1Korintus 6
6
“Allah aʼburi mende wene inoba werek kalok, akoni Allah wene inonggodek mende inayonggo ʼbusak dek,” yiluk yogisasike wene
1Kit Allah aʼburi mende, kit-kit kat omanggi nen at omanggi wene oba ʼbegen kalok, Allah aʼburi mende nen mbilel diluk wene eti oba ʼbigik nggokik kagasuwagaluk inayonggo ʼbigidek, it akoni weyak kagarigogi mende inayonggo ʼbiligogi eti nenaluk. Kinenggarli dek a? 2Yabunggane Allah aʼburi nen akoni agat oba mende yoma wene inoba ʼbigik nggokik kagasugun eti kinonggodek nogo? Esigit diluk kagasugun kalok, wene ʼbugurlagat mende eti, kit nen mbilel diluk nen wene inoba ʼbigik nggokik kagasusak dek nogo? 3Nit nenat, it malaikat Allah nen yonggo wusa ʼbiya wirigogo mende yomenogo, wene inoba ʼbigik nggokik kagasugun eti kinonggodek nogo? Nit agat oba yoma dogolik, akoni wene yi mende ndi mende pasik inoba agonem, nit nen mbilel diluk wene inoba ʼbigik nggokik kagasusak dek nogo? Kagasusagat o. 4Wene esigit diluk mende kinoba ago kalok, mbilel diluk wene kinoba ʼbigik nggokik kagasuwagaluk sani inayonggo ʼbiligogi? Nit Allah aʼburi nen,
“It eti inobabut weyak,” yiluk yiligogi mende eti inayonggo ʼbiligogi a? 5Kinenggarli warigogo o. Kit kinagarlagi kinirugi kinom, kat omanggi nen at omanggi wene oba ʼbegen kalok, ap Allah aʼbut akla mondok nggagalek dogolik wene mbilelogo deget dusak mende omanggiat dek nogo? Weregat ambigi. 6Mende, kat omanggi nen kagarlak omanggi wene oba ʼbiluk, akoni inendainggen Allah oba panggot digidek mende nen mbilelogo wene oba ʼbigik nggokik kagasuwak nen yiluk inayonggo ʼbiligogon eti. 7Kit-kit kinagarlagi kinirugi kinom mende, kinom wenemuk-wenemuk mondok welagap eti paga kai dakaligogi o. Kit weyak kagat kinakonem kinobakanini dogumo weyak a? Elamat kinako kalok togot diyamo weyak a? Pano o. 8Kit kinagarlagi kinirugi kinom mende, weyagarinakik, elamarinakik kagarigogi o. 9Akoni weyak kagarigogi mende Allah apma ʼbiyaligogoma eti indewerek asugun dek o, yiluk, kinonggodek nogo? Kinenggaerek nen dalagup. Kumi ap yugunat kagarigogi mende inom, inendainggen ngganengge oba panggot diluk dogolik pogorarigogi mende inom, ap inagugi mende yogot paʼbiyiligogi mende inom, ap nen kumi paʼbiyiligogi kak it ap-ap paʼbiyiligogi mende inom, 10inil arurlu waganigogi mende inom, inamikmak weyak kagarigogi mende inom, ambusu kunu-gunu asuwogoluk niligogi mende etnogo nasi mondok dogoligogi mende inom, inabok weyak wene inenggalat inoba ʼbiyiligogi mende inom, ininggi abusak waganigogi mende inom, it akoni esigit diluk kagarigogi mende eti taʼbokogonat Allah apma ʼbiyaligogoma eti indewerek asugun mondok dek o. 11Alebagik kit amberek esigit diluk kagako lagagip mende, yogondak Allah nen kinakla pano sobalogo ʼbinagisikesik, kinebe at enggaerek ake ʼbakasikemo werek o. Wene kinoba welagike mende eti, ninombae Allah Agurengge nen ninewe Endaganggok Yesus Kristus endaga paga, nggorogo laʼbisikesik Allah kinom dambulogo ʼbinagisikemo werek o.
“Kinebe Allah ake ʼbiyalok pano kagako dogusak,” yiluk yogisasike wene
12Kit mende omanggi nen yisi dogolik,
“An yi mende ndi mende yugunat kagasusak arlek,” yiluk yiligogi mende, an nakla nen, yi mende ndi mende taʼbokogonat eti nen panorinabusak ʼbuk. Yi mende ndi mende eti obatne atluk, eti mende nen an nebe apma ʼbanusak naʼit o. 13It amberek nen yigit diluk yiligogiat,
“Niligogi mende eti ninelabut ake. Nen, ninelabut eti niligogo mende ake,” yiluk yiligogi. Esigit diluk yiligogi mende, imbisagat Allah nen yabunggane deget digin werek o. Allah nen, ninebe yi, kumi ap yugunat kagako dogowagaluk winamet dinanggike ʼbuk. At te, ninewe Endaganggok akeat winamet dinanggike o. Ninebe yi indewerek, ninewe Endaganggok werek o. 14Allah nen, ninewe Endaganggok watlagikesikmo nen ilugut disike kak, at obatne paga, nit ninilugut ninabiginat o. 15Nit ninebe yi Kristus inggi iyok negen werek, yiluk kinonggodek nogo? Ninebe Kristus inggi iyok werek eti mende waganogo, kumi inobabut yugunengge kagarigogo mende eti inom kunusak nogo? Mondok dek o. 16It ap kumi inobabut yugunengge kagarigogo mende eti inom kun diluk nen, inebe omanggiat arigogo, yiluk kinonggodek nogo? Allah nen yisi dogolik,
“It inebe mbere mende yabunggane omanggiat atluk dogogun o,” (Kej. 2:24)
yiluk yisikemo kolal mbalogo ʼbisukama werek o. 17Nit ninebe esigit diluk kagat larigogi mende, ninewe Endaganggok ninom kun diluk nen, at ninom ninendainggen omanggiat arigogi o. 18Kumi ap yugunat kagarigogi eti mende kagako dogunogo yiluk, lo lago dogono o. Yi weyak ndi weyak kagarigogi eti inowado abel sikmanggeat kagarigogi. Mende, kumi ap yugunat kagariigogi eti, inenggaerek inebeat weyagat dakiligogi o.
19“Allah nen Agurengge woknisasikemo, ninebe at ago palek werek,” yiluk kit kinonggodek nogo? Kinebe kinenggaerek indewerek ʼbuk. At indewerek o. 20Allah nen, kinebe onggo arat ʼbogokogo mbalogo wokinakikemo werek eti paga, akoni nen at pogorasuwagaluk, kinebe at ake pano kagako dogono o.
Currently Selected:
1Korintus 6: DNA
Highlight
Share
Compare
Copy
Want to have your highlights saved across all your devices? Sign up or sign in
