Filemón 1
1
Kalparaswi
1Yang, Pal, Krais Jisas yulni silak kau sakyang, adika wauhnitaya maultayang wirah Timoti karak, man yakat Filemón, kaltalyang yamni wark aslah malahwa kidika, 2dawak suts muihni balna ū yakat kalududuhwa kidika, sihm kaput bik wirah yal Apia dawak Arquipo,#Col 4:17. mayang karak kalpakwi kalbauwa kidika. 3Mayang Mapapangki dawak Madakiwan Jisaskrais tingnikih dawak kulnin aslah kidika utuhwang mamatna yakat.
Dalani lani dawak kasak kulninFilemón duwa kidika
4Nining Papang kau tingkih kalatayang, man yakat makultayang kat mikityultayang kat, 5kat yul dakanayang, man dalani lani dawak kasak kulnin bik dutaman kidika Dawan Jisas yakat dawak tawan holi muihni balna bitik kau. 6Dawak Papang yakat yultayang, kasak kulnin dutaman kidika madukiwak amanglanam Krais Jisas dalani lani duwa kidika munah di yayamni bitik yamnin sipmayang kidika.#1.6 Dawak Papang yakat yultayang...sipmayang kidika: satuk wirlanin sipki: Dawak Papang yakat yultayang kasak kulnin lani mayang karak dutaman kidika parasni atnin, kaput laih amanglanin mapasking yakat di yamni yamnin sipki, Krais yulni. Grik kau laih amangladaski. 7Isinglak ki, dawak kulnik bik dulauwi dalani lani dutaman kidika yulni, wirah, walaniānin isningna yakat bahngnaman kidika tawan holi muihni balna yakat.
Pal, Onésimo silak kau tuskidikailpni yulwi
8Kidika bahang, yang Krais aposnitel yang kapat rahmki dutayang mapakting yamnam, ais yamnam dini kidika, 9kalma dinit yakat buktik yulkih yawi dalani lani ayangni kau. Yang, Pal, uman muihbarak kalnayang, dawak waralaih Krais Jisas yulni silak yakat yang. 10Ilp as yultayang, walakibis Onésimo#Col 4:9. yulni, yang witing papangni kalnayang kasak kulnin kidika munah silak ūni akat.
11Ma ūk balna yakat, man namangyakat Onésimo kidika laih silak muihni as ilp as bik disdai, kaunah waradika laih mayang maniking yakat ilp as ki.#1.11 Waradika laih mayang maniking yakat ilp as ki: sipki yulna atnin adika ayangni, Onésimo, tanka laih yusyamnin sip kidika. 12Wattik nawattik masihtayang: kidika laih walakibis bakipas kaupak kaina. 13Sipdai yang dukih yanin witing kidika akat yang karak watnin, kaput laih man pama yakat wark yamnin, yang laih silak akat tusyang kat, yul wisamni yamni kidika yulni. 14Kaunah di as bik yamkih yāwaski, man lawa yamni talasman kat, kaput laih ilp yataman kidika man yamnam dini kaput laih atnin awaski, kaunah man alas kulnam lani. 15Sip kat Onésimo kidika man kaupak isyaklana ma as as, kaput laih warmani ban yaihmat yakat dunam, 16muih dinina yamyang kapat laih awaski, kaunah waralaih tanit yamni ki: wirah dalani as kapat. Yang dalani kaltalayang, kaunah man laih tanit dalani talnamki, muihni nuhni kidika manah laih awaski, kaunah Krais niningyakat wirah as kapat.
17Kaput bahang, kasak kulnin yakat wirah kapat yadutaman kat, dutah yang apat kultinah. 18Di dutni as mayamna, kidika awaskat lauwi manin duwa kat, yang akat minit yakultah. 19Yang, Pal, tingki kau laihtik ultayang wauhnitaya adika: Yang lautik maki. ¡Man launam wauhnitaya yakat ānin yultasyang, kat man muihma nuhni palni bik yanin dutaman bahang! 20Agha, wirah, man yakat ilp as yultayang, Dawan dalani lani karak; kulnik adika walaniatah Krais yakat kalwirah mayang kapat.
21Maultayang, kat yamni amanglatayang yul kidika daka yamtaman bahang, dawak bik amanglatayang, mayultayang adika baisa minitkau yamma. 22Baisa minityakat, payahnik pāni ridi yamtah; kat tahatayang, manna mamatnayultamana yulni, Papang yaklauwi yāwak yawik manatalki.
Witni yakat paraswi
23Epafras#Col 1:7; 4:12. paraswang, silak akat aslah yangna dai kidika Krais Jisas yulni, 24Marcos,#Ap.w 12:12,25; 13:13; 15:37-39; Col 4:10. Aristarco,#Ap.w 19:29; 27:2; Col 4:10. Demas#Col 4:14; 2 Tim 4:10. dawak Luk#Col 4:14; 2 Tim 4:11. bik, witingna wark yakat ilp yayawa dai kidika.
25Dawan Jisaskrais witing tingnikih kidika mamatna yakat utuhwang.
Currently Selected:
Filemón 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998