Ribilisan 10
10
Insal wauhtaya bin as ulna duwa dai kidika
1Insal ūk parasni nuhni duwa kat talnayang dai, kisang kaupak yaklakwi kaiwa dai mukus pasyakat; tunani yakat wayauli as duwa dai, muhni kidika laih sihm ma kapat yaringni dahlwa dai dawak kalni balna kidika laih sihm kuhpau lakwi parna kapat dai. 2Tingni yakat wauhtaya bin as apahna kat duwi kiwa likdai, dawak kalni tingpal niningkauh kidika laih kuma minit yakat lakna dai dawak wadahni niningkauh kidika laih sau minityakat lakna dai. 3Dawak yulni parasni yulwi sarahna dai, sihm layan as ihwa kapat; dawak sarahna mani kat, alwana wat tiaskaubu kapat kalahna dai. 4Alwana balna tiaskaubu kidika yulbabauna usnit kat, yawanayang dai ulna; kaunah kisang kaupak yulni as aput yayulwakat dakanayang dai: “Alwana balna tiaskaubu ais yuyulna kidika yulwinih, dawak bik ulwinih.”
5Bahang insal as kuma dawak sau minityakat yaklauna sakkat talnayang dai kidika, tingni tingpal niningkauh kidika kisang yakat dulauna dai 6dawak ban kaput atnin kidika ayangni usnit yakat pramis yamna dai, kisang, sau, kuma dawak kidika balna pasyakat di balna bitik yamna kidika. Aput yulna: “Baisa laih ma diskarang ki, 7kaunah insal tiaskaubu kidika trumnipit puhwarang mani kat, Papang dini malni yakat sakkidika bitik kalahna karang ki, witing palni yaklau dini yamyang prapit balna yakat diyulna dai kaput.”#Ex 20:11; Dt 32:40; Dn 12:7; Am 3:7.
8Yulni as yulwakat dakanayang dai kidika, dawak kisang kaupak kalahwa dai kidika, watwi yulyabauwi aput yayulna: “Yawah dawak insal as kuma dawak sau minityakat yaklauna kat tingni yakat wauhtaya bin as kurahna duwasak kidika dutah.” 9Insal yakat yawik kalyulnayang dai wauhtaya bin kidika yana atnin, dawak aput nangkitlana dai: “Dutah dawak kastah. Tampas yakat laih sihm amak damni kapat karang, kaunah bama yakat tapahlni kalna karang.”
10Wauhtaya bin kidika insal tingni kaupak dunayang dai, dawak kasnayang dai; dawak tikpas yakat laih sihm amak damni kapat dai, kaunah kaspamnayang usnit kat, bāki yakat tapahlni kalna dai.#Ez 2:8—3:3. 11Bahang aput yayuyulna dai: “Watta yulnam ki Papang yaklau tawan, nisan, tuni sat sat yuyulwa balna dawak king balna bik mahni yulnina ais yulna kidika.”
Currently Selected:
Ribilisan 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
