Cantares 7
7
Al
1¡Kalma kidika ampat nunuhni yaksasihn yah
chinela atangkat, king walanibis yal!
bamasar nuhni iringwi yaklakna balna kidika
kidika laih gol dini yaksihn yamna kapat ki
yamwi lan balna yayamna kidika.
2Man uduma kidika laih sutak kapat kudungni ki
kidika pasyakat wain yamni dis awas kidika;
man bāma-u kidika laih plawar minik pupuwa dini kapat ki
dipulu manah awaihdak kidika.
3Pasma kau tama balna kidika laih sana bu kapat ki,
sana bu sūtki kapat.#Cnt 4:5.
4Damamak kidika laih sihm makau kilwi talnin marfil kau yamna kapat ki;
mamakpa balna kidika laih was dakni bu kapat ki
Hesbón tawanni nuhni kau duwa kidika,
Bat-rabim dūrni yaihnit kau kidika;
nangmatak kidika laih Líbano yakat makau kilwi talnin kidika kapat ki
Damasco tawanni nuhni niningyakat talwa kidika.
5Man muihma minit kau tunama ilna sakkidika laih,
Carmelo asangni kapat ki;
basma balna kidika laih trit paisa kapat ki:
¡King as silak kau sakki, āraman pasyakat!
6Dalani matalayang, yal muih kulninna laihyang,#7.6 Yal muih kulninna laihyang: sarakau uhulna yakat kaput yulwi. Hibru kau laih yulwi auhni yamni yakat.
¡ampat yaksihn mahn, ampat nuhni yaksihn mahn!
7Man muihma nuhni kidika laih sihm kuku panani kapat ki;
dawak tama kidika laih kuku minik upuna kapat ki.
8Yang kuku yakat ilwakih yawi
minik upuna balna kidika dunik.
Kaput laih man tama balna kidika
wain minik upuna kapat karang;
wingmata puhtaman kidika laih mansana purki;
9man ahmapara kidika laih wain yamni kapat ki
yudutni kawi kiwa kidika
makungkimak dawak maanaki balna munah bayakwi kiwa kidika.#7.9 Man ahmapara...bayakwi kiwa kidika: kaput wirlana kidika yamni kapat ki. Hibru kau laih amangladas ki.
Yal
10Yang laih dalani talayang kidika diniyang:
witing kulnin yakat dalani talwa kidika yaklauwi yadu'kiwi.
11¡Yawah, dalani matalayang kidika, walang yakat mawang!
Alheñas puluni walsah yakat payahdarang.
12Mapiris wain pasyakat mawarang,
talnin, pitwi kalahwapa,
uman kurahwapa,
granado balna kidika uman puluna pa.
¡Kidika yakat dalani talayang kidika maki!
13Mandrágora#7.13 Talah Gn 30:14 yakat. balna kidika walapni yayakwi.
Madūrki yakat di minik balna satni kidika bangki:
di minik kusuna dawak wisam palni dakna kidika bik,
man dima silp lanayang bangki.
Currently Selected:
Cantares 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998