Zacarías 10
10
Laihwi yaknin pranimis
1Dawan yakat yultanauh, kalawak kurih wasni kidika lauwang,
dawak Dawan yaklauwi alwana lapwa balna yamwa kidika,
manas palni sihna karang,
dawak bitik yakat kalawak dibasta ukusna karang yamak yakat.
2Alas manah ki, dawan dauh balna yulnina kidika,
dawak sukiah balna tatalwa kidika bik alasmanah ki.
Witingna kaikalahwa kau yuyulwa kidika amana manah tatalwi,
sins as bik diski,
ānin yulni balna kidika bik di as bik diski pāni manah.
Kidika tawan muihni balna kidika pini awawaihwi tinglau kapat,
dawak wawauhwi maintalyang as dis bahang.#Jr 50:6-7; Ez 34:5-6; Mt 9:36; Mk 6:34.
3Kidika bahang Dawan yulwi:
“Yang kulnik daukalna sumalyang balna niningna yakat,#Ez 34:2.
dawak wah diana awaki tawanki tunan duyang muihni balna yakat.”
Dawan parasni nuhni bitik duwa kidika,
witing sīpni balna maintalwi,
Judá sulani balna kidika,
witingna kidika yamna awaki kalbauyang aniras pararasni.
4Witingna kaupak kipala tatuna kidika kalahwarang,
ū labanni sitnin panan uhukwa kidika dawak kalbaunin lasni.
Witingna kaupak kalahwarang tunan muihni balna kidika.
5Witingna kidika kalbauyang balna kapat karang
kalbabauwa yakat tapas kau wasmak kidika atatakwi;
kalbabauwarang, kat Dawan kidika witingna karak bahang,
dawak diayawak aras kilyang balna asalnina yayakwarang.
6Dawak yulwi:
“Yang lawik parasnina diaki Judá sulani balna yakat
dawak José sulani balna kidika laihtik yakki.
Dawak taninatuna āwik duyawaki saunina kat,
kat witingna kidika miniknakun talayang bahang.
Yang lawik ruhmtik datasyang dai kapat kakalna karang,
kat yang laih witingna Daninawan yang dawak Papangnina yang,
witingna minitnayuyulwa kidika dakayang.
7Efraín kidika laih kalbauyang as kapat karang.
Witing isning kidika alasna kalwarang,
wain karak alasna kalahwa kapat,
walaninabis balna kidika bik talwi alasna duduwarang.
¡Witingna isningna kidika alasna duwarang, Dawan kidika yulni!
8“Yang lawik manayultik manauduhki,
kat manalaihtik yaknayang bahang.
Watta mahni kaltanama
ma ūk balna yakat dai mana kapat.
9Yang lawik manaruhnayang nisan balna pasyakat
naikaupak kaunah, yang akat kultanama
dawak mani askat nawatta aiwanama walamanabis balna karak.#10.9 Nawatta aiwanama walamanabis balna karak: kaput ulna kidika yamni kapat ki. Hibru kau laih yulwi Witingna walaninabis balna karak yalalahwi dawak nawatwi aiwarang.
10Manayamtingkat Egipto kaupak aiwanama,
dawak manaduaiki Asiria kaupak,
dawak manaduyawaki Galaad yakat dawak Líbano yakat bik,
dawak mahni palni karang, bahang pa bik diskarang.
11Egipto#10.11 Egipto: kaput ulna kidika yamni kapat ki. Hibru kau laih yulwi kulnin kaidi. kumani kidika dakyaklalawarang,
dawak lalamwa balna kidika dakna awaki.
Nilo wasni kidika tuhni balna bitik kalating buhlakwarang,
dawak Asiria witing manah kapat kaldakawa kidika bahtik disyamki
dawak Egipto parasni kidika dahnyamki.
12Yang lawik parasni diaki,
dawak kawi uiwarang yang ayangki kau.
Yang, Dawanyang kat yulki kidika manatayang.”
Currently Selected:
Zacarías 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
