Zacarías 9
9
Yaihnitna kau nisan balna kidika wah diana
1Adika yulni kuduh Dawan yaklauwi isningnapakwadai kidika, Hadrac dawak Damasco tawanni nuhni sauni kidika niningyakat:#Is 17:1-3; Jr 49:23-27; Am 1:3-5. “Siria tawanni nunuhni balna#9.1 Siria tawanni nunuhni balna: kaput ulna kidika yamni kapat ki. Hibru kau laih yulwi muih al minikpa. kidika laih Dawan dini balna, sihm Israel sulani balna kapat. 2Hamat bik witing dini, kidika tawanni nunuhni balna yaihnitkau kidika, dawak Tiro, Sidón#Is 23:1-18; Ez 26:1—28:26; Jl 3:4-8; Am 1:9-10; Mt 11:21-22; Lc 10:13-14. witingna yalalahwa lani balna bitik. 3Tiro laih ū pararasni balna kidika yamna, dawak uduhna gol dawak lalah bik, muih as wasmak kuhrwi uduhwakapat. 4Kaunah Dawan yaklauwi kidika balna bitik dakyakna karang, dawak ritsni balna kidika bitik laih kuma yakat ruhmna karang, dawak tawanni nuhni kidika bitik laih busna karang.
5“Ascalón tawanni nuhni kidika dini talwarang kat, muihsak dauwarang. Gaza bik kasak wauhna karang, dawak Ecrón witing tahanin as duwadai kidika saukat bukna karang. ¡Gaza kidika king dis kalwarang, dawak Ascalón muihni dis kalna karang! 6Asdod yakat yalalahna karang muih āni sat ūk karak kalbananana balna kidika, dawak kaput laih filisteo balna witingna manah kapat kaldakakawa kidika sau kat bubukna karang.#Is 14:29-31; Jr 47:1-7; Ez 25:15-17; Jl 3:4-8; Am 1:6-8; Sof 2:4-7. 7Dawak witingna tininapas kau dimuihni ā manah kakaswa kidika dakyakna awaki, ananina kaupak, kasnin dini dutni dai kidika kakaswa kidik. Kauna kidika muihni balna kaupak as as wawatna karang yang diki atnin yulni; bahang kidika laih Judá yakat kana karang, dawak Ecrón laih Jebuseo balna kapat karang. 8Dawak yang laih yakat manah talasak awaki, yang diki balna kidika nanitdakna atnin wais kidika munah bayakwarang kidika niningyakat. Muih taihyang muihni kidika watwi muih taihwas karang, kat waralaih yang mikpa palni kau maintalayang bahang.”
Israel kingni kawarang kidika ma balna kaiwa yakat
9¡Alasna nuhni dutah, Sayan tawanni nuhni!
¡Alasna unbautah, Jerusalén tawanni nuhni!
Man kingma#Sof 3:14-15. kidika man yakat kaiwi,
barangni dawak minit bayakna kidika karak,
kaunah kulnin limahni, biriku almuk as kau kilwi kaiwi,
biriku almukbin as kau, biriku yal walanibis kidika.#Mt 21:5; Jn 12:15.
10Witing yaklauwi Efraín kārni balna kidika daukalmukwarang,
Jerusalén aniras balna
dawak kalbaunin lasni balna kidika bik.#Sal 72:8.
Nisan balna yakat diyulna karang kulnin aslah lani kidika
dawak, kuma as kaupak kuma ūk kat kabamint kana karang,
Éufrates kaupak sau nuhni adika bitikkau sutni kat.
Israel laihwi dulauna
11Dawan adika yulwi:
“Jerusalén, pramamis āni kau,
pa kuhrna as was dis kidika kaupak yakna awaki
simalak muihni balna kidika yakat bangkidika.#Ex 24:8; Mt 26:28; Mk 14:24; Hib 9:20.
12¡Manna, tahawi talnin dai kidik silak yakat dutamana kidika,
ū parasni yakat nawatta duyawanauh!
Manayultayang blisin kalana awaki
watlamna bu, ampus wawauhna kidika yulni.
13Laski kalbaunin dini kidika istik dulnayang, kidika laih Judá,
dawak sibang as ānayang, kidika laih Efraín.
Sayan man kaupak isparah as yamki,
dawak man walamabis balna kidika dulauki,
Grecia walanibis balna niningna yakat.”
14Dawan kidika niningkana karang witing tawanni minityakat;
sinibang kidika ruhna karang sihm alwana lapwa kapat.
Papang, Dawan kidika trumpit puhna karang
dawak kawi kiuna karang wadah niningkauh wingbauwa sakyakat.
15Dawan parasni nuhni bitik duwa kidika,
witing dini balna kidika nanitdakna karang,
dawak witingna yaklauwi kiwah ruhmyang balna kininapala kidika atatakwarang
dawak waihninala balna kidika bitik kasmumukwarang;
dawak āni kidika wain kapat didina karang,
dawak dibahngna karang, sutak kau bahngwa kapat,
dawak sakripais busnin pāni kau tamni balna yakat puwi babahngwa kapat.#9.15 Dawak āni kidika...babahngna kapat: grik kau kidika kaput ulna. Hibru kau laih amangladas ki.
16Kidika mani, Papang, witing Daniwan
kidika yaklauwi laihwi yakna karang tawanni kidika sihm sīp uduhna as kapat,
dawak witing dini balna kidika yaringni karang witingna saunina yakat
kipala minit nuhni kat kraun kau āna kapat.
17¡Ais yamniyah, ais nuhni yaksihn karang sauni kidika!
Plawar minik dawak wain bik manas karang kidika,
mawalakibis ahal dawak yayal balna kidika bararakna karang nuhni yaksihni.#Jr 31:12-13.
Currently Selected:
Zacarías 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
