Tito 3
3
Kulyang balna yamninna dini kidika
1Muih ūk balna yakat isningnapaktang kat kabamint dawak la tunan balna kidika tingnina dinityakat bik kakawang, yul kat dakakawang dawak di yamni kidika bik yayamwang. 2Muih as yakat bik dutni yulninna awaski, kulnin aslah lani dawak dalani lani bik duduwang, dawak isningna kidika buknin lani duduwang muih balna bitik yakat.
3Kat muhnilau kau laih yangna bik sins dis dawak bik dudutni yangna dai; disnayangna dai dawak dukih lani satni bitik kau bik warau yanaduwadai. Dutni dawak tumnin lani yakat yalahtayangna dai, dutni yanayayamna dawak biri biri dutni kalyamtinah bik yalahtayangna dai. 4Kaunah Papang mailaihwi yakyang witing dalani lani duwa kidika manikingkana muih balna bitik yulnina, 5mailaihwi yakna, mayang di yamni yamnamayang yulni laih awaski, kaunah witing yaklau mamikun maitalna kidika yulni.#Dn 9:18 Maisuhwi yakna#Ef 5:26. kidika munah maiyamwakat watdi batahndi malahwana; Spirit Holi munah masangkika wisamni mayana; 6dawak mailaihwi yakyang Jisas Krais munah Spirit Holi kidika minitbayak mayana, 7kaput karak, witing dalani lani kau madutki kaupak mailaihwi yakna usnit kat, sangka atnin lani ban kaput tahada kidika duna atnin yulni.
8Adika laih rahm palni ki, dawak yang dukih yawi man lawa witingna yakat baisa diyulna atnam, Papang yakat rahm kukulwa muihni balna kidika di yamni kidika yamna atninna yulni. Adika dini balna laih dunin dini balna yayamni ki muih balna bitik kau. 9Kaunah kalbilnin lani dauh kidika, muihbararak balna kisinina yulni kidika, sahwi kalahnin lani dawak Moses lāni yulni kalbaunin lani kidika bik datah. Kidika balna laih di yayamni awaski dawak bik sinsni lani diski.
10Muih as yaklauwi suts pasyakat sahwi kalahnin lani yamwarang kat, wat as dawak wat bu isningpaktah; kaunah yulma dakawas karang kat, kidika kaupak yakpamtah, 11Bahang man amanglanam ki kidika muihni laih sinsni daukalna kidika dawak bik witing silp dutni yaklau pāt yakat āwa kidika.
Muihnina kat kat disumalna kidika
12Yang lawik Artemas yakat kidik awaskat Tíquico#Ap.w 20:4; Ef 6:21-22; Col 4:7-8; 2 Tim 4:12. yakat masihki mani kat, traitala Nicópolis yakat yawa yatalma, kat kidika pāni yakat wasma mani kidika bayaknik kulnik aslah dunayang. 13Man ais yakat sipman kidika layar Zenas dawak Apolos#Ap.w 18:24; 1 Kor 16:12. yakat ilp diatah, di dunin dini balna kidika diatah tanitna yakat uinin yulni dawak di as bik dis atninna awas. 14Dawak mayang kaupak balna kidika bik di yamni kidika yamwi lan kalna atninna dawak di dukih atnin lani balna yakat bik ilp diana atninna, kaput karak witingna sangninaka kidika dunin dini balna atnin.
Kalparasnin dawak blis witni kidika
15Yang karak bang kidika bitik yaklau parasnin lani masisihwi. Rahm kulnin lani niningkauh mayang karak kaltalyang yayamni balna kidika yakat diparastah. Papang minikun talnin lani duwa kidika manna bitik mamatna yakat lakna karang.
Currently Selected:
Tito 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998