Zacarías 13
13
1“Kidika mani wastuna as buhrwi kalawarang, kidika yakat witingna dutnina dawak maisihni kidika susuhna karang, Devid sulani balna dawak Jerusalén muihni balna bik.#Ez 47:1-12; Jl 3:18; Jn 4:10-14; 7:38; Rib 22:1-2. 2Dawak adika sauni bitik laih daukalna awaki, dawan dauh balna ayangnina kat bik, kaput laih kidika balna yakat minitna yulnin awas. Dawak adika sauni kaupak prapit balna, spirit dutni balna kidika bitik yakmukki. Yang Dawanyang kat yultayang. 3Kaput laih muih as kat prapit kapat sumalnin yamwarangkat, witingna papangnina palni kidika yaklauwi diyuyulwarang: ‘¡Man daunam ki, kat man laih Dawan yulni munah alasma balna kidika yulkuhtiman!’ ¡Witingna papangnina palni yaklauwi kuhbil kau papana karang prapit kapat kaldakawakat!
4“Kidika mani prapit balna kidika asalni dakakawarang amana kapat tatalwa kidika yulnin kat. Muih as bik alas diyuyulwas karang prapit prakni diutak kidika kawi, 5nawatkauh laih witingna yuyulwarang: ‘Yang prapit awasyang, yamak warkni yamyang yang. Yang walabisyang kaupak yamak warkni yamtayang.’#13.5 Yamak warkni yamtayang: kaput wirlana kidika yamni kapat ki. Hibru kau laih amangladaski. 6Dawak muih as yulwi dakawarang: ‘¿Muihma kau madakna kidika aisyah?’ witing nangnitlawarang: ‘Kaltalyang balna ūnina yakat yayayamna.’ ”
Dawan kidika laih yang Papangki
7Dawan parasni nuhni bitik duwa kidika yulwi:
“¡Isparah lawah, sīp maintalyang niningyakat
dawak tingkisut laihyang niningyakat bik!
¡Sīp maintalyang kidika ipamtah,
dawak sīp balna kidika kalruruhwarang,#Mt 26:31; Mk 14:27.
dawak yang laih sīp balna niningna yakat yawaki!
8-9Sahyakna bās kidika kaupak,
sahyakna bu kidika laih dadauna karang
adika sauni akat yalalahwa kidika:
dawak sahyakna bās dai kidika kaupak sahyakna aslah sangka karang.
Dawak wawatwarang balna kidika
diyamting kuhpau munah bayayakna karang;
bustik maisihnidis yamki, lalah buswi maisihnidis yamwa kapat,
dawak gol maisihni dis yamwa kapat yamki.#Is 1:25; 48:10.
Kaput dawak yang akat yawawalwarang,
dawak yang lawik nangnitnalaki.
Yang diyulki ‘Yang tawanki’,#Os 2:23.
dawak witingna nangkitlalawarang:
‘Dawan kidika laih mayang Mapapangki.’
Yang Dawanyang kat yultayang.”
Currently Selected:
Zacarías 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998