Ribilisan 9
9
1Insal singka kidika trumnipit puhna dai, dawak yala as kisang kaupak sau yakat bukwakat talnayang dai; dawak pa kudungni puksani tuhni kidika kiniting kalana dai. 2Pa kudungni puksani kidika apahna dai, dawak kidika kaupak wayau kilna dai sihm di busnin pāni kapat;#Gn 19:28. dawak pa kudungni puksani wayauni kidika yaklau ma kidika dawak wing kidika bik puksani yamna dai. 3Kidika wayauni kaupak sisin balna kalahwi sau yakat rawi uina dai;#Ex 10:12-15. dawak parasnina diana dai sihm wakurus balna duduwa kapat. 4Diyulna dai sau yakat dibasta as bik, di sangni as bik dawak pan as bik daukalnin awas, kaunah angdika muihni balna muhnina yakat Papang tampni kidika dis kidika manah.#Ez 9:4. 5Kaunah muih balna yakat laih īnin didawas dai, kaunah waiku singka pasyakat dalani manah diana atninna; dawak dalani diayawa dai kidika laih sihm wakurus dikaswa kapat dai.
6Kidika mani balna yakat muih balna kidika laih daunin kidika wawalna karang, dawak sip yayakwas karang; dauninna dukih diawarang, dawak daunin kidika laih witingna kaupak naikau kalahwi kiuna karang.#Job 3:21; Jr 8:3.
7Sisin balna kidika laih sihm war kalbaunin aniras balna kapat ki;#Jl 2:4. tunanina yakat sihm gol kraunni kapat as duwi uiwa dai, dawak muhnina kidika laih muih muhni kapat dai. 8Sihm muih yal basni kapat duduwa dai, dawak ananina kidika laih sihm layan anani kapat dai.#Jl 1:6. 9Muihnina nuhni kidika laih ayan karak tanitna dadakwa dai, dawak lawanina babahlwa kidika laih sihm kar mahni aras yakat sitwi kalbaunin yakat kakawak parasni yulwa kapat yulwa dai.#Jl 2:5. 10Mamahnina, tuminina balna kidika laih, sihm wakurus kapat dai, dawak witingna laih parasnina duduwadai waiku singka pasyakat muih balna yakat dutni diyamna atninna. 11Sisin balna taninatuna kidika laih, puksani tuhni innisal kidika, ayangni kidika hibru kau laih Abadón dawak grik kau laih Apolión.#9.11 Ayangni hibru kau laih Abadón, grik kau laih aput wirlawi Apolión, kidika tanka laih daukalyang.
12Daukalnin tatuna kidika laih bayakna dai; kaunah baisa wat bu ki.
13Insal tiaskauas kidika laih trumnipit puhna dai, dawak Papang muhnityakat sakripais busnin pāni gol#Ex 30:1-3. kau yamna kidika yakat tamni balna arungka rau kidika kaupak yulni as kalahwakat dakanayang dai. 14Dawak yulni kidika yaklau insal tiaskauas trumpit duwasak dai yakat aput kalyulna: “Éufrates wasni nuhni kung yakat insal balna arungka sitna bangkidika uluhtah.” 15Bahang insal balna arungka kidika uluhna dai, muih balna sahyakna bās kidika imukna atninna, bahang kidika awarni, mani, wainiku dawak kurihni kidika dini palni ridi yamna dai. 16Dawak kalbauyang balna aras kau ampus palni kalbabauwarang kidika dakanayang dai: kidika balna laih milian manah andat bu dai.
17Kaput talnayang dai sahmuhni amana kau kapat, dawak aras kikilwa muihni balna kidika laih pasnina kidika ayan pauni kau tanitna dadakwa dai sihm kuhpau kapat kat, sangni sihm kipala minit nuhni kapat dawak lalahni sihm sulhpa kapat dai. Dawak aras balna tunanina kidika laih sihm layan tunani kapat dai, dawak tininapas kaupak kuhpau, wayau dawak sulhpa kalahwa dai. 18Muih balna sahyakna bās kidika laih adika wahni bās karak dadauna dai aras balna tininapas kaupak kalahwa dai kidika: kuhpau, wayau dawak sulhpa kauna. 19Kat aras balna parasnina kidika laih tininapas dawak mamahnina yakat duduwa dai; bahang mamahnina kidika laih sihm bil kapat dai, dawak tunanina karak di daukakalwa dai.
20Kaunah muih balna ūk kidika laih, adika wahni yakat dadauwas balna dai kidika, warmani kat bik dutni yayamwa dai kidika dadawaski, dawak walasa yakat ayangni tanit nuhni yayamwa dai kidika dadawas ki dawak dawan dauh balna gol, lalah, bras dawak pan kau yamna balna dai kidika yakat ayangni tanit nuhni yayamwa dai kidika bik dadawas ki, kidika balna laih sip di tatalwas, dakakawas dawak bik lapapakwas ki.#Sal 115:4-7; 135:15-17; Dn 5:23. 21Dawak muih ihiwa dai kidika bik dadawas ki, dawak di talyang balna kakalwa dai kidika, la munah kalduwas atnin lani kidika, dawak di malnin lani kidika bik dadawas ki.#Ex 8:15,19.
Currently Selected:
Ribilisan 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
