Cantares 8
8
1¡Yamni karang man kidika yang wirahki man kat laih,
yang nanangki tani suta baraknaman!
kaput kat, tapas yakat makalpaktik
sipdai maumnik, dawak muih as bik sarahni yayulwas atnin dai;
2sipdai nanangki ūni yakat madutik yawinik,
kidika yakat mating āwanamdai,
dawak man kidika yang yasumalyang atnamdai.
Yang lawik wain tanit yamni kidika mating kat dinamdai
dawak granada minikwas kidika bik.
3¡Witing tingni wadahni kidika tunaki dinit yakat awang,
dawak tingnipal kau yawakaihwang!
Al
4Pramis yayamtanauh, Jerusalén yayalni balna,
dalani talayang muihni kamatus kidika uswi sahmuhnin awaski.
¡Datanang kamang, witing angkat sahmuhwarang kat!#Cnt 2:7; 3:5.
Unbauna tiaskauas kidika
Coro
5¿Kidika waisyah, kauhmak wanilang kaupak kaiwa kidika,
dalani talwa alni salahni yakat kilwi kaiwa kidika?
Al
Manzana panan dinit yakat minikauhni kidika ustik sahmuhnayang:
kidika yakat man nanangma dalani kallaihna dai kidika;
kidika yakat man nanangma muihbin duna dai.
Yal
6Putma minik yakat yahata yaduyawah,
¡tingma yakat bik ulta yaduyawah!
Dalani talnin kidika bahnin dini awaski, sihm daunin kapat;
kulnin yakat dalani wauhwa kidika laih sip satuk yamwas ki, sau ū kapat.
¡Dalani talnin kuhnipau daihni kidika
laih Papang kuhni as ki!
7Kuma balna wasni kidika bitik
dalani talnin kidika sip piwas karang;
was murwa balna kidika bik sip pipiwas karang.
Muih as, witing ritsni balna kidika kalawarang bik
dalani talnin kidika wirihnin,
sarahni kalyulnin manah laih duwarang.
Coro
8Mawirahki yal bin kidika tani kalahwas ki.
¿Witing kidika ais yamdarangyah
dunin, yulna aiwakat?
9Itikwi lana as kapat atnin katlaih,
witing minit yakat dakladitdai lalah kau;
dūr as katlaih,
suhun tatni kau manah yamditdai.
Yal
10Yang laih itikwi lana as kapatyang,
taki kidika laih sihm makau kilwi talnin pāni kapat ki.
Kidika bahang, witing minikpa yakat,
uman yaknayang maisinglak kidika.
11Salomón witing wain yamak as duwadai Baal-hamón yakat.
Maintalyang balna tingnina yakat āwi danadai,
minik bahnin mani kaiwi kawak kalalawadai
witingna yaklauwi muihnina kat kat lalah tausin.
12lalah tausin kidika laih man dima, Salomón,
dawak andat bu kidika laih maintalyang balna dinina;
¡yang laih alas wainki kidika maintalayang!
Al
13¡Datangkat, man damat yultaman kidika dakakuh,
dipulu dahna paskau kingnina yal man kidika!
¡kaltalyang yamni balna kidika dakanin tahahawi!
Yal
14¡Dalani matalayang muihniman kidika irah,
sana kapat irah,
sana walanibis as kapat
asang balna walapni kidika minit munah!
Currently Selected:
Cantares 8: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998