike. 14Esigit diluk yogokikemo, at Petrus nen,
“Dek o. Newe. An wusa mende inom, wogalogo kagakidek mende inom, we negen inom ninggidegat dogoligogo o,” yiluk yogokike. 15Esigit diluk yogokikemo, ane etnogo nen yogokikesik, omanggi yabunggane yogoko dogolik,
“Allah nen,
Pano nausak, yiluk yisi kalok, kat nen,
Wusa, nausak dek, yiluk kakla ambagup o,” yiluk yogokike. 16Inggi mbere paga esigit diluk yogokikesik, omanggi paga yogotluk nen, kain etnogo mbogot oba nen nggigikogo waganggikemo suguluk dagasike. 17Dagasikemo at Petrus nen,
“Naʼbingganggo kigi eti ebe nena mende,” yiluk obake mbalagikesik akla ebeko werekma, it ap Kornelius nen laʼbiyasike mende yomenogo lagukasik, akoni amberek yogisasi dogolik,
“Simon aguma nggi,” yiluk kinok waganggukama, it nen,
“Ago eti,” yiluk yisukama, kolagambe paga arat unggisuka. 18Unggisukasik inane uma nggola ʼbisukama, inebe dukisukama men yogisasuka,
“Ap kuso mende endaga Simon Petrus etnaga yoma wagasik kinom werek a? Dek a,” yiluk kinok wagangguka. 19Kinok waganggonem, at Petrus aʼbingganggo kasike mende etnogo,
“Ebe nena mende kigi,” yiluk akla ebeko werekma, Allah Agurengge nen,
“Ap inebe kenagan mende kweyakabik wagakasik werek o. 20Kat kebe mendokogo wusalok, it eti an nenat laʼbiya wagima wagaka eti paga,
Ninom lausak erlok dek, yiluk, kakla ebekidek kinom lano o,” yiluk yogokike. 21Yogokikemo, at Petrus inoba wusasikesik nen, men yogisasike,
“An nebe kweyak nabik wagap eti, nebe yi o. Kit nenaluk nen wagap,” yiluk yogisasike. 22Esigit diluk yogisasikemo, it nen,
“Ap tentara inebe dogaligogo mende inewe nggok endaga Kornelius, eti nen laʼbinani wagama wago. At eti obabut mot-mot kagakik, Allah ebe ayukogo welagik, kagarigogo mende yiluk, it akoni Yahudi mende taʼbokogonat nen aren mbaliluk nen, esigit dilugat abok pano yiligogi. At eti esigit dilugat kagakonem, malaikat Allah nen yonggo wusa ʼbiya wirigogo mende yomenogo omanggi nen,
Petrus nen wene kat kasuk kolusak mende yokisigin werek o, yiluk kat kayonggo laʼbinani wisuwagaluk yogokemo, at nen laʼbinani wagama koba wago o,” yiluk yogokuka. 23Esigit diluk yogokukama, at nen,
“Kalok, an ninom noge yuwok nen, unggi witni,” yiluk yogisasike.
Yogisasikemo noge yiluk nen, kubulukngge iniluk atluk nen, it Allah aʼburi o Yope etoma mende inomat waguka. 24Wago dogolik, kolagarlem ininggi omanggiat noge yiluk nen, o Kaisarea waguka. Wago nggorlek, at Kornelius inelokoma dogolik, at eugi agoromi inom, at agarlagi irugi at inom kunik mende inom, inayonggo ʼbisikemo, taʼbokogonat nandorlek werekma waguka. 25Wagukasik nen, at Petrus ebe uma unggigiluk kagakonem, at Kornelius nen at ebe waganggikesik indibagal yunggulogo Petrus apma soma yiluk pogorakike. 26Esigit diluk pogorakike mende, at Petrus nen,
“Dek o. Newe. Melasin. An nebe akoni mendeatma esigit diluk pogot nabusak dek o,” yiluk inggi pagogo mendisike. 27Mendisikesik nen, imbisagat wenenggak yilik-yilik uma unggisukasik, akoni dogalegat nandorli wagukasik werekma at Petrus ilenggen iyasike. 28Ilenggen iyalok, men yogisasike,
“Nit akoni Yahudi mende kit akoni sikmangge mende ninom kunggik, nit kinoba unggigik, kagasusak dek yiluk, wene mbalek dogoligogo mende kinilu. Mende, at Allah nen,
Akoni amberek etoma inom dogusak wusa maga, yiluk kagasusak dek o, yiluk yanggul nekemo, 29kit nen nayonggo laʼbegepma naʼit yiluk degat wagi o. Wagi mende, wene omanggi kinok wokiyak. Wene ebe ninggit diluk nen nayonggo laʼbiyegep,” yiluk yogisasike. 30Esigit diluk yogisasikemo, at Kornelius nen,
“Uwage mo iliyok yi lago nggorlek, jam 3 paga o ya ndak-ndak sembayan naguma yigi. 31Sembayan esigit diluk yisinem, ap omanggi iyom aʼbigil weyak yugu mende an neragalilu melasi wusa waga. Melasi wusa wagasik nen,
Kornelius. Kat sembayan yiligogon eti, Allah asuk kolkemo. Nen, akoni inamende dek mende yamagiyaligogon eti, Allah nen koba eberek werek o. 32O Yope etoma ap endaga Simon Petrus ayonggo lowak nen ap amberek laʼbiyan o. At ebe, ap kuso mendeat wagasik nen, ap endaga Simon, ʼbagi owado inom, sapi owado inom nggarogo mbugut arigogo mende etnaga aguma i laut nggok yenggelekma aik oba etoma werek o, yiluk yokneke. 33Eti paga, an ninggi omanggi dogoluk dek, ap amberek kayonggo koba laʼbiyigima, kat kobabut pano nen puk agidek pano wagan, newe. Nit taʼbokogonat yogondak Allah il oba werek yoma, ninewe Endaganggok nen,
Wene yogisano, yiluk yokeke mende, wene eti taʼbokogonat ninasuk koluwogoluk werek o,” yiluk yogokike.
At Petrus nen wene yogisasike wene
34At Petrus nen wene erlo paga nen yogisasi dogolik,
“At Allah nen, akoni amberek elokoma ʼbiyigik, amberek omborlikngge ʼbiyigik, kagarigogo mondok dek, yiluk yogondak nen didigi. 35Akoni inunggulowak endaga ya mende nda mende at ebe inayuk dogolik inobabut mot-mot kagarigogi mende woginabigogo kigi. 36Mende, nit akoni taʼbokogonat ninewe Endaganggok Yesus Kristus nen dambukogo ʼbinanuwagaluk, wene pano wene eti, ebe nit akoni Yahudi mende ninoba laʼbi wagike eti kinilu o. 37-38Wene ebe kagat lagike eti, at Yohanes nen ima wusa ʼbiyasi dogolik, wene ima wusa ʼbiyaligogi wene eti yogisasi lagikesikmo nen, at Yesus ago Nazaret mende eti, Allah nen Agurengge oba wusa ʼbi wagik, obatne wogokik, kagakikesik, imbisak welagike eti paga, alebagik o Galilea etoma nen, o akoni Yahudi mende inaguma yi ai ndi ai etoma lago dogolik, yi mende ndi mende panorogo kagakik, it amberek Iblis nen aʼbetogo pagisek welagike mende pano kagarinakik, kagarik noko lagike eti kiniluat o. 39Akoni Yahudi mende inaguma o yi ai ndi ai etoma inom, o kota Yerusalem palekma etoma inom, noko dogolik, at nen kagako lagike mende eti, taʼbokogonat nit ninilenggen kasugu. Esigit diluk mende, at ebe o paga mendiluk wakuka o. 40Esigit diluk wakuka mende, inggi mbere warek welagikesik, inggi omanggi paga, Allah nen ilugut disikesik nen, ebe akoni nen inilenggen kowagaluk winamet disike. 41Winamet disikemo, akoni taʼbokogonat inilenggen kigi dek. Alebat at Allah nen,
It inebe endaat inilenggen kowak o, yiluk mik ninakike mende negen, at Yesus ebe warek werekma Allah nen ilugut disikemo, nit at ebe ninom dogolik kimbiri inom, i inom, ninomat nasugu. 42Esigit diluk kagako dogolik, nit nen akoni wene yogisilik lago dogolik,
Akoni taʼbokogonat, watlaguka mende inom, iniluk werek mende inom, wene inoba ʼbigik, nggokik, kagasuwagaluk, Allah nen Yesus etiat mendisike, yiluk, kundukogo yogisilik lago dogowagaluk ninayonggo ʼbisike. 43It ap Allah wene yogisasi laguka mende yomenogo taʼbokogonat nen, Yesus abok yisi dogolik, men yisuka,
At ebe wagonem, it akoni weyak kagarigogi mende inendainggen at oba panggot dugun mende inebe dombok, it weyak kagarigogi mende eti, at Allah nen at Kristus endaga paga sagalogo deget diyagin o, yiluk yogisasi laguka,” yiluk at Petrus nen yogisasike.
Akoni sikmangge mende Allah nen Agurengge wogisasike wene
44At Petrus nen wene eti awan yogisasi werekma, Allah Agurengge it akoni wene eti inasuk kolko laguka mende yomenogo inebe taʼbokogonat inoba wusa wagike. 45-46Esigit diluk wusa wagikemo, it akoni Yahudi mende wene eberogonat yiluk wagangguka mende Petrus inom o Yope nen wagukasik werekma, Allah nen Agurengge esigit diluk it inoba wusa ʼbi wagikemo, waganggukasik, wene it ninat mende inane inonggodek mende paga elalinat yigik, Allah pogorakik, kagakonem, inilenggen kigik, inasuk kolkik, kagakukasik nen, men yisuka,
“Allah nen Agurengge it akoni sikmangge mende erlogat wogisekemo kigi. Ninayuk a,” yiluk pogorakuka. Esigit diluk pogorakukama, at Petrus nen, men yogisasike,
47“Lakani. It yi Allah Agurengge nit woknisasike eti kagat, it wogisekemo korlega o. Eti paga, ta nen,
It ima wusa ʼbiyausak dek, yiluk wene mbalusak ambegep. Erlok wusa ʼbiyausak o,” 48yiluk yogisasikesik, Yesus Kristus endaga mbalogo ima wusa ʼbiyawagaluk, it amberek yogisasikemo wusa ʼbiyasuka. Esigit diluk wusa ʼbiyasukama it nen, at Petrus yogoko dogolik,
“Newe. Kinggi mbererlagat ninom dogoluk nen lanok nen o,” yiluk ayonggo ʼbisukama inom welaguka.
Currently Selected:
La’biyaske 10: DNA
Highlight
Share
Compare
Copy
Want to have your highlights saved across all your devices? Sign up or sign in
