Zacarías 12
12
Jerusalén laihwi yakna
1Adika kuduh Dawan yulni yulwa kidika Israel yakat. Dawan, witing kisang yamna kidika, dawak sau akat bik rahni āna kidika, dawak muih al yakat bik sangnika kalana kidika, aput yulwi: 2“Yang, Jerusalén kaupak yamtayang wain sutak kau utuhna kidika, dawak kidika yaklauwi yaihnit kau muih balna bitik wasak dilaihwa kidika. Kidika yaklauwi Jerusalén kidika awaihdadakwarang kat, Judá kau tawan nunuhni ūk balna kidika bik niningyakat kalbabauna karang.
3“Kidika mani yang lawik Jerusalén kidika kipala tikini as yamki nisan balna bitik niningna yakat. Wais dulaunin yamwarang kat kaldakna karang. Nisan balna bitik kalududhwarang Jerusalén niningyakat, 4kaput dawak, aras balna kidika bilninalauting kat kikirarang, dawak aras kilyang balna kidika sinsnina diswarang. Judá sulani balna kidika maintalki, dawak nisan balna aninaras balna kidika bitik laih miniknapa pukni yamki. 5Kidika talwi, Judá muihni kalbauyang tunan balna kidika yuyulwarang witing alas kulninna yakat: ‘Dawan parasni nuhni duwa kidika laih, Jerusalén muihni balna Papangnina, witing yaklauwi parasnina diawi.’
6“Kidika mani yamki Judá muihni kalbauyang tunan balna kidika laih kuh tuturni kuh paskau dahlwa kapat karang, dawak bik plawar minik dakwi uduhna kat kuh buswa kapat karang. Dibusna karang, tingninapalni, wadahnina yaihnit kau nisan balna bitik kidika, kaunah Jerusalén muihni balna laih watwi tawannina nuhni yakat yalalahwarang. 7Kaunah tatuna laih, yang, Dawan, Judá muihni balna kidika laihtik yakki, kaput laih Devid sulani balna tanit yamni dikulna kidika baisa baraknin awas yulni, dawak Jerusalén muihni balna bik, Judá sulani balna minitna yakat. 8Yang, Dawanyang, Jerusalén kau yalalahwa balna kidika nanitnadakki. Parasninadis balna kidika, tanit pararasni kakalna karang sihm Devid kapat, dawak Devid sulani balna laih Papang kapat karang, Dawan innisal kapat, witingna tanitna yakat kiwa kidika.
9“Kidika mani, angdik ninisan kat Jerusalén niningyakat kalbauwarang kat yang lawik daukalpamki. 10Makatyulnin dawak minikun talnin spiritni kidika bungdaki, Devid sulani balna dawak Jerusalén muihni balna yakat bik. Kaput laih witingna pawi ahllalana kidika tatalwarang,#Jn 19:37; Rib 1:7. dawak yayamwarang kulninna bahna dalani kidika, kaput bik kakaidarang witing yulni, muih walanibis aslah kidika awaskat walanibis tatuna kidika dauwak kaida kapat. 11Jerusalén yakat nuhni yayamna karang kulninna bahna dalani kidika, dawan dauh Hadad-rimón kau kulnin bahna dalani yayamwa kapat, Meguido wanilang yakat. 12Walaninabis balna kat kat, witingna silp silp kulnin bahna dalani kidika yayamwarang sauni yakat: Devid sulani balna, yayal balna bik; Natán sulani balna, dawak witingna yalnina balna bik; 13Leví sulani balna, dawak yalnina balna bik; Semei sulani balna, yalnina kauna; 14dawak sulani ūk balna bik kaput karang, witingna sip sip uiwarang, yalnina balna karak.
Currently Selected:
Zacarías 12: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
